У ЧБ прыйшоў другі за гісторыю карэец: паўгода нідзе не гуляў, імя суперзорнае – але не праз футбаліста
Першы карэец на Беларусі і скончыў.
Хоць чэмпіянат Беларусі выйшаў з паўзы, клубы ўсё яшчэ актыўна ўзмацняюцца.
Часам гэта нечакана – у прыватнасці, 7 жніўня «Мінск» абвясціў пра трансфер паўднёвакарэйца, імя якога напісалі як Джыхун Парк. Гэта экзатычны накірунак для белфутбола – але імя вядомае, хоць і не дзякуючы футбалісту. Раскажам пра яго падрабязней.
Паўгода быў без клуба
У прэс-рэлізе «Мінск» напісаў, што Джыхун пачынаў прафесійную кар’еру «ў сябе на Радзіме». Аднак не ўдакладнілі, на якой з двух – згодна са звесткамі Transfermarkt, футбаліст мае і казахстанскі пашпарт, а пачынаў займацца ў СДЮСШАР-8 Астаны. У сезоне-2020 ён правёў чатыры матчы за каманду школы, якая тады выступала ў казахстанскім Д2. Ды трапіў у заяўку і на наступны сезон, што выклікала лакальны скандал. Мясцовы журналіст Уладзімір Жаркоў, відаць, не паглыбіўшыся ў пытанне, абураўся тым, што дзяржаўная спартыўная школа, маўляў, замест развіцця мясцовых дзяцей падпісвае ў асноўную каманду легіянера.
Джыхун пайшоў са СДЮСШАР у сакавіку 2022 года, так толкам і не пагуляўшы на дарослым узроўні. Ды і сама школа пасля адзінага поўнага сезона не выставіла каманду ў лігу. У 2021 годзе яшчэ ўдзельнічалі ў Кубку краіны, аднак потым цалкам засяродзіліся на дзіцячым футболе.
Наступным пунктам у кар’еры Джыхуна стаў карэйскі мінор – «Ёнчхэн» з Д4. Потым – каманда універсітэту Хала з вострава Чэджу з студэнцкай лігі. Пагуляўшы так блізу года, футбаліст вярнуўся ў Казахстан – у якасці свабоднага агента яго падпісаў «Хан-Тэнгры» з Д2. Там Джыхун упершыню атрымаў паўнавартасную практыку ў прафесійнай лізе – 14 матчаў ды нават адзін асіст. Каманда заняла 7-ы з 15 радкоў табліцы.
У лютым 2024 года Джыхун адправіўся ў новы для сябе чэмпіянат – Д1 Кыргызстана. Там за клуб «Талант» правёў 22 матчы, забіў адзін мяч і нават неяк стаўся найлепшым гульцом сустрэчы. Клуб жа аказаўся 8-м з 10 (вылятаў толькі апошні).
Новага кантракта Джыхун не атрымаў і ад пачатку 2025-га стаў свабодным агентам. I да «Мінска» больш за паўгода правёў без працы. Цяпер 24-гадоваму абаронцу далі кантракт толькі да канца бягучага сезона – такая перасцярога не здзіўляе.
Мае знакамітага цёзку
Як мы бачым, кар’ера ў Джыхуна не самая паспяховая. Аднак калі вы загугліце імя гэтага футбаліста, то ўбачыце тысячы запытаў. Справа ў тым, што ён – поўны цёзка карэйскай суперзоркі. Прынамсі, у мясцовай мове што адзін, што другі – 박지훈, хаця нефутбаліста ў Вікіпедыю запісалі Пак Чыхун.
Гэта актор і спявак, які займеў першую папулярнасць яшчэ ў 2017 годзе, калі паўдзельнічаў у рэаліці-шоу Produce 101. Аднак рэальную славу прынёс выхад у 2022 годзе тэлесерыяла «Слабы герой» ад Netflix, дзе Чыхун зняўся ў галоўнай ролі. Нядаўні рэліз другога сезона гэтай дарамы яшчэ мацней развіў поспех. Цяпер Чыхун актыўна выступае з сольнай творчасцю, здымаецца ў рэкламах і розных шоу, а ў яго Інстаграме ажно 6,6 мільёнаў падпісантаў. Дарэчы, знешне на навічка «Мінска» ён не падобны.
Папярэдні карэец у ЧБ праваліўся
Дагэтуль у «вышцы» гуляў толькі адзін прадстаўнік Паўднёвай Карэі. Перад сезонам-2020 мінскае «Дынама» раптам падпісала 20-гадовага паўабаронцу Чжун Ён Кіма, які да гэтага выступаў толькі ў студэнцкай лізе ў сябе на Радзіме. Навiчок клуба не валодаў нават англійскай мовай, не кажучы ўжо пра беларускую ці рускую.
Кіму адразу адвесілі аванс – ён пачаў сезон у асноўным складзе: згуляў у абодвух кубкавых матчах супраць БАТЭ (у адным выйшаў у старце) і ў першых двух турах чэмпіянату. Аднак пасля гэтага коўч мінчан Сяргей Гурэнка адмовіўся ад паслуг футбалiста – паўабаронца быў адпраўлены ў дубль, дзе правёў яшчэ некалькі гульняў. Потым «Дынама» ўзначаліў Леанід Кучук, i неўзабаве карэец пакінуў каманду. Transfermarkt не ведае больш нi пра які досвед гульца ў прафесiйным футболе.
Як там справы ў «Мінска»?
«Гараджане» скончылі першае кола ЧБ у сярэдзіне турнірнай табліцы, на восьмым месцы, а другую палову пачалі з упэўненай перамогі над «Нафтанам» (3:0). Някепскі вынік, калі параўноўваць з мінулым сезонам – летась «Мінск» заняў 13-ы радок. Але каманду ў 2025-м штарміць. Часцяком пускаюць кур’ёзныя галы (гэта пачалося яшчэ ў першым туры, калі прайгралі «Нафтану» 1:2), ледзь перамаглі аўтсайдара «Маладзечна» (3:2), а з красавіка па чэрвень раз на месяц атрымлівалі разгромы ад лідараў ЧБ – спачатку 1:4 ад мінскага «Дынама», потым 0:5 ад брэсцкага, далей 1:5 ад «Тарпеда-БелАЗ».
Цягам бягучага розыгрышу самай праблемнай пазіцыяй быў брамнік. Прынамсі, большая частка пацешных хайлайтаў сувязаная з памылкамі Аляксандра Гутара. Як расказвала «Трыбуна», ён меў асабістыя дамоўленасці з галоўным трэнерам Арцёмам Чалядзінскім, праз якія мог не пераймацца пра месца ў старце.
Але разгром ад «Тарпеда-БелАЗ» стаў трыгерам – з тых часоў у старце выходзіць Уладзіслаў Ігнацьеў, арандаваны ў БАТЭ. У камандзе ёсць яшчэ Мацвей Сухарэнка – адзіная падмена Гутару са сталым кантрактам, – аднак ён пакуль выступае за дубль.
Пасля першага кола Чалядзінскі казаў, што «самае важнае – захаваць склад «Мінска». Але з таго моманту клуб ужо пакінулі некалькі важных выканаўцаў. У асноўным – у клубы вышэй па таблiцы: Андрэй Дзенісюк – у мінскае «Дынама», Дзмітрый Лісаковіч – у брэсцкае «Дынама», кыргызстанец Гулжыгіт Барубаеў – у «Нёман» (гэта адзіны гулец, за якога ўдалося выручыць грошы, памер якіх, праўда, не разгалошваецца). Адзін з лідараў абароны «Мінска» Руслан Хадаркевіч паехаў у казахстанскі «Атырау» – на яго пазіцыю i падпісалі Джыхуна.
Больш за астатнiх сышло гульцоў паўабароны, аднак у гэтую лінію падпісалі пакуль толькі дваіх: Арцёма Турыча з брэсцкага «Дынама» і Паўла Назаранку, які аднаўляўся ад траўмы пасля няўдалага ваяжу ў таджыкскі «Істыкол». Таксама да «Мінска» свабодным агентам далучыўся левы абаронца Уладзіслаў Яцкевіч, які раней выступаў за «Гомель».
Усе трансферы «Мінска» ў адной укладцы «Трыбуны»
Адзінае ўзмацненне лініі атакі – 28-гадовы нігерыец Чарльз Маркі Ікечукву. Нападнік перайшоў з саудаўскага «Аль-Салам Спорт» і атрымаў 10-ы нумар.
Усе футбалісты, якія папоўнілі склад «Мінска», прыйшлі задарма. Здаецца, сталічны «донар» белфутбола выкручваецца што ёсць моцаў, прыбягаючы да такiх варыянтаў, як карэец з пашпартам Казахстана з кыргызстанскага чэмпіянату.
Іншыя пасты карыстальніка
