Лісаковіч звінаваціў у здрадзе былых партнёраў, якія з'ехалі з Расіі праз вайну, а Хвічу, выглядае, увогуле назваў «кадрам»

Форвард Віталь Лісаковіч – бясконцая крыніца навін. Яшчэ зусім маладым сварыўся ў салігорскім «Шахцёры» з трэнерамі і партнёрамі. Нібыта стаўшы зоркай ігнараваў выклікі ў зборную Беларусі. У Расіі здзіўляў колькасцю нясплачаных штрафаў. Ну і сам, без прымусу, віншаваў Аляксандра Лукашэнку з днём нараджэння – такога кадра, як Лісаковіч, у айчынным спорце трэба пашукаць. Чым далей, тым футбалісту ўсё больш складана становіцца здзіўляць. Але ён не здаецца і прадпрымае новыя спробы.

Вось на днях Лісаковіч адшукаў «здраднікаў». Здарылася гэта пасля таго, як журналіст «Прэсбола» задаў пытанне пра вылет з казанскім «Рубінам» з расійскай прэм'ер-лігі па выніках сезона-2021/22. Аказалася, што вінаватыя канкрэтныя людзі, і іх учынкаў Лісаковіч відавочна не ўхваляе.

– Легіянеры, якія ў пэўны момант пакінулі «Рубін», на мой погляд, здрадзілі камандзе, якая ім верыла. У выніку яны проста маглі сярод тыдня сабраць сумкі і з'ехаць. А адзін кадр увогуле ўбыў за дзень да матча, – па сёння абураны 27-гадовы выхаванец вуздзенскага футболу.

Але ён замоўчвае вельмі важны нюанс: легіянеры з'ехалі не проста ў «пэўны момант», а пасля таго, як Расія пачала паўнамаштабную вайну супраць Украіны. ФІФА дала магчымасць замежнікам, якія гулялі ў РФ, аднабакова прыпыніць кантракты.

Адразу пяцёра партнёраў Лісаковіча скарысталіся магчымасцю: харват Філіп Урэмавіч, датчанін Андэрс Дрэер, чарнагорац Сеад Хакшабанавіч, паўднёвакарэец Ін Бом Хван і грузін Хвіча Кварацхелія, якога, хутчэй за ўсё, нападнік і называе словам «кадр». Менавіта дзейны пераможца Лігі чэмпіёнаў у складзе ПСЖ афіцыйна пакінуў «Рубін» 31 сакавіка, за дзень да гульні з «Хімкамі», якую казанскі клуб аддаў 2:3.

Замежныя футбалісты пачалі разбягацца пасля 20-га тура, калі «Рубін» меў 25 балаў і шоў 11-м. А вось за фінішныя 10 тураў каманда, якую ўзначальваў Леанід Слуцкі, набрала 4 балы, прапусціла наперад чатырох канкурэнтаў і наўпрост вылецела з РПЛ з перадапошняга, 15-га, месца.

Лісаковіч і сёння не хоча з'язджаць з Расіі, нягледзячы на тое, што тая робіць з Украінай, – кажа, яго «не чакаюць у Еўропе». Але здзіўляе тут іншае – што на тэму «здрады» разважае чалавек, які сам выклікаў вялікія пытанні ў тым жа «Рубіне» і не выглядаў узорам адказных паводзінаў.

Пасля вылету Казані ў Д2 Лісаковіч «перажыў» і Слуцкага, і наступнага трэнера Юрыя Уктульбаева. За 26 тураў аформіў 9 галоў, але потым каманду прыняў Рашыд Рахімаў. Лісаковіч нават забіў у першым матчы пад кіраўніцтвам спецыяліста, але той гол стаў апошнім у «Рубіне».

Каманда з першага месца вярнулася ў Д1, а там узаемаадносіны трэнера і гульца даволі хутка пачалі пагаршацца: Рахімаў публічна крытыкаваў Лісаковіча, бо той ігнараваў заўвагі. Каб зменьшыць напругу, гульца на палову сезона адправілі ў арэнду да «Балтыкі» ў Калінінград.

Па вяртанні Рахімаў ізноў быў незадаволены Лісаковічам, прычым прэтэнзія палягала акурат у антыкаманднасці: трэнер заклікаў форварда пачаць «выконваць тое, што выконваюць астатнія» і зразумець, што ён «не асобнае звяно». Канешне ж, здраднікам сябе Лісаковіч тады не называў.

Той канфлікт так і не ўдалося ўлагодзіць, і Лісаковіч перастаў трапляць у заяўку на матчы, а потым адмовіўся разрываць кантракт з «Рубінам», па якому зарабляў 800 тысяч еўра ў год. Канфлікт скончыўся чарговым пераходам у «Балтыку».

***

У канцы чэрвеня ў гульца скончыцца кантракт з «Балтыкай», якая выйшла ў РПЛ. За мінулы сезон нападнік забіў 6 мячоў у 18 матчах Д2 Расіі, але ў апошніх дзесяці гульнях каманды ні разу не выйшаў у старце і ўвогуле двойчы застаўся па-за заяўкай (а забіў толькі адзін мяч з пенальці).

«Свае справы» з новым клубам Лісаковіч збіраецца вырашаць ужо пасля тавырскіх матчаў за зборную, прыярытэт – канешне ж, Расія. А што тыя, хто нібыта здрадзіў «Рубіну»?

***

Харвацкі цэнтральны абаронца Урэмавіч транзітам праз «Шэфілд Юнайтэд» і «Герту» аказаўся на Радзіме ў «Хайдуку». У чэмпіянаце-2024/25 правёў 31 матч (забіў 2 галы і аддаў адзін асіст, каманда ж пад кіраўніцтвам легенды «Мілана» Джэнара Гатуза стала трэцяй, адстаўшы ад першага месца ўсяго на два балы). Пасля ад'езду з Расіі Урэмавіч па ацэнцы Transfermarkt віртуальна патаннеў з 7 млн еўра да 4.

Дацкі правы вінгер Дрэер праявіў сябе ў «Андэрлехце», за які ў чэмпіянаце Бельгіі-2023/24 выбіў 19+9, а цяпер гуляе за амерыканскі «Сан-Дыега» ў MLS. Каманда ідзе другой у Заходняй канферэнцыі, Дрэер за 17 матчаў адзначыўся шэсць разоў.

Чарнагорскі левы вінгер Хакшабанавіч, якому пасля пачатку вайны стала не па сабе, транзітам праз шведскі «Юргордэн», шатландскі «Селтык» і англійскі «Сток Сіці» апынуўся ў «Мальмэ», за які ў 10 матчах чэмпіянату Швецыі-2025 выніковых дзеянняў не зрабіў. Ацэнка гульца на Transfermarkt прасела з 5,5 мільёнаў еўра часоў «Рубіна» да сённяшніх 2,5.

А вось паўднёвакарэйскі цэнтральны паўабаронца Хван пасля ад'езду з Расіі падаражэй у пяць разоў – да 10 віртульных мільёнаў еўра. Сёлета ён прабіўся з нідэрландскім «Феенордам» у плэй-оф Лігі чэмпіёнаў (каманду пасля перамогі над «Міланам» спыніў «Інтэр»), а да таго паспеў засвяціцца ў «Сеуле» (Паўднёвая Карэя), «Алімпіякосе» (Грэцыя) і «Црвене Звездзе» (Сербія).

Ну а левы вінгер Кварацхелія спярша стаў чэмпіёнам Італіі з «Напалі», прычым зрабіў вырашальны ўнёсак у трыумф каманды, а ў студзені гэтага года за 70 мільёнаў еўра перабраўся ў «ПСЖ». Золата чэмпіяната Францыі было абавязковай праграмай, але ж з парыжанамі грузін скарыў яшчэ і Лігу чэмпіёнаў.

Цікава, ці помніць яшчэ гэты «кадр» пра Лісаковіча?

Фота: прэс-службы «Рубіна» і зборнай Беларусі, Інстаграм Хвічы Кварацхеліі.