Першай ад Беларусі на Алімпіяду-2026 адабралася не беларуска: «гуліверка», не пацягнула дома, яшчэ можа не паехаць

У Пекіне адбыўся дадатковы адбор на Алімпіяду-2026 у фігурным катанні. Свой шанц, няхай і ў нейтральным статусе, атрымалі і спартсмены з Беларусі. У жаночым адзіночным катанні ўладальніца беларускага пашпарту Вікторыя Сафонава ў суме набрала 181,91 бала і заняла чацвёртае выніковае месца. Алімпійскія пуцёўкі давалі першыя пяць пазіцый. Такім чынам, 22-гадовая Сафонава ўшчыльную наблізілася да таго, каб выступіць у Мілане, – гэта першы прадстаўнік Беларусі, які адабраўся на Гульні. Праўда, паездка яшчэ не гарантаваная.

Прыехала з Расіі, дамінуе ў нашым фігурным катанні

Вікторыя Сафонава нарадзілася ў Маскве ў 2003 годзе і да 2019-га выступала за Расію. Перайшла пад чырвона-зялёны сцяг перад сезонам-2019/20 – і адразу стала лідаркай зборнай. Але цяпер выступае ў статусе індывідуальны нэйтральны атлет (AIN), і менавіта ў такім статусе яна адбіралася на Алімпіяду.

Беларусія ці Беларусь: не разабралася, як правільна

Ужо атрымаўшы беларускія дакументы, у 2020 годзе Сафонава прызнавалася: «Колькі ні чытала ў Інтэрнеце – не змагла зразумець, як правільна. Нібыта раней заўсёды была Беларусія. Цяпер Беларусь. Быццам бы беларусы хочуць, каб выкарыстоўваўся другі варыянт».

А варта было проста паглядзець у пашпарт.

Не змагла скласці канкурэнцыю дома, таму паехала на Захад

Як для Расіі, фігурыстка не дэманстравала выбітных вынікаў: фінішавала 14-й на юніёрскім чэмпіянаце краіны-2018 у Саранску. За год Сафонава была 8-й на юніёрскім ЧР-2019 у Пярмі. Але каб патрапіць у дарослую зборную РФ, гэтага было мала праз высокую канкурэнцыю.

Пераход у Беларусь адкрыў Сафонавай міжнароднае вакно магчымасцяў.

Ужо выступала за Беларусь на Алімпіядзе

У Пекіне-2022 масквічка з беларускім пашпартам стала 13-й у агульным заліку. Яна была 17-я пасля кароткай праграмы, у вольнай заняла 13-е месца. Для Беларусі гэта найлепшы вынік у жаночым катанні на Гульнях у гісторыі.

«Гулівер» у спорце «ліліпутаў»

Па звестках Міжнароднага саюзу канькабежцаў, рост Сафонавай – 174 см, што для жанчын-адзіночніц рэдкасць. Параўнайце гэта з ростам апошніх чэмпіёнак свету: амерыканка Аліса Лю (158), японка Каоры Сакамота (159), расіянкі Ганна Шчарбакова (159) і Аліна Загітава (160).

Як кажуць адмыслоўцы, доўгі крок дае выразнасць у дарожках і кручэннях. З іншага боку, гэта патрабуе вельмі чыстай тэхнікі на скачках, асабліва на ўваходах і выездах.

Не ва ўсім пагадзілася з Лукашэнкам наконт каранавіруса

Вясной 2020-га года ў фігурысткі спыталіся, ці бачыла яна рэзананснае выказванне Лукашэнкі на катку пра Covid, дзе ён сцвярджаў, што «гэта лядальня, тут вірусы не лётаюць». Сафонава адказала, што глядзела: «З аднаго боку, Лукашэнка мае рацыю ў тым, што трэба ставіцца да сітуацыі спакайней, з іншага – вельмі шмат людзей ужо захварэлі, і не проста так усюды ўсё зачыняюць».

Ужо 6 гадоў нязменна перамагае ў чэмпіянаце Беларусі

Сафонава не пакідае шанцаў іншым фігурысткам, якія выступаюць за Беларусь. Ад моманту дэбюту на чэмпіянаце Беларусі ў сезоне 2019/20 яна кожны раз здабывала перамогу – іх ужо назбіралася шэсць.

Covid сапсаваў яе ЧС

За пару дзён да старту на чэмпіянаце свету ў Стакгольме ў 2021 годзе Сафонаву знялі праз станоўчы тэст на Covid. Гэта быў вельмі балючы момант у кар’еры. Спартсменку ізалявалі, а турнір прайшоў міма яе.

Чэмпіён НБА будзе вызначаць, ці паедзе такі Сафонава ў Мілан

Праверку беларускіх спартсменаў на адпаведнасць патрабаванням нейтральнага статусу правядзе спецыяльны ворган пад доўгай назвай «Індывідуальная камісія па разглядзе права на ўдзел нейтральнага спартсменаў» (AINERP).

У камісію ўвайшлі сябар Міжнароднага алімпійскага камітэту, былая сінхраністка Ніколь Хэвертц, двухразовы чэмпіён НБА і экс-гулец зборнай Іспаніі Паў Газоль, а таксама прэзідэнт Міжнароднай федэрацыі гімнастыкі Марынары Ватанабэ.

Што даюць 181,91 бала на фоне сусветных вынікаў

На ЧС-2025 п’едэстал меў наступныя паказнікі: ад 215 балаў за бронзу да 222 за першае месца. Зона 4-8-га месцаў – прыкладна 196-209 балаў. З цяперашнімі 181,91 Сафонава вельмі блізкая да патэнцыйнага траплення ў топ-10. Але для гэтага яшчэ трэба паднаціснуць.