Годам без галоў Лапцеў на пару дзён пабіў свой «рэкорд» з даўніх часоў – вось як і дзе яго ставіў
Яму б заўжды гуляць з «Нафтанам».
4 кастрычніка «Нафтан» перамог «Гомель» 5:3, а іх матч стаў самым выніковым у ЧБ-2025. Першы мяч гасцей на 20-й хвіліне забіў 34-гадовы Дзяніс Лапцеў. Гол стаў 89-м для Лапцева ў чэмпіянаце Беларусі – на гэты момант 13-ы паказчык у гісторыі турніру.
Але галоўнае – так форвард перапыніў сваю «сухую» серыю, якая цягнулася крыху больш за год, 370 дзён. Доўгачаканы гол форвард аформіў у класічнай для сябе манеры: прабіў галавой знутры шрафной. Мяч заляцеў у левы кут брамы Аляксея Харытановіча.
«Нафтан» у прынцыпе з’яўляецца «любімым» клубам форварда: у 14 матчах з новапалачанамі ён забіў 9 мячоў. I так, свой папярэдні мяч 29 верасня 2024-га Лапцеў аформіў за «Тарпеда-БелАЗ» таксама «Нафтану» ў Наваполацку ўдарам галавой у браму Аляксея Харытановіча – праўда, у правы ад яго кут.
Пасля таго гола ў 23-м туры ЧБ-2024 Лапцеў з’яўляўся на полі ў сезоне-2024 яшчэ 5 разоў, але безвынікова. Зімой здарыўся трансфер у брэсцкае «Дынама», але форвард амаль не атрымліваў шанцаў пры Аляксандры Сяднёве: за 13 тураў ЧБ ён толькі восем разоў з’явіўся на полі (усяго двойчы ў старце). Ды і супраць «Нафтана» ў сакавiку 2025-га атрымаў 7 хвiлiн – ну куды такое варта!
Пасля першага круга «Дынама» захацела развітацца з Лапцевым, але не магло дамовіцца наконт кампенсацыі. У выніку форвард пару месяцаў проста не гуляў. Але ў сярэдзіне жніўня ўсё ж пакінуў клуб, а неўзабаве падпісаў кантракт з «Гомелем». Галоўны трэнер Андрэй Гараўцоў давярае форварду больш – з шасці матчаў футбалiст чатыры пачаў у старце. Але забіў не адразу – вось толькi цяпер.
Зрэшты, калі ўлiчваць толькi гульнявы час, то за год памiж галамi Лапцева прайшло роўна 600 хвілін, крыху менш за сем поўных матчаў. Выглядае ўжо зусiм не так страшна.
Але ўсё ж у абсалютным вымярэннi форвард крыху перасягнуў свой мiнулы безгалявы антырэкорд ў дарослым футболе. Ён складаў таксама трошкi больш за год – 366 дзён. I трымаўся з маладосцi футбалiста.
Лапцеў дэбютаваў у профi ў 19 гадоў – у 2010-м паўдзельнiчаў у 10 матчах «Славii» ў Д2. А ў 2011-м стаў гуляць рэгулярна – праўда, галоўны трэнер Юрый Малееў выключна на замену ў другiм тайме, часцей за ўсё пад самы канец. У якасці «джокера» Лапцеў забіў 4 мячы за 27 матчаў, у якiх сумарна атрымаў усяго 375 хвілін. Апошні гол тады здарыўся ў браму «Смаргоні» (2:0) ў 26-м туры, 22 кастрычнiка 2011-га.
«Славія» ў тым сезоне выйграла Д2 і паднялася ў Д1. Асноўны форвард каманды Раман Волкаў, які ў сезоне-2011 забіў 11 мячоў, застаўся галоўным выбарам у атаку і на «вышку». Лапцеў жа стаў гульцом дубля, якi з’явiўся ў клуба па факце падвышэння. В 2012-м за «моладзеўку» мазыран згуляў 17 матчаў ды забiў 8 мячоў.
Гэта не дапамагала прабiцца ў аснову. Калi Лапцеў i трапляў у заяўку, то звычайна сядзеў на «банцы». За ўвесь сезон-2012 ён атрымаў толькi шэсць выхадаў на поле за першую каманду – сумарна на 97 хвiлiн.
За такi таймінг форвард паспеў забіць толькi аднойчы. Гэта здарылася ў 28 туры ЧБ у матчы супраць «Тарпеда-БелАЗ» – 22 кастрычнiка 2011-га. Гол давяршыў камбэк – «Славiя» прайгравала 0:2, але ў вынiку здабыла пабеду 3:2.
Зноў жа, калi браць толькi час на полі, то Лапцеў у той адрэзак не забіваў усяго 78 хвілін – увогуле нічога страшнага.
У сезоне-2013 форвард ужо стаў сталым гульцом асноўнай абоймы «Славii» ў Д1 ды за 23 матчы сезона аформіў 9 галоў. З тых часоў і забіваў даволi рэгулярна – часта i двухзначную колькасць, але мiнiмум хоць некалькi разоў на год. Да 2024-га праблемай для Лапцева былi галы толькi за зборную Беларусi – там удалося адзначыцца ў 2023-м, з 31-й спробы.
Фота: прэс-службы «Гомеля» і «Славіі»
Іншыя пасты карыстальніка
