Расіянін-ветэран з «Дынама» паставіў рэкорд КХЛ: за Мінск узяў толькі 8% ад 1000, раней шкодзіў Беларусі на хатнім ЧС

38-гадовы расійскі форвард мінскага «Дынама» Вадзім Шыпачоў у матчы з «Адміралам» (2:1) набраў свой 1000-ы бал у КХЛ – такім чынам ён стаў першым гульцом лігі, хто дасягнуў гэтай адзнакі. У Беларусі ён выступае толькі другі год, затое раней рэгулярна адзначаўся ў матчах з «Дынама» і нават закідваў у браму зборнай Беларусі на чэмпіянаце свету-2014. Расказваем пра беларускія акалічнасці шляху да гістарычнага дасягнення на «Мінск-Арэне».

Асістаў за кар’еру Шыпачова ў КХЛ набралася ажно 686, а вось шайб толькі 314. Якраз перадачамі ён і дагнаў свой паказнік балаў да фантастычнай круглай лічбы.

Папярэдні, 999-ы, пункт ён аформіў 6 студзеня гэтага года ў матчы з ЦСКА (2:4), калі асіставаў Сяргею Кузнецову на першы гол мінчукоў (адзнака 4:32).

То быў 1100-ы матч Шыпачова ў КХЛ – таксама з запасам рэкорд яшчэ з 2024-га, які цяпер проста прайшоў новы круглы парог.

Расіянін мог аформіць з ЦСКА два юбілеі і нават пачаў святкаваць кур’ёзны асіст на Ягора Борыкава на старце трэцяга перыяду. Праўда, суддзі пазней выявілі, што беларус падфутболіў шайбу каньком, таму гол адмянілі. Па рэакцыі выглядае, што Борыкаў адразу здагадваўся, што шайбу скасуюць, а Шыпачоў пасля рашэння толькі пасмяўся на лаўцы запасных (адзнака 8:43).

Наступны матч быў для расіяніна ўжо не круглым, але таксама асаблівым. Гуляць выпала супраць «Поўначсталі» – каманды з яго роднага Чарапаўца, дзе пачынаў кар’еру.

Сама сустрэча скончылася паразай дынамаўцаў 3:4, а Шыпачоў балаў не набраў, хаця меў моманты. Напрыклад, вось так небяспечна кідаў з вострага кута.

ВІДЭА

Далей каманда вярнулася ў Мінск, перачакала цыклон Улі і выйшла на матч з «Адміралам». Цягам гульні Шыпачоў меў некалькі момантаў, але сам адзначыцца не змог, затое за 13 секунд да канца гульні пры ліку 1:1 забіў Вадзім Мароз, а галявую перадачу на яго аформіў якраз расіянін. На пляцоўку святкаваць дасягненне Шыпачова высыпала ўся каманда.

ВІДЭА

На «Мінск-Арэну» з такой нагоды вывялі адмысловы светлавы надпіс у гонар Шыпачова.

А ўжо пасля матча поўная арэна не разыходзіліся, каб паглядзець адмысловую цырымонію ўзнагароджаня. Форварду аддалі памятную шайбу, выкацілі стэнд з лічбай «1000» і далі ўзнагароду.

Фота: тэлеграм-канал «Дынама» Мінск

Таксама падрыхтавалі пярцёнак.

Фота: тэлеграм-канал «Дынама» Мінск

За Мінск Шыпачоў праводзіць свой другі – і далёка не самы выніковы – сезон: за 40 гульняў рэгуляркі-2025/26 набраў толькі 20 пунктаў (9+11), а цягам усяго дынамаўскага перыяду выбіў 80 балаў (25+55) – то бок 8% ад сваёй рэкорднай тысячы.

Пры гэтым, гуляючы за «Северсталь», СКА, «Ак Барс» і маскоўскае «Дынама», у матчах з Мінскам форвард закінуў 14 шайб і аформіў 21 асіст – 3,5% ад агульнага «намалоту». Пачатак яго кар’еры быў шчыльна звязаны з суперніцтвам з «Дынама». Па-першае, супраць мінчукоў ён правёў другую гульню ў КХЛ, а вось у наступнай супраць ЦСКА змог забіць. Ужо ў шостым сваім матчы ў лізе ён зноў сустрэўся з дынамаўцамі і тады аформіў свой першы асіст у турніры.

Рэкорды расіяніна і па матчах, і па пунктах наўпрост звязаныя з тым, што ён не здолеў замацавацца ў НХЛ. Была спроба ў сезоне-20187/18 прабіцца ў «Вегас» (дзе на той момант фармальна знаходзіўся, але не гуляў Міхаіл Грабоўскі), але адлучка з Расіі абмежавалася ўсяго 3 матчамі ў найлепшай лізе свету з адным голам. Наступны раз Шыпачоў выехаў з Радзімы ўжо ў Беларусь.

Фота: тэлеграм-канал «Дынама» Мінск

Пры гэтым Шыпачоў даволі стабільна выступаў за зборную сваёй краіны і браў з ёю золата і на Алімпіядзе, і на чэмпіянату свету. Сусветнае першынство ён выгуляў менавіта ў Мінску ў 2014-м. Тады беларусы маглі запомніць расіяніна праз перфоманс у матчы супраць нашай зборнай.

У той дзень Шыпачоў спачатку аформіў галявую на першы гол Расіі (адзнака 0:36)

А потым сам закінуў пераможную шайбу пасля вельмі прыгожага асіста партнёра (адзнака 1:27).

Сустрэча на «Мінск-Арэне» тады скончылася паразай беларусаў 1:2. Яны ўсё ж прайшлі ў плэй-оф, але вылецелі ў 1/4 фіналу ад Швецыі (2:3).