З Ганчарэнкам лягчэй стала беларускім легіянерам з Еўропы, а зборная дабралася да Кіпра без чартара

Падрыхтоўку да спарынгу з Кіпрам, які мае адбыцца ў чацвер, зборная Беларусі адразу пачала на «нетаварыскім» востраве (прынамсі, такім яго лічыць рэжым Лукашэнкі за ўведзеныя санкцыі). Дома каманда Віктара Ганчарэнкі нават не працавала. Хаця пры яго папярэдніку Карласе Алосе пару мінскіх трэнінгаў беларусы паспявалі зачапіць, нават калі гулялі дзесьці ў гасцях. І гэта стварала дадатковыя праблемы для нашых легіянераў, якія выступаюць у Еўропе. Усё ж такі прадрацца праз мяжу з Беларуссю, каб неўзабаве выправіцца назад – такая прыгода вымагае і высілкаў, і часу.

У лістападзе 2025-га перад матчамі кваліфікацыі чэмпіянату супраць Даніі і Грэціі Алос сабраў гульцоў у беларускай сталіцы. Давялося туды ехаць і легіянерам. Пры гэтым федэрацыя адмовілася купляць для іх квіткі на самалёт праз Стамбул. Хаця літоўска-беларуская мяжа тады была фактычна зачыненая, і, каб дабрацца з краін ЕС у Беларусь па зямлі, трэба было гадзінамі стаяць на польска-беларускай мяжы або рабіць вялікі крук праз Латвію. У выніку форвард польскага «Пяста» Герман Баркоўскі, каб трапіць у Мінск, перасякаў мяжу на матацыкле – так было крыху хутчэй.

Прыкладна 9–10 лістапада Баркоўскі дабраўся да Мінска, 11-га там пачаліся зборы, а ўжо ўвечары 13-га каманда, у тым ліку Баркоўскі, аўтобусам паехала ў Варшаву ды захрасла на мяжы з польскага боку – прастаялі там каля 12 гадзін.

Пры Ганчарэнку падыход пакуль іншы. Трэнінгаў у Мінску не было (прынамсі, пра гэта нічога не паведамлялася). Адтуль гульцы ЧБ і тым, каму зручна было стартаваць з Беларусі, аўтобусам без прыгод – мяжа апошнім часам працуе значна лепш – дабралася да Вільні. Там села на рэгулярны, а не чартарны, рэйс да Варшавы, а адтуль вылецела на Кіпр. У Польшчы да партнёраў далучыліся еўрапейскія легіянеры Герман Баркоўскі і Уладзіслаў Марозаў.

На Кіпры зборная прабудзе да 27 сакавіка і далей паляціць у Арменію – там 29-га правядзе другі таварыскі матч.