Хварэў на рак, кінуў жонку, мае грошай больш, чым сама Сабаленка – вось хто пазваў беларуску замуж

Першая ракетка свету Арына Сабаленка аб’явіла пра заручыны з 37-гадовым бразільскім бізнесоўцам грэцкага паходжання Георгіясам Франгулісам.

«Відавочна, я і ўявіць не магла, што гэта адбудзецца гэтым вечарам», – пазней напісала ў сацсетках спартсменка, якая, відавочна, адказала згодай на прапанову бойфрэнда. Той апусціўся на калена і дастаў каробачку з пярсцёнкам.

Расказваем, хто такі Франгуліс – як і на чым ён разбагацеў і ці бываў у шлюбе дагэтуль.

Страхоўку ад раку назваў «боскім промнем»

Спачатку Георгіяс хацеў стаць адвакатам, але кінуў універсітэт і пераехаў у ЗША. Сцвярджае, што ў Штатах звярнуў увагу на трэнд на здаровае харчаванне і вырашыў запусціць бізнес у Бразіліі. Той 2016 год атрымаўся насычаным на падзеі: Франгуліс ажаніўся з архітэктаркай Ізабэлай Арментана, а яшчэ ў яго выявілі рак шчытападобнай залозы. У параўнанні з іншымі анкалагічнымі захворваннямі гэтае добра паддаецца лячэнню, і ўсё ж. Як пазней расказваў мужчына, на вяселле і потым на лячэнне ён аддаў апошнія грошы.

Застаўшыся без сродкаў, Франгуліс патэлефанаваў у банк, каб скасаваць поліс страхавання жыцця, але пачуў ад клерка нечаканую навіну: паводле дамовы яму належала кампенсацыя ў 100 тысяч бразільскіх рэалаў – на той момант каля 31 тысячы долараў. Пазней у інтэрв’ю Франгуліс назаве гэта «боскім промнем», бо менавіта гэтыя сродкі дапамаглі ўтрымаць стартап Oakberry.

На ягадах зарабіў мільёны

Пасля лячэння Франгуліс у Сан-Паўлу запусціў першы пункт Oakberry, які прадаваў смузі на аснове бразільскіх ягад асаі. Праз год пунктаў стала ўжо 27. У 2018-м іх пачалі адкрываць ужо ў Еўропе і ЗША – то бок кампанія выйшла на міжнародны ўзровень. Сёння франшыза налічвае больш за 700 пунктаў з выручкай больш як 200 мільёнаў долараў.

Уласнае багацце Франгуліса на сёння ацэньваецца ў 70-100 мільёнаў долараў – гэта больш, чым у самой Сабаленкі. За кар’еру беларуска, якая сама з’яўляецца амбасадаркай Oakberry, зарабіла амаль 47 мільёнаў долараў на корце, але гэтая лічба не ўлічвае падаткі, якія трэба сплаціць. Таксама ў спартсменкі багата рэкламных кантрактаў, але толькі ў мінулым годзе гэтыя выплаты параўнялі з прызавымі.

У Соболенко 10+ рекламных контрактов: товары люкс, выпивка, проект букмекера, связанного с войной

Любіў ганяць на машынах

Франгуліс – вялікі прыхільнік аўтаспорту. З 2019 года ён выступаў ў серыі Porsche Cup Brasil. Да 2024 займеў некаторыя поспехі – чатыры разы ўзыходзіў да подыум, а аднойчы нават выйграў гонку. Пасля таго году, у які і пачаліся стасункі з Сабаленкай, выглядае, што на старт ён больш не выходзіў.

У лютым 2026-га стала вядома, што Франгуліс разам з тэнісістам Новакам Джокавічам, гоншчыкамі Кевіна Магнусенам і Феліпе Масам, а яшчэ і футбалістам Цібо Куртуа інвеставалі ў футбольны клуб «Ле-Ман» з Д2 Францыі. Што цікава, менавіта ў Ле-Мане праходзіць знакамітая аўтамабільная гонка на вынослівасць. Франгуліс заняў пасаду брэнд-менеджара клуба і заявіў, што хоча аб’яднаць прыхільнікаў футбола і аўтаспорту.

Упершыню заўважылі разам у Штутгарце

У сакавіку 2024 года Сабаленка заявіла, што яе «сэрца разрываецца» пасля навіны пра гібель экс-хакеіста Канстанціна Кальцова і што яны «больш не былі разам». Хаця яшчэ 14 лютага спартсменка хвалілася падарункам ад бойфрэнда.

Прадстаўнік паліцыі Маямі пра смерць Кальцова: «Аддзел забойстваў узяў на сябе расследаванне відавочнага самагубства»

Праз некалькі тыдняў Сабаленку заўважылі ў суправаджэнні жанатага Франгуліса на турніры Porsche Tennis Grand Prix ў Штутгарце, а з траўня з’яўляюцца фота пацалункаў пары – яны проста перасталі хавацца.

Сабаленка распавяла, што пазнаёмілася з будучым кавалерам падчас падпісання кантракта з Oakberry – то бок не пазней за студзень 2024 года.

Франгуліс вось ужо цягам амаль двух гадоў нязменна суправаджае Сабаленку на турнірах. За матчамі назірае з персанальнай ложы ў кампаніі трэнераў.

Бразілец ніколі публічна не каментаваў сыход ад жонкі

Пра свой папярэдні шлюб Франгуліс публічна не згадвае. А вось Ізабэла Арментана – відаць, ужо былая жонка – аднойчы заявіла: «Я замужам за Георгіясам, але буду патрабаваць разводу. У іх раман яшчэ з Каліфорніі».

Вядома, што Арментана і Франгуліс улетку 2024 года знаходзіліся ў працэсе разводу. На сёння жанчына вядзе непублічнае жыццё, часам выкладаючы фота з падарожжаў у Insagram.