«Дынама» вярнула з Расіі свайго «Пуёля»: там паўгода не гуляў, з Мінска таксама з’язджаў, не вытрымаўшы канкурэнцыі
Яшчэ больш укамплектаваў самую ўкамплектаваную пазіцыю.
У мінскае «Дынама» вярнуўся Максім Швяцоў. З 7 гадоў абаронца займалася ў акадэміі мінчукоў, прайшоў праз ліцэнзію, дубль і ўжо ў 17 дэбютаваў за аснову. Ён ніколі не едзіў у арэнды, паступова прабіваўся ў стартавы склад і дарос да капітанскай павязкі.
Апроч гэтага Швяцоў завітваў на фанацкі сектар. Словам, стаў улюбёнцам заўзятараў і дынамаўцам да мозгу касцей – казаў, што, калі і пакіне родную каманду, то толькі дзеля «кроку наперад ва ўсіх адносінах».
Швяцоў у 2015-м. Фота: інстаграм-акаўнт «Дынама» Мінск
Швяцоў браў чэмпіёнства-2023, але ў «залатым» сезоне меў няшмат гульнявога часу. Становішча не палепшылася і ў 2024-м – капітан пакінуў «Дынама» ў сярэдзіне таго сезона. Развітальны матч супраць БАТЭ – калісьці галоўнае супрацьстаянне белфутбола – «Пуёль з Чыжоўкі» (мінушка, якая прыліпла праз фрызуру) правёў на лаўцы, але ўсё адно атрымаў цёплае развітанне ў распранальні. Паводле інсайдаў «Трыбуны», футбаліста гойдалі на руках, а некаторыя партнёры тады нават пусцілі слязу.
Партнёры плакалі і гойдалі, клуб адпусціў за мізэрныя грошы. Як «Дынама» развітвалася з Швяцовым
Пры гэтым «крок наперад» ад самага пачатку выглядаў даволі сумнеўна. Швяцоў паехаў у валгаградскі «Ротар» – клуб Д2 Расіі без асаблівых беспректыў, які з 2005 года толькі раз падымаўся ў прэм’ер-лігу. У плане фінансаў цэнтрбэк таксама асабліва не здабыў: паводле звестак «Трыбуны», ён атрымліваў у расіян блізу 5 тысяч долараў на месяц. Прыкладна столькі ж праз стаўку зборніка меў у «Дынама», якое зарабіла на трансферы кэпа сімвалічныя 13 тысяч долараў.
Фота: афіцыйны сайт «Дынама» Мінск
Перспектыва пераезду ў Расію, якая на той момант ужо амаль паўтара года вяла захопніцкую вайну супраць Украіны, Швяцова не збянтэжыла. Зрэшты, процьма беларусаў сёння гуляе ў мінорных і вышэйшай лігах Расіі, але кейс цэнтрбэка мае прыкметы ўнікальнасці. Ён быў рэдкім футбалістам «Дынама», які хадзіў на фан-сектар, – нямала людзей адтуль адправілася ваяваць за Украіну.
Пры гэтым усё ж варта зазначыць, што «Ротар» Швяцова медыйна не засвяціўся ў актыўных праваенных акцыях – не ўсім спартсменам з Беларусі так пашанцавала.
Затое атмасфера вайсковых помнікаў Валгаграда, звязаных з Другой сусветнай вайной, Швяцову аказалася даспадобы. Ён адчуў «антураж Сталінграда» праз Мамеў курган, скульптуру «Радзіма-маці» і мноства музееў. Футбаліст назваў усе гэта «вельмі цікавым». Уражвае і тое, што ў расійскім горадзе беларус натхніўся «вулачкамі даўніх часоў» і «старымі будынкамі», маўляў, пасля Мінску такая архітэктура «ў навінку». Толькі вось загваздка ў тым, што экс-Сталінград у 1940-я быў цалкам знішчаны вайной, таму арыгінальных гістарычных вуліц там няма.
З «Ротарам» Швяцоў увайшоў у сезон-2024/25 гульцом асновы і трымаў гэты статус па сутнасці да канца розыгрышу. Была адна дыскваліфікацыя, пару матчаў на лаўцы, але агулам цэнтрбэк правёў нармалёвы сезон з 27 выхадамі на поле (толькі адзін не ў старце) за 34 туры.
Фота: афіцыйны сайт «Ротара»
Пры гэтым у зборную абаронца на роўным адрэзку не вярнуўся, а пасля і нагод клікаць яго туды не засталося. Сезон-2025/26 Швяцоў пачаў з ажно 15 тураў запар без гульнявой практыкі. Праблема была не ў траўме: легіянер проста прагуляў какурэнцыю пасля абнаўлення складу і трывала засеў у запас.
У матчы 16-га тура беларус у першым тайме тэрмінова замяніў партнёра, пасля чаго чатыры разы выйшаў у старце за пяць гульняў. Але тым не менш у паўзе паміж коламі чэмпіянату Швяцоў пакінуў «Ротар», які на сёння ідзе 7-м у чатырох пунктах ад зоны пераходных матчаў за павышэнне. У выніку за паўтара года ў Расіі атрымалася 34 гульні і 0+0 па «гол + пас».
Да таго, як вяртанне ў Мінск стала фактам, Швяцоў нібыта ўваходзіў у сферу інтарэсаў казахстанскага «Актабэ» і польскага «Пяста», але ж аказаўся там, дзе і пачынаў. Лёгкім у плане канкурэнцыі наступны (ужо 10-ы за мінчукоў) сезон не будзе. У камандзе сабраныя ўжо пяць профільных цэнтральных абаронцаў: 36-гадовы Аляксей Гаўлыловіч, 32-гадовы Раман Бегуноў, 24-гадовы Уладзіслаў Калінін, 28-гадовы навічок Аляксей Іваноў і, уласна, сам 27-гадовы Швяцоў.
І гэта прытым, што новы коўч мінчукоў Аляксандр Шагойка ў мінулым сезоне, працуючы з «МЛ», карыстаўся схемай выключна з двума цэнтрбэкамі ў складзе. Зрэшты, пра тое, якое бачанне спецыяліст збіраецца рэалізоўваць у «Дынама», мы хаця б прыкладна даведаемся 24 студзеня падчас спарынгу з «СКА-1938». Той жа Швяцоў, напрыклад, можа закрыць яшчэ і пазіцыю правага абаронцы.
Іншыя пасты карыстальніка
