Легіянер, які касячыў у БАТЭ, усплыў у Партугаліі – і стаў удзельнікам вяртання Маўрынью
Магчыма, нават таго насмяшыў.
Экс-абаронца «Энергетыка-БДУ» Абдукадыр Хусанаў распачаў другі сезон у «Манчэстэр Сіці», і ён падабаецца Пепу Гвардыёле.
А куды падзеўся той, хто з’ехаў з чэмпіянату Беларусі у топ-5 ліг ужо пасля Хусанава? Гаворка пра экс-абаронцу БАТЭ Сіндзі Банэ, які не заўсёды гуляў надзейна і на ўзроўні нашай лігі, але зацікавіў «Ланс».
Французскі клуб у выніку падпісаў футбаліста, заплаціўшы за яго каля 250 тысяч еўра паводле інфармацыі Transfermarkt.
Адразу зайсці ў аснову клуба Лігі 1 малады сенегалец не здолеў – і пачатак сезону-2024/25 правёў ажно ў Д5 Францыі ў складзе дубля «Ланса».
Бане после БАТЭ пока не очень – мог все-таки подняться в основу, но возникла проблема
Зімой Банэ вырашылі аддаць у арэнду за прыктыкай, але ў больш моцную лігу. У Д2 Францыі экс-абаронцу БАТЭ захацеў «Ансі», які і дамовіўся з «Лансам» пра паўгадавую арэнду.
На момант пераходу «Ансі» знаходзіўся на 5-м месцы ў Лізе 2 і вёў барацьбу за выхад у «вышку» – адставанне ад лідара складала ўсяго 4 балы.
У 19-м туры (сенегалец першы раз з’явіўся ў заяўцы) у гульні супраць «Труа» ў «Ансі» атрымалі пашкоджанні адразу два абаронцы – правы і цэнтральны. Банэ выйшаў на фланг, а каманда здабыла сухую перамогу 1:0.
З таго моманту за 14 тураў абаронца ўзяў удзел у 12 сустрэчах, у 11 з якіх выйшаў у старце. Дзве гульні выпалі праз дыскваліфікацыю, бо ў 25-м туры ў матчы супраць «Парыжа» (2:3) – будучага ўдзельніка Лігі 1 – легіянер атрымаў чырвоную картку за неахайную затрымку суперніка пры выхадзе сам-насам.
Пераважна Банэ гуляў усё ж цэнтрбэка, але па разе страхаваў і правы і левы фланг абароны. З сенегальцам у складзе «Ансі» правёў пяць сухіх матчаў. Сам футбаліст меў такія сярэднія лічбы за гульню (па Sofascore):
- Адзнака 6,76;
- 41,4 дотыкі;
- 79% дакладных перадач;
- 0,8 перахопа;
- 2,8 адборы;
- 60% выйграных адзінаборстваў.
- 4,6 вынасы.
У топ лігі хоць па якім паказніку Банэ не трапіў. Высокую лічбу для «Ансі» ён мае толькі ў вынасах (3-е месца), але гэта не адназначна станоўчы крытэрый – яго інтэрпрэтацыя вельмі залежыць ад гульнявой сітуацыі, падчас якой выносіцца мяч.
У любым выпадку за год Банэ спраграсэваў ад тады ўжо ўпадніцкага Барысава да каманды Д2 Францыі, якая да перадапошняга тура змагалася за падвышэнне. Мінулы чэмпіянат скончыўся для «Ансі» 6-м месцам з адставаннем у 4 пункты да 5-га радка, які дазваляў прыняць удзел у плэй-оф за праход у топ-дывізіён.
Летам у міжсезонне Банэ вярнуўся ў «Ланс», але за яго так і не дэбютаваў у афіцыйным матчы, бо перайшоў у «вышку» Партугаліі ў клуб «АВШ». Не так даўно гулец зборнай Беларусі Уладзіслаў Марозаў у Д1 Парутгаліі з дзвюх спроб замацавацца не здолеў, а вось сенегалец пакуль трымаецца.
«АВШ» мае самы танны паводле Transfermarkt склад у лізе і займае апошні, 18-ы, радок з 1 балам пасля 6 тураў. Першыя чатыры гульні сезону 21-гадовы Банэ правёў па-за заяўкай, а пасля ўсё ж дэбютаваў, выйшаўшы на замену на 25 хвілін у матчы 5-га тура супраць «Эштарыла» (1:3).
Першы матч экс-гульца БАТЭ у старце «АВШ» супаў з камбэкам Жазэ Маўрынью на пасаду галоўнага трэнера «Бенфікі». Перад матчам легендарны партугалец у распранальні выдаў матывацыйную прамову з лаянкай, у якой заклікаў футбалістаў проста «забіць» сваіх супернікаў.
Гаворка, вядома, вялася не пра гвалтоўныя дзеянні, а пра разгром – і лісабонскі клуб яго ўчыніў (3:0). Банэ правёў поўны матч і неахайным скачком з ударам локцем суперніка ў твар прывёз пенальці, пасля якога госці павялі 2:0.
У сацсетках таксама разляцеўся момант, як Маўрынью пажартаваў з дрэннай перадачы гульца «АВШ» і паспрабаваў на імгненне стаць брамнікам.
Пас ішоў якраз з правага фланга, дзе і гуляў Банэ, але, на жаль, паўтор не дае разуменне, хто зрабіў такі няўдалы перавод.
За матч сенегальскі дэф атрымаў найгоршую адзнаку ў камандзе (5,6 па Sofascore) і з таго моманту яго клуб больш пакуль не гуляў.
Хоць і ў БАТЭ замежніка дазваляў сабе недарэчныя памылкі, але ўсё ж гуляе ў вельмі моцнай еўрапейскай лізе, якая займае на сёння 7-е месца ў рэйтынгу УЕФА. Нікога з беларусаў на такім узроўні сёння няма.
Пасля сыходу з БАТЭ Банэ «падаражэў» на 650 тысяч віртуальных еўра – на сёння ацэньваеца парталам Transfermarkt у 800 тысяч, што больш за сумарны кошт пяцёркі асноўных абаронцаў БАТЭ ў апошніх матчах. Зрэшты, гэта проста цікавыя лічбы, а вось колькі за Банэ плаціў «АВШ» – невядома.
Фота: прэс-службы БАТЭ, «АВШ» і «Ансі»
Іншыя пасты карыстальніка
