Нявестка Лукашэнкі прадала шоу рэжымнаму ТБ за мільён еўра – белфутболу такія лічбы не сніліся
Нават калi нiякага iншага ў свеце амаль не было.
Не так даўно расследавальніцкі цэнтр «Бюро» высветліў, што дзяржаўны тэлеканал СТБ набыў у «Музычнай медыякампаніі» правы на трансляцыю караоке-шоу «Шум Пятніцы». Згодна з дакументамі, гаворка ідзе пра 34 выпускі і анонсы праграмы. Агульны бюджэт – 3,7 мільёна беларускіх рублёў, або каля 1,07 мільёна еўра. Кошт аднаго эпізоду перавышае 30 тысяч еўра.
У гэтым шоу будуць спаборнічаць работнікі беларускіх дзяржпрадпрыемстваў, што цалкам капіруе іншую беларускую вакальную перадачу – «Зорны шлях» на тэлеканале ОНТ. Прэм’ера такой сабе «навінкі» прызначаная на 10 кастрычніка. Яе вядоўцам стане сын расійскага выканаўцы і прапагандыста Алега Газманава Радзівон Газманаў.
Ёсць вялiкiя сумневы, што такая праграма вартая мільёна еўра. Але суму лёгка патлумачыць тым, што «Музычная медыякампанія» цесна звязаная з аўтаркай песень Ганнай Сялук – жонкай Дзмiтрыя Лукашэнкi, сярэдняга сына дыктатара Аляксандра Лукашэнкi. Так дзяржсродкi фактычна перацякаюць у кiшэнi лукашэнкаўскай сям’i.
Пры гэтым сам Лукашэнка няспынна шукае пласты грамадства, што нiбыта «зажэрліся». Спорт – ледзьве не ўлюбёная ягоная тэма для папулізму наконт выдаткаў. Вось і сёлета ўвесну дыктатар зноў абяцаў «навесці парадак» з заробкамі спартсменаў.
Але нават у футболе ўнутры Беларусi з выканаўцаў мiльён еўра бачыў хiба што Аляксандр Глеб у часы аднаго з вяртанняў у БАТЭ, i то за год. У сучасным ЧБ зацверджаныя ліміты заробкаў для футбалістаў і трэнераў, якія маюць кантракты з клубамі з дзяржфінансаваннем. Цяпер максімальная стаўка для гульца складае 16 тысяч рублёў, а для коўча – 10,5 тысячы, але клубы настолькi небагатыя, што i столькi атрымлiваюць адзiнкi. Мільёна еўра цяпер хапіла б на гадавое ўтрыманне каманды з 15 зборнікаў (менавiта iм дасяжныя максiмальныя стаўкi) і трэнерскага штаба.
Тым часа кiраўнiк «мiнспорту» Сяргей Кавальчук нядаўна наноў вынайшаў невераемны спосаб матывацыі – за няўдачы ў чэмпіянаце значна паменшыў i так «падлiмiтныя» аклады гульцоў «Дынама». Для незадаволеных заробкамi ў ЧБ у Кавальчука ёсць парада: «Прапанавалі добры кантракт у Расіі – няхай паедзе і заробіць там, падрыхтуем іншага».
У мінскім «Дынама» не ўсім зрэзалі заробкі, гульцоў «Віцебска» папярэджвалі, але да іх не дайшло
Ды і за тэлетрансляцыі белфутбола мільёна не плацілі нават у 2020-м, калі пандэмія каранавіруса спыніла амаль усе чэмпіянаты ў свеце – а рэжым напляваў на небяспеку, і ЧБ ішоў па раскладзе. Тагачасны кіраўнік АБФФ Уладзімір Базанаў заяўляў, што на продажы правоў удалося зарабіць усяго каля 280 тысяч еўра.
У 2025-м АБФФ увогуле не змагла толкам прадаць правы на вышэйшую лігу. Дзяржкампанія «Белтэлекам» адмовілася ад трансляцый на сваім канале, хаця ў абмен на іх толькi пакрывала чвэрць федэрацыйных выдаткаў на вытворчасць. Спрабавалі дамовіцца з расейскімі кампаніямі – атрымалі адказ, што не раней за 2026-ы. А «Беларусь 5» з рэжымнага холдынгу БТРК не паказала матчаў першага туру, бо не захацела ставіць камеры там, дзе ёй гэта было нязручна. У выніку трансляцыі ёсць, але пра грошы тут і казаць смешна.
Іншыя пасты карыстальніка
