Галоўны трэнер паставіў зборнай Беларусі шалёную задачу на адбор да ЧС – і гэта калі яго форвардаў апанавала татальная немач
Гэты сезон будзе гістарычным – іначай ніяк.
На апошнім паседжанні выканкама Беларускай федэрацыі футболу Карлас Алос здзівіў – згодна са справаздачай на сайце АБФФ, сам паставіў задачу зборнай выйсці ў плэй-оф кваліфікацыі чэмпіянату свету. Каманда ніколі не мела такога выніку, нават у тыя часы, калі яе склад быў куды больш сур’ёзным. Натуральна, у Доме футболу памкненне іспанскага спецыяліста падтрымалі і зацвердзілі задачу быць не ніжэй за 2-е месца ў групе з Грэцыяй, Даніяй і Шатландыяй.
Каб дасягнуць такой мэты, мала не прагульваць – трэба перамагаць. Але ж перамог без галоў не бывае. І тут мы напэўна набліжаемся да болю Алоса, камандзе якога неўзабаве стартаваць у, так мовіць, гістарычным адборы (5 верасня гасцявая гульня з Грэцыяй, а 8-га ўмоўна хатняя супраць Шатландыі ў Венгрыі).
Для пачатку зірнем на свежы спіс нібыта форвардаў, якіх выклікалі на гэтыя матчы. Алос запрасіў у кэмп Юрыя Кавалёва («Балтыка»), Паўла Сядзько («Тарпеда-БелАЗ»), Германа Баркоўскага («Пяст»), Трафіма Мельнічэнку («Порту Б»), Яўгена Малашэвіча («Дынама» Мінск) і Рамана Пасевіча («Мура») – так, яны ўсе, як ні дзіўна, па заяўцы праходзяць «нападнікамі».
Але ж сярод вышэйпералічаных футбалістаў толькі два профільныя цэнтральныя форварды – Баркоўскі і Мельнічэнка. Кавалёва і Сядзько раней выклікалі ў зборную як паўабаронцаў, але цяпер, выглядае, «трансфармавалі» ў нападнікаў выключна для большай прапарцыйнасці заяўкі на сайце. Пры гэтым для Кавалёва профільная пазіцыя ў клубе – правы хаўбек ці правы вінгер, і ў Сядзько – такая ж сітуацыя.
Пасевіча Алос запрасіў пасля таго, як футбаліст згуляў усяго 75 хвілін у Славеніі. Там вінгер забіў, але да таго амаль месяц сядзеў без практыкі ў Расіі. Легіянер імкнуўся ў зборную праз Еўропу – і аператыўна змог ажыцявіць план. Нават «чорны спіс» не перашкодзіў.
Усяго пара страйкераў у складзе – гэта відавочна менш за норму. Да таго на матчы Лігі нацый Алос браў як мінімум тройку цэнтральных нападнікаў, а часам і чатыры. Квартэт здараўся, калі прыязджаў універсальны Дзмітрый Анцілеўскі.
Вось так паступаў Іспанец раней:
- На матчы супраць Балгарыі і Люксембурга ў верасні 2024-га ўзяў Анцілеўскага, Баркоўскага, Мельнічэнку плюс Яўгена Шыкаўку.
- На гульні з Люксембургам і Паўночнай Ірландыяй у кастрычніку даў магчымасць прыехаць Анцілеўскаму, Баркоўскаму і Шыкаўку.
- У лістападзе на Балгарыю і Паўночную Ірландыю запрасіў Віталя Лісаковіча, Анцілеўскага, Баркоўскага і Шыкаўку.
На тавырыскія матчы спачатку супраць Таджыкістана і Азербайджана, а потым Казахстана і Расіі Алос таксама не змяніў сваю традыцыю браць 3+ цэнтральных нападнікаў. А сярод новых асоб тады з’явіўся Арцём Шуманскі.
Цяпер жа «дзявятак» у ростэры Алоса будзе толькі дзве, прычым іх клубныя справы ідуць не найлепшым чынам.
23-гадовы Баркоўскі ўсе чатыры туры Эктракласы нязменна выходзіў у старце «Пяста» (канкурэнты былі траўмаваныя), але дагэтуль не набраў выніковых балаў. Зрэшты, каманда з Глівіцаў – адзіны калектыў, які яшчэ наогул не забіваў у гэтым сезоне лігі. «Пяст» набраў ўсяго 2 балы і цяпер займае 17-е месца ў чэмпіянаце (праўда, мае два матчы ў запасе).
18-гадовы Мельнічэнка таксама пакуль не забівае і не аддае, а бывае, што і не гуляе за дубль «Порту». 1-ы тур Д2 Партугаліі ён прасядзеў на лаўцы, у 2-м атрымаў 45 хвілін, а ў 3-м упершыню выйшаў у старце і правёў на полі ўвесь матч. Сваеасаблівы прагрэс, але ў пратаколе беларус адзначыўся пакуль толькі жоўтай карткай.
А што з тымі, хто наогул праляцеў міма заяўкі на першыя матчы адбору на ЧС?
Пра 32-гадовага Яўгена Шыкаўку, які панізіўся да польскага Д3, мы нядаўна распавялі. Беларус пакуль забіў за «Заглембе» толькі аднойчы, а яго каманда не адпавядае чаканням, ды і ў зборнай яго не факт, што хочуць.
28-гадовы Анцілеўскі доўга быў траўмаваны, а потым вярнуўся ў ЧБ дапамагаць «МЛ» даязджаць да «золата». Форвард паспеў двойчы безвыніковы выйсці на замену, пасля чаго зноў атрымаў пашкоджанне. Цяпер актыўна працуе над аднаўленнем.
27-гадовы Лісаковіч, у адрозненні ад іншых, забівае. Толькі не на прафесійным узроўні, а ў аматарскай лізе, бо пакуль не мае прананоў, якія прыйшліся бы даспадобы.
20-гадовы Арцём Шуманскі пакуль хоць і без выніковых балаў, але пачаў сезон у аснове ЦСКА. У параўнанні з мінулым сезонам – прагрэс. Праўда, ужо ў 3-м туры расійскай «вышкі» легіянер атрымаў траўму і вярнуўся на поле толькі 24 жніўня – збоная вырашыла пакуль абысціся без яго.
Калісьці Алос выклікаў і Уладзіслава Марозава. Форвард расказаваў, што атрымаў несур’ёзнае пашкоджанне падчас перадсезонннай падрыхтоўкі. Першыя два туры чэмпіянату Партугаліі 24-гадовы нападнік быў па-за зяўкай «Арокі», а ў 3-м туры ўвесь матч правёў на лаўцы. Зусім без гульнявой практыкі патрапіць у зборную складана, але чаго толькі ў Беларусі не бывае.
Нязгледзячы на слабыя адрэзкі ў тых, каго Алос прывык выклікаць у зборную, навідавоку быў іншы варыянт. Напрыклад, зноў не атрымаў шанцу 23-гадовы Аляксандр Шасцюк. Лідар снайперскай гонкі ў ЧБ-2025 мае ў актыве ўжо 14 галоў, а ў апошніх трох сутрэчах ён адзначыўся 4 разы. Але галоўны коўч зборнай пакуль ігнаруе страйкераў «Іслачы» і аддае перавагу выбіраць з тых, хто ў апошнія тыдні не можа забіць.
Можа, падняцца ў групе ўсё ж такі можна без галоў?..
Іншыя пасты карыстальніка
