Мэрам Нью-Ёрка ўпершыню стаў фанат футбола: дабраслаўляў Амарыма, запусціў петыцыю супраць палітыкі ФІФА

4 лістапада ў самым вялікім горадзе ЗША абралі новага мэра. Ім стаў 34-гадовы ўраджэнец Уганды сацыяліст Захран Мамдані. Ён правёў даволі яскравую выбарчую кампанію, актыўна прасоўваўся ў TikTok. Таксама ён запомніўся некаторымі нетыповымі для амерыканскіх палітыкаў выказваннямі. Таксама ён цікавіцца сокерам, а не толькі амерыканскім футболам. Расказваем, хто ён такі, што кажа пра спорт і якія клуб падтрымлівае.

Камуніст і антысеміт? Такім яго малююць апаненты

Калі Захрану было 7 гадоў, яго сям’я пераехала ў Нью-Ёрк. У юнацтве Мамдані спрабаваў сябе як рэпер пад псеўданімамі Young Cardamom і Mr. Cardamom, аднак пад канец 2010-х ён зрабіў выбар на карысць палітыкі. У 28 гадоў ён ужо стаў дэпутатам мясцовага сходу штату Нью-Ёрк. У кастрычніку 2024 года аб’явіў пра намер вылучыцца на выбары мэра і праз 9 месяцаў нечакана выйграў праймерыз Дэмакратычнай партыі.

Падчас кампаніі ён сутыкнуўся з сур’ёзнай крытыкай – казалі, што ён «падтрымае ХАМАС» і што ён «мусульманін-камуніст». Гэта не так: Мамдані – сацыяліст, які абяцае замарозіць рост арэнднай платы, зрабіць грамадскі транспарт бясплатным, падтрымаць мігрантаў і павысіць падаткі для багатых. У Еўропе нямала палітыкаў з падобнымі поглядамі, і яны не лічаць сябе камуністамі. Мамдані асудзіў напад ХАМАС 7 кастрычніка 2023 года, але таксама крытыкуе ўварванне Ізраіля ў сектар Газа.

Што Мамдані кажа пра спорт?

Будучы мэр даволі актыўна ім займаецца. Захран двойчы браў удзел у Нью-ёркскім марафоне і падтрымлівае развіццё роварнай інфраструктуры. Адзін з перадвыбарчых ролікаў для TikTok ён зняў, калі катаўся на шэрынгавым ровары. Зацаніце стан веласцежак у горадзе:

Заўзее за лонданскі «Арсенал». У адным з інтэрв’ю прызнаўся, чаму:

«Я стаў заўзятарам «Арсенала» яшчэ ў пачатку 2000-х – дзякуючы свайму дзядзьку. Для маёй сям’і з Усходняй Афрыкі гэты клуб быў асаблівы: у ім гулялі афрыканскія футбалісты – Ларэн, Кола Турэ, Кану, Эбуэ, Сонг. Я ганарыўся гэтай камандай і трапіў у самыя добрыя яе гады – час залатога сезона. Цяпер не заўсёды маю час глядзець матчы, таму сачу за навінамі літаральна па хвілінах».

У кастрычніку 2025 «Ліверпуль» саступіў «МЮ» і «Арсенал» стаў адзіным лідарам АПЛ. Тады Мамдані літаральна дабраславіў трэнера манкуніянцаў: «Ды добраславіць цябе Бог, Рубен Амарым! У «Ліверпуля» чатыры паразы запар. Выдатна».

Крытыкуе ФІФА за палітыку цэнаўтварэння

Прыгарад Нью-Ёрка будзе прымаць ЧС па футболе ў наступным годзе. У сваёй перадвыбарчай прамове Мамдані раскрытыкаваў дынамічныя цэны за квіткі:

«Наша барацьба за даступнасць горада не абмяжоўваецца жыллём і транспартам – яна тычыцца і радасці ад спорту. Мы патрабуем спыніць дынамічнае цэнаўтварэнне і зрабіць турнір даступным для тых, хто лічыць Нью‑Ёрк сваім домам. ФІФА ставіць прыбытак вышэй за патрэбы людзей, але стабільная будучыня футбола павінна быць пабудавана на магчымасці ўжывую глядзець матчы».

Будучы мэр таксама хоча, каб 15% квіткоў для нью-ёркцаў на матчы ЧС на «Метлайф-стэдыум» былі са зніжкай. Нагадаем, Клубны чэмпіянат свету ў ЗША раней адзначыўся паўпустымі трыбунамі якраз праз высокія цэны квіткоў і непапулярнасць сокера ў ЗША.