Такія розныя ўкраінцы: адзін не паціснуў рукі беларусам, другі ўзяў сабе рухі Кавалевіча – а ў 2022-м уцякаў ад акупантаў
Нечаканыя вынікі еўракубкаў.
Пасля пачатку вайны ва Украіне каманды адтуль сталі разводзіць ў еўракубках з клубамі з Беларусі, краіны-суагрэсара. Але некаторыя перасячэнні прадстаўнікоў дзвюх дзяржаў у міжнародным футболе ўсё ж ёсць. Прычым вельмі розныя. Узяць хоць другі раўнд цяперашняй кваліфікацыі Лігі канферэнцый – ён выклікаў заўважныя рэакцыі ў двух украінцаў, і адзін з іх наўрад ці зразумее іншага. А што здарылася і пра якіх футбалістаў гаворка?
Найлепшы брамнік УПЛ адрынуў рукі беларусаў – двойчы і па-рознаму
На згаданай стадыі жодзінскае «Тарпеда-БелАЗ» сустрэлася з ізраільскім «Макабі» з Хайфы, за які выступае 23-гадовы ўкраінскі брамнік Георгій Ермакоў. У двух матчах ён знайшоў два розныя спосабы пазбегнуць поціскаў рук беларусам ды іншым гульцам «аўтазаводцаў».
Падчас выхаду на пастраенне ў першай сустрэчы (1:1) Ермакоў размясціўся апошнім у шэрагу футбалістаў сваёй каманды – хаця агульнавядома, што брамнікі па традыцыі размяшчаюцца на другім месцы, адразу за капітанам (ну ці на першым, калі капітаняць самі) .
Для рукапацісканняў гульцы «Макабі» пайшлі насустрач тарпедаўцам – а ўкраінец у гэты момант адышоў у бок лаўкі запасных. На гэта са здзіўленнем звярнуў адзін з арбітраў матча, але Ермакоў проста пачакаў ды вярнуўся на поле, калі працэдура скончылася.
На пачатку другой сустрэчы (3:0 на карысць «Макабі») Ермакоў заняў стандартнае месца ў шэрагу. Тут ужо гульцы «Тарпеда-БелАЗ» ішлі насустрач футбалістам «Макабі». Украінец зрабіў невялічкі крок назад і праігнарваў усіх жодзінцаў. Iх капітан Сяргей Паліцевіч, здаецца, таму здзівіўся, але амаль усе астатнія тарпедаўцы нават не спрабавалі цягнуць руку ў бок кіпера.
Дагэтуль украінцы ў футболе не раз ігнаравалі расіян. Напрыклад, брамнік «Бенфікі» Анатоль Трубін у лістападзе 2024-га не паціснуў руку Аляксандру Галавіну, які выступае за «Манака» і ніяк не выказваўся пра вайну. А вось з беларускімі футбалістамі такое, бадай, здарылася ўпершыню – кейсы былі ў іншых відах спорту, у прыватнасці тэнісе.
Ермакоў – вядомы ва Украіне брамнік. Нарадзіўся ў Кіеве, дзе займаўся футболам у мясцовай ДЮШ-15, а пасля гуляў у структуры данецкага «Шахцёра», які ў той час базаваўся ўжо далёка ад захопленага расіянамі роднага горада. За аснову «гарнякоў» брамнік, зрэшты, не згуляў.
Першыя матчы на прафісійным узроўні Ермакоў правёў за «Александрыю» – дэбютаваў за каманду ў 21-гадовым узросце, у сезоне ўкраінскай прэм’ер-лігі-2023/24 правёў 8 гульняў (10 прапушчаных, 3 «сухары»). Летам 2024-га быў выкліканы на Алімпіяду, дзе, праўда, усе матчы правёў у запасе, а зборная Украіны не выйшла з групы.
Перад пачаткам сезона-2024/25 кіпер ацэньваўся Transfermarkt у 200 тысяч еўра. У той час ім зацікавіўся «Макабі» і выкупіў кантракт Ермакова за 100 тысяч еўра, пакінуўшы ў «Александрыі» на год у арэндзе. Атрымалася празорлівая купля – брамнік ва УПЛ-2024/25 правёў усе 30 матчаў, 15 з якіх – «на нуль», прапусціў усяго 22 мячы ды быў прызнаны найлепшым брамнікам лігі, а ацэначны кошт вырас да 2,5 мільёна еўра. Таксама Ермакоў трэніраваўся з першай зборнай Украіны ды гуляў за каманды U-23 ды U-21. З апошняй з’ездзіў на моладзевы Еўра, але там зноў прасядзеў у запасе.
Цяпер Ермакоў, згодна з дамовай, пераехаў у Хайфу, дзе цяпер лічыцца самым дарагім гульцом «Макабі». Адразу стаў асноўным, у матчах з «Тарпеда-БелАЗ» зрабіў 6 сэйваў.
Рухі Кавалевіча зайшлі хлопцу, чыю кар’еру перапыняў захоп горада расіянамі
24-гадовы ўкраінскі паўабаронца Андрэй Гаўрыленка не гуляў супраць «Нёмана» ў ЛК. Але яўна бачыў, як трэнер гродзенцаў Iгар Кавалевіч адсвяткаваў перамогу над «Кошыцамі» (3:2) – відэа з тым момантам адзначыла і славацкае тэлебачанне.
Да другога матча стадыі «Нёман» толькі трэніраваўся, а вось «Кошыцам» давялося згуляць у чэмпіянаце Славакіі з «Жэлязярнэ». I гэты клуб перамог 3:1 – а адкрыў лік згаданы Гаўрыленка, пасля чаго паўтарыў рухі Кавалевіча. Атрымалася, можа, не ідэальна, але падобна.
Ураджэнец Запарожжа Гаўрыленка ў Славакіі з ліпеня 2022-га. А да гэтага, не прабіўшыся ў «Металургу» са свайго гораду, з кастрычніку 2019-га гуляў за іншы ўкраінскі клуб – «Энергію» з Новай Кахоўкі. У сезоне-2021/22 каманда выступала ў Д3, у лютым у сваёй Херсонскай вобласці рыхтавалася да другой часткі сезону. Але тут жыццё перакроілі расійскі войскі – яны захапілі значную частку вобласці, у тым ліку Новую Кахоўку.
Клуб фактычна адразу спыніў існаванне – яшчэ выплаціў футбалістам заробак за наступны месяц, але пасля сканаў і дэ-юрэ. Хатні стадыён «Энергіі» да пары быў цэлы, але 6 чэрвеня 2023-га расійскія войскі падарвалі Кахоўскую гідраэлектрастанцыю. Гэта прывяло да гуманітарнай и экалагічнай катастрофы, а арэна аказалася затопленая.
Не мясцовыя гульцы пакінулі горад у першыя дні пасля захопу – тады яшчэ была магчымасць выехаць на кантраляваныя Украінай тэрыторыі. Так кар’ера Гаўрыленкі на некалькі месяцаў перарвалася. Але ён неяк змог выехаць з Радзімы ды працягнуць за мяжой.
Цяпер жа ўкраінец, якога вось так зачапіла вайной, скапіраваў танец адэпта Лукашэнкі – памагатага ў вайне. Дарэчы, ніякіх выказванняў на яе конт у сацсетках Гаўрыленкі мы не пабачылі.
Фота: прэс-службы «Александрыі» і «Жэлязярнэ»; Мілан Стэфанік.
Іншыя пасты карыстальніка
