Сабаку-доўгажыхару, якога Ціманоўская ледзь забрала ў былога, засталося пару месяцаў – бягуха хоча, каб яны прайшлі ў Маямі

Беларуская лёгкаатлетка Крысціна Ціманоўская, якая пасля ўцёкаў ад лукашысціх функцыянераў з Токіа вось ужо чатыры гады жыве ў Польшчы і выступае за гэтую краіну, падзялілася ў сацсетках асабістай гісторыяй, далёкай ад спорту. Замест таго, каб адпачываць у Маямі, спартсменка разам са сваім сабакам Джэсі праходзіць праз цяжкае выпрабаванне.

Па словах Ціманоўскай, напрыканцы верасня лекары выявілі ў яе шпіца пухліну, якую давялося тэрмінова выдаляць. Але гэта не стала рашэннем – новае абследаванне выявіла метастазы ў лёгкіх. Па сабачых мерках Джэсі ўжо стала «бабуляй». У жніўні ёй споўнілася 15 гадоў.

«Засталося жыць 4-6 месяцаў – так і напісана ў нашай карце. Некалькі жудасных дзён, слёз і болю. За што? Чаму яна? Яна не заслугоўвае такога», – бядуе спартсменка.

Спрынтарка кансультавалася з ветэрынарамі і была гатовая заплаціць любыя грошы за эфектыўнае лячэнне, але дактары шчыра адказалі: цуда тут не будзе.

Запланаваную паездку ў Маямі давялося адкласці. Пры гэтым шпіц напрыканцы жніўня гэтага года вярнуўся да Крысціны ад яе былога мужа Арсенія Зданевіча. Лёгкаатлетка папракае Зданевіча, што той у апошнія два гады не даваў сабаку неабходных таблетак для сэрца і ні разу не звадзіў да ветэрынара. Джэсі аказалася ў Грузіі ў былой дзяўчыны Зданевіча, і толькі дзякуючы цяперашняму партнёру Ціманоўскай, які асабіста злятаў туды, сабака вярнуўся да гаспадыні.

«Мы зрабілі аперацыю, выдалілі пухліну, але метастазы ў лёгкіх ужо не прыбраць. Цяпер усё, што магу, – гэта толькі працягнуць яе жыццё і быць побач», – кажа спартсменка.

Ціманоўская перажывае, што сабака мерзне ў Варшаве, бо пасля аперацыі застаўся без тлушчавай праслойкі. Цяпер спартсменка падбірае гадаванку лячэнне, пасля чаго стане зразумелым, ці магчымы пералёт у Маямі. «Я зраблю ўсё для яе, але я таксама хачу, каб яна пабачыла акіян, каб яна правяла свае апошнія месяцы жыцця ў цяпле, любові і пад добрым даглядам», – напісала бягуха.

Гісторыя з Джэсі супала і з няпростымі момантамі ў спартыўнай кар’еры Ціманоўскай. На нядаўнім чэмпіянаце свету па лёгкай атлетыцы польская каманда, за якую выступае нараджэнка Беларусі, была дыскваліфікаваная ў фінале эстафеты 4×100 метраў. Прычынай стала парушэнне правілаў пры перадачы эстафетнай палачкі паміж Піяй Скрышоўскай і Ціманоўскай.