«Славія» нясе найбольшыя страты з медалістаў ЧБ: Мазыр мяняюць на сталіцу і большыя грошы, а хто ж замест?
Усё менш «гульцоў Біёнчыка».
Бронза «Славіі» – адна з галоўных сенсацый чэмпіянату Беларусі па футболе-2025. Хіба што золата «МЛ» стала яшчэ большай неспадзяванкай. Мазырчукі заляцелі ў прызы ўпершыню за 25 гадоў, але паўтарыць поспех сёлета будзе вельмі складана: большасць ключавых футбалістаў пакінула клуб.
Глядзім, на што размянялі Мазыр лідары і кім там спрабуюць залатаць дзіркі.
Ёсць не вельмі важныя страты...
Усяго са «Славіяй» развіталіся ўжо дзевяць чалавек, але не ўсе сыходы выглядаюць крытычна. Яшчэ падчас сезона клуб пакінуў 25-гадовы Кірыл Кірыленка, які цяпер трэнуецца з «Тарпеда-БелАЗ», але яго паўторны заход у Мазыр адразу выглядаў авантурна і скончыўся канфліктам з патнёрамі.
У «Славіі» гульцу-скандалісту прыгразілі наваляць – Біёнчык гэта назваў «смакатой»
Ужо ў міжсезонне са «Славіі» сышлі 25-гадовы паўабаронца Сяргей Сазончык (ужо ўсплыў у «Арсенале») і 26-гадовы расіянін Уладзіслаў Давыдаў, які можа закрыць пазіцыі левага абаронцы і хаўбека.
Сяргей Сазончык. Фота: тэлеграм-канал «Славіі»
Сазончык у Мазыры быў з 2023-га і ў першых сваіх двух сезонах меў даволі шмат гульнявога часу, але летась саступіў у канкурэнцыі і правёў усяго 15 матчаў у чэмпіянаце (2+1 па «гол + пас») з шасцю выхадамі ў старце. Давыдаў жа далучыўся да каманды перад сезонам-2025, але таксама гуляў няшмат, хоць і стаў атрымліваць больш часу пад канец сезона. Усяго ён назбіраў 18 выхадаў у ЧБ пры адным асісце і сямі стартах.
Яшчэ адна, магчыма, самая незаўважная страта – сыход 27-гадовага Яраслава Макушынскага. Гульца, які можа закрыць той жа левы фланг, летам падпісалі з «Віцебска», але за другое кола ён атрымаў ад Івана Біёнчыка ўсяго два выхада на замену. Цяпер Макушынскі вярнуўся на поўнач краны.
Таксама «Славію» запланавана пакінуў 22-гадовы расійскі форвард Іван Гулько, якога бралі на кола ў арэнду з «Арэнбурга». Пачынаючы з 18-га тура, калі ён упершыню патрапіў у заяўку, Гулько правёў 11 гульняў (чатыры выхады ў старце), але выніковых балаў увогуле не займеў.
Вышэйзгаданыя сыходы наўрад ці значна паўплывалі на моц каманды Біёнчыка, але ёсць і іншыя – куды больш балючыя.
...а ёсць вельмі істотныя. Хто з лідараў сышоў і кім іх замянілі?
У «Славіі» Біёнчык мае поўную свабоду ў плане трансфераў (зрэшты, абмежаваную фінансавымі магчымасцямі), часам гульцы прыязджаюць у Мазыр менавіта дзеля трэнера. Не выпадкова ў камандзе-2025 сабаралася так шмат «футбалістаў Біёнчыка», якія працавалі з ім «Прамяні», «Дняпры» і «Гомелі».
Зрэшты, коўч скардзіцца, што заманіць, а потым яшчэ і ўтрымаць футбалістаў за амаль 300 кіламетраў ад Мінска даволі складана. Нават са стабільным (але далёка не касмічным) фінансаваннем ад мясцовага НПЗ і перспектывай патрапіць у еўракубкі (трэба, каб усё склалася ў Кубку або ў саміх мазырчукоў, або ў мінскага «Дынама» ці «МЛ») леташнія лідары масава выправіліся шукаць лепшай долі.
Сышоў: 27-гадовы кіпер Максім Плотнікаў.
З Біёнчыкам упершыню сустрэўся ў «Прамяні», а потым гуляў пры ім жа ў «Шахцёры». Агулам 59 матчаў разам. Летась Плотнікаў часам і памыляўся, але нарэшце правёў цэлы чэмпіянат стабільным нумарам адзін і ў прынцыпе ратаваў. Пасля такога сезона інсайдары адпраўлялі яго на роль бэкапа Паўла Паўлючэнкі ў «МЛ», але гулец абраў «Жэніс». Звычайна ў Казахстан едуць па грошы.
Заробак Максіма Плотнікава ў «Славіі» складаў каля 1,5 тысячы долараў да падаткаў
Фота: тэлеграм-канал «Славіі»
На замену: 30-гадовы Яўген Абрамовіч.
Выхаванец Жодзіна большую частку кар’еры правёў у «Тарпеда-БелАЗ» У сезонах-2023 і 2024 быў даволі цвёрдым першым нумарам. Яго статус змяніўся летась – толькі 15 матчаў з 12 прапушчанымі і 5 сухарамі. Цяпер Абрамовіч выглядае ўпэўненым фаварытам на ролю асноўнага ў «Славіі».
Сышоў: 25-гадовы паўабаронца Мікалай Іваноў
Яшчэ адзін чалавек Біёнчыка, які разам з ім вяртаў «Гомель» у «вышку». Сёлета дагуляўся ажно ажно да выкліку ў зборную.
За чэмпіянат выбіў 4+7 у 29 матчах і зімой паехаў у ташкенцкі «Лакаматыў». Цяпер заробкі ва ўзбекістанскім футболе абмежаваныя не лімітамі, а магчымасцямі клубаў, таму Іванова прывабіў варыянт нават з навічком Д1.
Беларусы едут в футбол постсоветской Азии все чаще – узнали, какие деньги их там привлекают
Фота: тэлеграм-канал «Славіі»
На замену: 27-гадовы Валер Сянько
Універсальны паўабаронца з дзяржынскага «Арсенала» выглядае заменай менавіта Іванову ў цэнтры, але можа згуляць і на флангах. У мінулым сезоне за беларускіх «кананіраў» правёў 23 матчы і аформіў 1+2. Зрэшты, Біёнчыку ён знаёмы яшчэ па таму ж «Прамяню».
Сышоў: 24-гадовы левы паўабаронца Уладзіслаў Полаз
Выхаванец мазырскай футбольнай школы таксама вялікі ўніверсал, але ў Біёнчыка найчасцей закрываў менавіта левы фланг. У мінулым сезоне не прапусціў ніводнага матча, прычым ва ўсіх выходзіў у старце. Стаўшы гэтай зімой свабодным агентам, перабраўся ў сталіцу, дзе будзе выступаць за «Дынама».
На замену: 23-гадовыя Аляксей Анцілеўскі і Кірыл Чарнавок
Першы ў мінулым сезоне выступаў за «Гомель», але цэлае кола прапусціў праз разрыў «крыжоў». Калі ж аднавіўся, адразу стаў гульцом старту. За 13 матчаў выбіў 3+1. Часцей цягам кар’еры дзейнічаў справа, але яму добры знаёмы і левы фланг.
Таксама пазіцыю злева можа закрыць Чарнавок – адзіны, за каго «Славія» заплаціла гэтай зімой. У мінулым сезоне гульца бралі ў арэнду ў БАТЭ на другое кола, але той не надта ўражваў. Біёнчык пераважна выпускаў Чарнавока ў канцоўках, прычым некалькі разоў быў незадаволены яго дзеяннямі настолькі, што рабіў адваротную замену. Зрэшты, у перадапошнім туры вінгер атрымаў свой першы старт і аформіў галявую, а ў апошнім матчы сезона наогул забіў. За 11 гульняў Чарнавок, які найчасцей і падмяняў якраз Полаза, усё ж пераканаў Біёнчыка ў сваёй здатнасці.
Фота: тэлеграм-канал «Славіі»
Таксама клуб пакінулі 28-гадовы цэнтрбэк Аляксей Іваноў (знаёмы Біёнчыка па «Прамяні» і «Гомелі») і 34-гадовы ўкраінскі паўабронца Аляксандр Бацішчаў (гуляў пры трэнеры за «Дняпро» і «Гомель»), але ім прамой замену мазырчукі пакуль не знайшлі.
Іваноў у мінулым сезоне правёў 29 матчаў і быў адным з найлепшым цэнтральных абаронцаў лігі, а яшчэ вельмі ўражваў нетыповай для пазіцыі выніковасцю (7+1!) – дапамаглі тыя самыя кутнія з іншым Івановым.
Абаронца разам з Полазам перабраўся ў мінскае «Дынама», такім чынам гарантаваўшы сабе паездку на кваліфікацыю Лігі канферэнцый і жыццё ў сталіцы.
А вось матор і дырыжор «Славіі» Бацішчаў – адзіны, хто не паехаў ні за мяжу, ні ў каманду вышэй. Ён далучыўшы да «Тарпеда-БелАЗ», якое татальна перазбіраецца гэтай зімой.
Уже 1,5 месяца Политевич лепит состав в Жодино: много потерь, неожиданный успех, странная молодежь
Хто яшчэ можа прыйсці?
Афіцыйных падпісанняў у «Славіі» больш не было, але некаторыя гульцы, паводле інфармацыі інсайдара Сяргея Волкава, прыбылі на прагляд.
З камандай трэнуецца чэмпіён мінулага сезона ў складзе «МЛ» Цімур Пухаў. Расіянін з акадэміі ЦСКА гуляе на пазіцыі атакавалага паўабаронцы, але за ўвесь мінулы сезон толькі чатыры разы выйшаў на поле, прычым выключна на замену, і аформіў 1 асіст.
Фота: тэлеграм-канал «МЛ»
Праглядаюць у Мазыры і 20-гадовага Луку Згурскага – яшчэ аднаго гульца з футбольнай адукацыяй ЦСКА. Ён мае расійскі пашпарт, але нарадзіўся ва ўкраінскім Севастопалі яшчэ да таго, як Крым захапіла Расія. За аснову клуба пуцінскай арміі Згурскі ніколі не гуляў, а апошнія гады праводзіў у Казахстане. Сезон-2025 пачынаў у «Туране» з Віталём Жукоўскім, а сканчваў яго ў «Атырау» таксама пры беларускім спецыялісце. За 20 матчаў цэнтральны форвард, які можа згуляць і вінгера, забіў 3 мячы.
Яшчэ клуб можа папоўніць 29-гадовы ўніверсальны гулец атакі Яўген Шаўчэнка. У мінулым сезоне ён актыўна гуляў пры Вадзіму Скрыпчанку ў мінскім «Дынама», але з прыходам Аляксандра Паўлава патрапіў у глыбокі рэзерв. У выніку за ЧБ-2025 назбіраў 17 выхадаў на поле з 1+1.
Апроч гэтага «Славія» блізкая да таго, каб узяць у арэнду флангавага абаронцыу(Арсеня Агеева. 21-гадовы беларус належыць маскоўскаму «Лакаматыву», але другую палову сезона-2025 правёў у БАТЭ. За 15 матчаў там набраў ажно 2+5, прытым што да таго паўгода прасядзеў цалкам без гульнявой практыкі ў арэндзе ў «Тарпеда-БелАЗ». Спартыўны дырэктар барысаўцаў Дзяніс Сарсанія расказваў, што ў клубе хацелі пакінуць латэраля, гарантуючы таму адну з самых высокіх ставак у клубе, але гулец сам адмовіўся.
Іншыя пасты карыстальніка
