У Расіі ўзнялі пытанне, як у футбол трапіў Бакіч: пасля Мінска на дне з масквічамі, адзіны гол – праз нязграбны прыём
Яшчэ адзін былы топ ЧБ там таксама ў сумнай сітуацыі.
Летам чарнагорскі форвард Душан Бакіч перайшоў з мінскага «Дынама» ў маскоўскае «Тарпеда», якое замест заробленага падвышэння да Д1 Расіі атрымала абвінавачванні ў спробах маніпулявання вынікамі ды засталося ў Д2.
Але там у футбаліста ідзе так, што пасля апошняй гульні былы футбаліст зборнай Расіі Уладзіслаў Радзімаў сказаў, што не разумее ўвогуле, як балканец трапіў у футбол. Паглядзелі, што стаяла за такой ацэнкай і ці ёсць падставы для такіх рэзкіх заяў.
Нагадаем, што Бакіч у пачатку вясны 2025-га вярнуўся ў мінскае «Дынама» з Кіпра, хаця там атрымліваў значна болей.
Але гэтым разам у Беларусі не пайшло: за 12 матчаў у чэмпіянаце адзін мяч і адзін асіст (плюс аўтагол ды незабіты пенальці), за чатыры еўракубкавых сустрэчы ўвогуле нічога.
Фонам гучалі і публічныя прэтэнзіі да форварда. У прыватнасці, Пётр Качура казаў, што форвард «вельмі любіць сябе і не любіць шчыраваць». Але тут ёсць свая гісторыя адносін.
6 жніўня 2025-га кантракт з Бакічам быў скасаваны «па згодзе бакоў». А ўжо на наступны дзень форвард быў абвешчаны гульцом «Тарпеда». На той момант у каманды было адно ачко пасля трох тураў Д2.
11 жніўня Бакіч дэбютаваў супраць кастрамскога «Спартака» (0:1), выйшаўшы ў перапынку. Як аказалася, цэлы тайм – гэта быў вялікі гульнявы час, нават столькі форвард больш у лізе не атрымліваў. Цяпер на рахунку чарнагорца дзевяць сустрэч Д2 – без выніковых дзеянняў.
Канешне, трэба адзначыць, што дрэнна «Тарпеда» ў цэлым. За два месяцы клуб чатыры разы змяніў трэнераў: 15 жніўня здарылася адстаўка Алега Конанава, потым абавязкі галоўнага паслядоўна прымалі Павел Кірыльчык і Сяргей Жукаў, 13 верасня клуб прызначыў Дзмітрыя Парфёнава, а ўжо 15 кастрычніка звольніў яго і вярнуў Конанава. Камандзе ўсё гэта не пайшло на карысць – замест новай барацьбы за верхнія месцы яна пасля 16 тураў мае 14 ачкоў і месціцца на 17-м, перадапошнім радку.
У 7-м туры пасля 0:3 ад «Родзіны» Кірыльчык сказаў, што выпускаў Бакіча (на 65-й хвіліне пры 0:1), каб перабудавацца на два форварды ды «праціскваць» суперніка, а ў выніку нічога не атрымалася, і трэнеру толькі стала сорамна за каманду.
Пры гэтым у кастрычніку «Тарпеда» прайшло два раўнды Кубка Расіі – праз супернікаў з Д3. Спачатку разбілі 3:0 «Велес», і ў гэтым матчы Бакіч нават нарэшце забіў. Праўда, спачатку не змог прыняць мяч, але той адляцеў у суперніка так удала, што вярнуўся да чарнагорца, які ўжо падпрацаваў і добра прабіў (адзнака 2:02).
Аднак водгукі ад заўзятараў маскоўскай каманды былі не найлепшымі.
«Бакіч упэўнена дэманструе свой кашмарны ўзровень. Upd. Напісаў да гола, карціну не мяняе», – падзяліўся адзін.
«Няўдалая апрацоўка мяча Бакічам «дапамагла» яму забіць. Шчыра кажучы, не хацелася б, каб гэты гол паслужыў чарнагорцу пропускам у аснову», – падхапіў іншы.
29 кастрычніка ў наступнай кубкавай гульні з «Кубанню» (1:1, 4:2 па пенальці) Бакіч мог забіваць зноў – але ў самым пачатку другога тайма пры 1:0 на карысць «Тарпеда» запароў выхад сам-насам (адзнака 2:45).
Пасля гульні галоўны трэнер Конанаў асобна вылучыў, што Бакіч момант, «на жаль, не рэалізаваў а далей атрымалася тое, што атрымалася» (прапушчаны мяч і серыя пенальці ў выніку, дадатковага часу на гэтай стадыі няма). Услед прыйшла і згаданая крытыка ад Радзімава – ён таксама дадаў, што «ледзь не звар’яцеў», даведаўшыся заробак чарнагорца, але лічбаў не назваў.
Ад заўзятараў былі выказванні ў тым жа духу. Вось адно з іх: «Цяпер разумею, чаму не ставяць на гульню Алыкулава (поўны кашмар), Бакіча (сонная курыца). Пратранжырылі моманты. Бакіч выйшаў сам-насам, тыцнуў бы ў кут. Поўны дэбіл».
Так, разам з Бакічам гуляе за «Тарпеда» і былая зорка ЧБ у складзе «Нёмана» Гулжыгіт Алыкулаў. У яго ў цяперашнім сезоне 9 сустрэч ды адзін мяч. У пачатку кастрычніка паведамлялася, што на яго не разлічваюць, і ён можа пакінуць клуб. З таго часу сапраўды не гуляў у Д2, але з «Кубанню» выйшаў на той жа 63-й хвіліне, на якой памянялі Бакіча.
Іншыя пасты карыстальніка
