Залёт да «Рэала», асіст супраць найлепшай каманды турніра, фантастычныя 9,4 бала – чым запомніліся беларусы ў гэтай ЛЧ
Спрычыніліся да шэрагу рэкордаў.
Беларусы ў асноўным этапе Лігі чэмпіёнаў – на сёння вялікая рэдкасць. Да 2025-га апошнім з нашых у турніру засвяціўся Ілля Шкурын, гуляючы за кіеўскае «Дынама» (то быў сезон-2021/22), а яшчэ за год да таго з «Краснадарам» у групу ЛЧ выходзіў Аляксандр Мартыновіч.
Летась Мартыновіч прабіўся ў прэстыжны турнір у другі раз, а вось для яго партнёра па «Кайраце» Валера Грамыкі гэты досвед стаў першым у кар’еры.
Па выніках атрымалася не вельмі, але наўрад ці нехта ў казахстанскім клубе ўсур’ёз разлічваў на плей-оф. Алмацінцы скончылі розыгрыш на апошнім месцы сярод 36 удзельнікаў, набраўшы ўсяго 1 бал, але памятных момантаў і для беларускіх зборнікаў, і для самога клуба назбіралася нямала.
Узялі ўдзел у самым (псеўда-) халодным матчы і праляцелі рэкордныя 7000 км
Лёсаванне падкінула алмацінцам адразу тры топ-матчы: хатні з «Рэалам» (як і марыў Мартыновіч), і гасцявыя з «Арсеналам» і «Інтэрам». Таксама патрапіліся менш статусныя «Бруге», «Алімпіякос», «Капенгаген», «Пафас» і «Спортынг».
Фота: інстаграм-акаўнт «Кайрата»
Першы блін – партугальскі – выйшаў комам, хаця сама паездка на лісабонскі матч стала ўнікальнай. Алмацінцы ўвайшлі ў гісторыю, бо дабіраліся да месца сустрэчы за прыблізна 7000 кіламетраў – яшчэ ніхто так далёка ў Лізе чэмпіёнаў не ганяў.
Падчас 12-гадзіннага паралёту Мартыновіч і Грамыка глядзелі фільмы і серыялы.
Са «Спортынгам» беларусы правялі цэлы матч, але іх высілкаў не хапіла, каб пазбегнуць разгрому 1:4. Грамыка дык увогуле атрымаў найгоршую ацэнку ў камандзе паводле Sofascore (5,6).
Матч у 6-м туры – супраць «Алімпіякоса» (0:1) – таксама аказаўся замахам на рэкорд. Супернікі сустрэліся ў казахстанскай сталіцы Астане пры тэмпературы -21. Яшчэ ніколі ў ЛЧ не гулялі ў такі мароз, Але на практыцы арэну закрылі дахам, таму футбалісты бегалі ў лёгкі марозец.
Беларусы згулялі ў еўракубках пры рэкордным марозе. Хаця на стадыёне было не так ўжо і сувора
Самі беларусы пачалі ў запасе, але пасля першага тайму выпусцілі Грамыку, які зноў нічым асаблівым не адзначыўся.
З «Рэалам» Грамыка зарабіў пенальці (але не пашчасціла) і ледзь не пабываў на лаўцы суперніка
Фота: інстаграм-акаўнт «Кайрата»
Калі перад матчам з партугальцамі ўражвалі рэкордныя кіламетры, то з Мадрыдам – розніца ў віртуальным кошце складаў: футбалісты іспанскага клуба ацэньваліся ў 1,4 мільярда еўра, а казахстанскага – у 12,7 мільёна. Паводле Transfermarkt, гэта было самае няроўнае супрацьстаянне ў гісторыі турніру.
Адзін Кіліян Мбапэ, які ў выніку аформіў хет-трык у Казахстане, на той момант ацэньваўся парталам у 180 мільёнаў, а Мартыновіч (250 тысяч) і Грамыка (1,5 мільёна) разам каштавалі амаль у 103 разы менш.
На полі абышлося без сюпрызаў. «Кайрат» атрымаў 0:5, перфоманс Мартыновіча ў матчы ацанілі на 6,4, а Грамыкі – на 6,5.
Паўабаронца запомніўся яшчэ і тым, што ледзь не зарабіў пенальці: на 67-й хвіліне яго ў сваёй штрафной зачапіў Дані Себальяс, і арбітар было паказаў на белую пазнаку, але пасля персанальнага прагляда VAR усё ж такі перадумаў.
Беларус заработал пенальти с «Реалом» в ЛЧ, но судья за секунды передумал
Праз 10 пару хвілін Грамыка яшчэ і атрымаў сілавы прыём ад Арэльена Чуамені – беларускі футбаліст паляцеў на бегавыя дарожкі побач з гульцамі «Рэала». Так блізка да лаўкі каралеўскага клуба ён не быў ніколі.
Перфоманс Мартыновіча сярод цэнтрбэкаў не перабіў ніхто
Свой першы і адзіны бал «Кайрат» выпакутаваў у 3-м туры супраць «Пафаса». Тады ўжо на 4-й хвіліне алмацінцы аказаліся ў большасці пасля фола на прамую чырвоную, але перавагай не скарысталіся. Сустрэча скончылася 0:0 ды яшчэ і з большай колькасцю момантаў кіпрыётаў па xG.
Затое асабліва адзначыўся ў сустрэчы Мартыновіч, які атрымаў адзнаку 9,4 – такі перфоманс на агульным этапе, паводле, Sofascore, не выдаваў ніхто іншы з цэнтбэкаў. Беларус за поўны матч перамог у пяці адзінаборствах з дзевяці, здейсніў два перахопы і адзін адбор, і, галоўнае, зрабіў 104 дакладныя перадачы. Мапа пасоў легіянера ўражвае яшчэ больш, асабліва калі ўгледзецца, колькі з іх было зроблена наперад.
Скрыншот: Sofascore
Адзіны выніковы бал Грамыка набраў супраць найлепшай каманды турніру
У апошнім туры «Кайрат» ехаў на «Эмірэйтс», дзе мусіў сустрэцца з «Арсеналам» – адзінай камандай, якая да таго прайшла 7 тураў без страт у пунктах. Нават не вельмі матываваныя лонданцы абгулялі алмацінцаў 3:2, але важна іншае: свой першы бал у ЛЧ у той сустрэчы набраў Грамыка. У адрозненні ад Мартыновіча, ён не выйшаў у старце, а з’явіўся толькі на 59-й хвіліне – і на 90+4-й аформіў асіст.
***
Агулам беларусы правялі даволі добры (для гульцоў «Кайрата») розыгрыш ЛЧ. Мартыновіч капітаніў і сабраў 5 поўных матчаў без выніковых дзеянняў. Адну гульню прапусціў праз траўму, а ў іншых сядзеў на лаўцы, бо не паспеў набраць кандыцыі. Ветэран, дарэчы, атрымаў найлепшую сярэдную ацэнку ў камандзе сярод палявых гульцоў (7,1), стаў першым па дакладнасці і колькасці перадач, аддаў больш за ўсё паспяховых лангболаў, здзейсніў найбольш адбораў, стаў другім па перахопах і трэцім па вынасах.
Грамыка ж прыняў удзел ва ўсіх васьмі сустрэчах, але ў старце выйшаў шэсць разоў. Сярэдні час на полі – 67 хвілін. Sofascore ацаніў яго агульны выступ толькі на 6,53 балы, што ёсць 13-м паказнікам у камандзе. Тым не менш паўабаронца стаў найлепшым сярод алмацінцаў па ключавых пасах і другім па колькасці ўдараў за матч.
На наступны дзень пасля сканчэння ЛЧ «Кайрат» афіцыйна абвясціў пра сыход беларуса, якім, паводле ўжо не надта свежых інсадаў, цікавіліся спачатку паўднёвакарэйскі «Сеул», а потым турэцкі «Газіянтэп». Апошнім часам яшчэ гавораць пра расійскі «Рубін».
Зрэшты, на фоне індвідуальных паказнікаў гульцоў топ-каманд статыстыка абодвух беларусаў даволі сціплая.
Нязгледзячы на апошняе месца і 1 бал у актыве, сезон для «Кайрата» выйшаў гісторычным і па эмоцыях (не варта забывацца і на перамогу ў нацыянальным чэмпіянаце), і па фінансах. За ўдзел у агульным этапе ЛЧ, адну нічыю і апошняе месца ў табліцы клуб мусіць атрымаць 19,596 мільёна еўра. Частку з грошай трэба перадаць на развіццё дзіцячага футбола, але сума ўсё адно агромністая. Як сказаў Мартыновіч, «як ні круці, мы зрабілі гісторыю».
Іншыя пасты карыстальніка
