У Шкурына – складаны адрэзак: у Казастан не рызыкнуў ехаць, у Шатландыю не змог праз пашпарт, у Беларусі пагражаюць штрафы
Ды яшчэ праз канкурэнцыю выпаў з асновы.
22 жніўня «Легія» Іллі Шкурына перамагла ў першым матчы плэй-оф кваліфікацыі Лігі канферэнцый шатландскі «Хіберніян» 2:1, праўда, без дапамогі Іллі Шкурына. Беларускі форвард не мае ніякіх праблем са здароўем, але зноў не паляцеў на гасцявую гульню еўракубка. У чым праблема на гэты раз?
У гэтым сезоне Шкурын ужо прапускаў выязны матч – падчас 1-га раўнда кваліфікацыі Лігі Еўропы супраць «Актабэ» не адправіўся з камандай у Казахстан, каб пазбегнуць рызыкі выдачы лукашэнкаўскім уладам. Гэтым разам праблема аказалася ў пашпарце, а дакладней – у яго адстунасці.
На тэрыторыі Шатландыі футбаліст знаходзіўся б у бяспецы. Але прэс-служба «Легіі» заявіла, што Шкурын не можа туды адправіцца праз «немагчымасць атрымання візы ў Вялікабрытанію для грамадзян Беларусі ў такія кароткія тэрміны». Пазней дырэктарка па маркетынгу Аляксандра Каліноўска ўдакладніла, што «сітуацыя Іллі з дакументамі, па якіх ён падарожнічае, нестандартная». Яна запэўніла, што клуб зрабіў усё магчымае, але беларус усё ж застаўся без візы.
Партал legia.net даў інсайд, што спецыфіка сітуацыі палягае ў тым, што Шкурын перасоўваецца па свеце па польскім праязным дакуменце, бо тэрмін дзеяння яго беларускага пашпарту скончыўся. У польскі праязны дакумент атрымаць вялікабрытанскую візу магчыма, але гэтая працэдура вымагае большых тэрмінаў, чым калі гаворка вядзецца пра пашпарт. Выглядае, што кожны выезд за межы ЕС – а Вялікабрытанія не ўваходзіць у Шэнген – для форварда будзе праблемным.
Шкурын, якога рэжым за выказванне грамадзянскай пазіцыі хацеў забраць на тэрміновую службу ў армію, не можа змяніць пратэрмінаваны пашпарт, як і шмат хто з суайчыннікаў, якія пакінулі Радзіму праз палітычны пераслед. Пры вяртанні ў Беларусь Шкурыну пагражае затрыманне з палітычных матываў, а рэжымныя амбасады і консульствы за мяжой больш не займаюцца выдачай новых пашпартоў, каб ускладніць жыццё палітычным эмігрантам.
Пры гэтым праваабаронцы звярнулі ўвагу на тое, што беларусы, якія змушана выехалі за мяжу, у апошнія тыдні сталі атрымліваць лісты па месцы прапіскі ў Беларусі, у якіх ім пагражаць адміністрацыйнай адказнасцю за пражыванне без дакументаў, якія засведчваюць асобу, або з пратэрмінаванымі дакументамі. Згодна з рэжымным заканадаўствам, за такое «парушэнне» можна атрымаць штраф да 4 базавых велічынь, прычым пакаранне можа накладацца неабмежаваную колькасць разоў.
За дзень да матчу «Легіі» ў Шатландыі гулялі іншыя беларускія футбалісты. З Казахстана, куды не рызыкнуў ехаць Шкурын, прыляцеў «Кайрат» Аляксандра Мартыновіча І Валера Грамыкі, каб сустрэцца з «Селтыкам» у раўндзе плэй-оф кваліфікацыі Лігі чэмпіёнаў. Гульцы зборнай Беларусі падаваліся на вялікабрытанскую візу загадзя, яшчэ да матчу ў адказ са «Слованам» у 3-м раўндзе кваліфікацыі – і атрымалі яе. Праўда, у дзейныя беларускія пашпарты.
Відавочна, што віза для беларусаў была дадатковым клопатам клубнаму менеджменту.
«Наша футбольная асацыяцыя і міністэрства спорту і турызму Казахстана прарабілі вялікую працу. УЕФА таксама трымаў гэтую сітуацыю на кантролі», – казаў пасля спартыўный дырэктар «Кайрата» Аскар Есімаў.
Раявіч і Шкурын.
Калі б Шкурын і паехаў у Шатландыю, то наўрад ці выйшаў бы ў старце. Апошнім часам беларус прайграе канкурэнцыю 32-гадоваму камерунцу Жан-П’еру Нсамэ і 26-гадоваму датчаніну Мілету Раявічу. За апошнія 4 матчы беларускі легіянер ніводнага разу не з’явіўся на полі з першых хвілін і агулам згуляў 37 хвілін, а апошні раз забіваў яшчэ ў сярэдзіне ліпеня.
Іншыя пасты карыстальніка
