Раней БАТЭ забіраў гульцоў у іншых, цяпер – забіраюць у яго. Вось куды сыходзяць з Барысава па лепшае жыццё
Адзіная радасць – часам можна зарабіць.
Перад першым паўнавартасным трэнерскім сезонам з асновай БАТЭ Арцём Канцавы мае кардынальныя змены складу. Барысаўцы масава страчваюць гульцоў, у тым ліку выхаванцаў, якімі так хацеў гуляць Андрэй Капскі. Што цікава, хапае такіх, хто пасля самага няўдалага сезону ў гісторыі Барысава ўжо атрымаў павышэнне або яшчэ спадзяецца яго атрымаць, адхіліўшы прапанову заняпалага клубу.
Глядзім, наколькі гэта балючыя страты для БАТЭ і куды ідуць з Барысава.
Пайшлі на павышэнне
Варта трымаць у галаве, што БАТЭ узору апошніх сезонаў – звычайны серадняк чэмпіянату Беларусі, да таго ж не вельмі стабільны на дыстанцыі. Сігналаў, што нешта кардынальна зменіцца ў гэтае міжсезонне, пакуль няма. Больш за тое, можа стаць нават горш – новыя правілы фінансавання штурхаюць клуб да пераходу пад рэжымнае кіраванне.
Может ли БАТЭ уйти под режимный исполком в Борисове? Зампред говорит, что вероятность большая
На гэтым фоне нават умоўны «Гомель» для футбалістаў выглядае цікавым варынтам. Калі ў Аляксандра Ануфрыева летам пераезд з Барысава сарваўся праз злітае відэа, то яго былым партнёрам на сёння нічога не замінае.
Так, гэтай зімой з БАТЭ ў «Гомель» перабраліся Віктар Сотнікаў і Павел Пашэвіч – іх прадставілі камплектам.
Фота: тэлеграм-канал «Гомеля»
24-гадовы Сотнікаў – не выхаванец БАТЭ, а «прадукт» салігорскай школы. Тым не менш за Барысаў ён паспеў правесці 66 матчаў (2+4), стаць капітанам у 2025-м і замацавацца ў новым амплуа: у 2023-м ён прыходзіў як цэнтрбэк, але цяпер усё часцей гуляе ў апорнай зоне. У мінулым сезона на яго рахунку 25 матчаў і 2 асісты – гэта адчувальная страта для БАТЭ.
Пашэвіч жа выхоўваўся ў Барысаве і ўсю кар’еру належаў клубу, але актыўна катаўся па арэндах. Напрыклад, у 2021-м правёў першае кола ЧБ у тым жа «Гомелі». Апошнія два сезоны правёў за экс-чэмпіёнаў, але актыўна гуляў толькі ў 2024-м. За чэмпіянат-2025 атрымаў толькі 7 выхадаў на поле і 1 асіст.
Яшчэ больш цікавая сітуацыя з 20-гадовым Вадзімам Кісялёвым. У мінулым сезоне форвард пераважна гуляў за дубль (8+4 у 22 сустрэчах), але і свяціўся ў аснове (1+0 за 11 матчаў).
Фота: тэлеграм-канал БАТЭ
Паводле тлумачэння спартдыра клуба Дзяніса Сарсаніі, Канцавы сказаў Кісялёву, што не можа гарантаваць гульнявы час налета, а таму прапанаваў шукаць арэнду ці новы клуб. І на гульца выйшла «Тарпеда-БелАЗ», якое мінулы сезон скончыла на 6-м месцы – то бок на чатыры радкі вышэй за БАТЭ. Відавочны крок наверх, а Сарсанія яшчэ кажа, што за выхаванца Барысаў нават атрымаў такія патрэбныя грошы.
Яшчэ адзін, каго БАТЭ аддаў не бясплатна, – 23-гадовы Кірыл Чарнавок. Другую частку мінулага сезона выхаванец брэсцкага футбола правёў у «Славіі», з якой цяпер падпісаў паўнавартасны кантракт. Сарсанія трансферам быў задаволены і казаў, што БАТЭ прадае футбаліста «са спакойнай душой», бо мазырчукі добра плацяць.
Дзеля «Іслачы» БАТЭ пакінуў 26-гадовы Аляксандр Свірэпа. Сарсанія дакладна не расказваў, ці хацелі захаваць гульца, але наўрад ці ад яго адмовіліся добраахвотна. Хаўбек з ухілам у абарону ў мінулым сезоне быў адным з лідараў, узяў удзел ва ўсіх матчах чэмпіянату (4+0) і часам выходзіў з капітанскай павязкай.
Каго зацелі захаваць, але не здолелі
Таксама барысаўцы прапаноўвалі новы кантракт 24-гадоваму выхаванцу Уладзіславу Русенчыку. У мінулым сезоне паўабаронца не часта выходзіў у страце, але агулам займеў 20 матчаў з 1+1. Нават з такой статысткай прапанова Барысава яму аказалася недаспадобы. Русенчык вырашыў стаць свабодным агентам і пашукаць новае месца.
Разлічвалі ў БАТЭ захаваць і Данілу Жульпу. 21-гадовы барысаўскі выхаванец, які раней гуляў за зборныя Беларусі U-19 і U-21, у мінулым сезоне выбіў 4+3 у 21 матчы.
Фота: тэлеграм-канал БАТЭ
Цяпер, паводле слоў Сарсаніі, футбаліст імкнецца знайсці клуб у Еўропе. Менавіта праз гэты імпэт Жульпа адхіліў прапанову, але пакуль застаецца свабодным агентам.
Таксама барысаўцы прыкладалі намаганні, каб захаваць свайго 21-гадовага выхаванца Арсеня Агеева. Беларус належыць маскоўскаму «Лакаматыву», але другую палову сезона-2025 правёў у БАТЭ. За 15 матчаў на пазіцыях правага і левага латэраля набраў ажно 2+5, прытым што да таго паўгода прасядзеў цалкам без гульнявой практыкі ў арэндзе ў «Тарпеда-БелАЗ». Сарсанія расказваў, што «Лакаматыў» браў на сябе поўную аплату заробку гульца падчас барысаўскага перыяду, але пасля змены кіраўніцтва ў расійскім клубе такія ўмовы і ўявіць немагчыма. БАТЭ быў гатовы сам плаціць Агееву, гарантуючы таму адну з самых высокіх ставак у клубе, але адмовіўся сам гулец. Зрэшты, і на зімнія зборы з «Лакаматывам», паводле афіцыйнай інфармацыі, беларус не паехаў.
Таксама клуб мусіць пакінуць 23-гадовы выхаванец Ягор Осіпаў. Афіцыйна пра гэты сыход дагэтуль не паведамілі, але Сарсанія адзначыў, што гэтая справа вырашаная на 100%. А яшчэ функцыянер дадаў, што перамовы (відаць, пра разрыў кантракта) ідуць «макімальна складана», бо ў футбаліста «нейкая крыўда на клуб» і «на ўсіх навакол». У мінулым сезоне ўніверсальны абаронца правёў за аснову ўсяго 10 матчаў (0+1), але і за дубль амаль не гуляў (толькі два матчы).
Некаторых захоўваць, магчыма, і не хацелі
Тут спіс максімальна кароткі: тыя, хто сышлі моўчкі, без каментароў Сарсаніі.
28-гадовы нараджэнец Шклова з расійскім пашпартам Мікалай Пруднікаў летась правёў на пазіцыі вінгера толькі сем безвыніковых матчаў, а потым траўмаваўся. Пры Канцавым ён не гуляў наогул.
Мікалай Пруднікаў. Фота: тэлеграм-канал БАТЭ
21-гадовы ўніверсальны абаронца Мацвей Свідзінскі ў 2025-м чаргаваў выступы за дубль і аснову. У «вышцы» ён з’явіўся на полі 12 разоў і аформіў 1 асіст, а ў Д2 правёў 10 безвыніковых матчаў. Пры Канцавым ён таксама амаль не меў часу ў першай камандзе.
Таксама клуб пакінуў 22-гадовы выхаванец Раман Пілецкі. Вінгер даволі актыўна гуляў пры Іване Мігале і за першае кола набраў 3+2, але ў Канцавога страціў месца ў старце і часам наогул выпадаў з заяўкі. Як вынік усяго пяць сустрэч за паўгода зусім без пунктаў. Пілецкаму ўжо даў кантракт «Дняпро», чыя трансферная кампанія выглядае куды больш бадзёрай, чым у барысаўцаў.
Іншыя пасты карыстальніка
