Замес у Кубку Беларусі ў матчы «Крумкачоў»: штурханіна ў два заходы, ажно чатыры чырвоныя і карона ў распранальні

Жарсці разгарэліся ў матчы 1/32 фіналу Кубка Беларусі, які адбыўся 22 траўня ў Капылі. На сваім стадыёне мясцовая «Бабоўня» прымала «Крумкачы». Пад канец матча, на 87-й хвіліне, раптам усчалася масавая бойка. Суддзя не вагаўся і адразу паказаў тры чырвоныя карткі – адну для «Бабоўні» і дзве для «Крумкачоў».

ВІДЭА

Галоўныя героі эпізоду – Аляксей Хадневіч з «Крумкачоў» і Сяргей Карнушэнка з «Бабоўні». 37-гадовы гулец сталічнага клуба спрабаваў дагнаць мяч на чужой палове поля і сфаліў на Карнушэнку, забег. Затым Хадневіч стаў выказваць незадаволенасць і счапіўся з нейкім іншым супернікам. Тут на яго накінуўся Карнушэнка, які раптам падхапіўся з поля, але неўзабаве быў зноў павалены. Да тузаніны далучыліся амаль усе футбалісты на полі – прыбег нават брамнік «Крумкачоў».

Як вынік тры выдаленні: Хадневіч і Арцём Варанковіч у «Крумкачоў» і Карнушэнка ў клуба з Капыля. Але гэта не ўтаймавала футбалістаў – на апошніх імгненнях адбылася яшчэ адна сутычка. Яна прывяла да выдалення брамніка гасцей Віталя Зыгмантовіча, што вельмі пацешыла мясцовых болбояў. ВІДЭА

«Крумкачы», нягледзячы на большыя страты, усё адно адсвяткавалі перамогу і выйшлі ў 1/16-ю (матч так і скончыўся з лікам 2:1).

У распранальні госці не забыліся на сваю традыцыю – уручэнне кароны найлепшаму футбалісту. Выдалены Зыгмантовіч перадаў яе паўбаронцу Яўгену Гардзейчыку, які зрабіў адну галявую перадачу. Той у прамове назваў матч «спакойным»:

«Усе красаўцы, што не пакутвалі. А мы спакойна гулялі, нават пры 2:1. Што там Фаміч пра нервы сказаў, я не ўцяміў».

ВІДЭА