Новы трэнер у «Дняпры»: двойчы заставаўся ва Украіне без працы праз вайну, а яго зорны бацька топіць за Пуціна
Прыйшоў з каламутнай бразільскай акадэміі.
«Дняпро» працягвае перабудову трэнерскага штаба на фінішы сезона. Пасля гучнага расставання з Алегам Радушкам і прызначэння Яўгена Капава камнада выдала адрэзак з пасрэдныміі вынікамі – страціла першы радок у табліцы і сёння ўвогуле рызыкуе не трапіць наўпрост у вышэйшую лігу.
Яшчэ ў Магілёве прызначылі новага старшыню клуба, новага спартыўнага дырэктара, а таксама ўзялі ў штаб 37-гадовага Іллю Конанава, сына вядомага расійскага спецыяліста, які падтрымлівае Уладзіміра Пуціна.
Што адбываецца ў «Дняпры»
На пачатку верасня клуб афіцыйна разышоўся з Алегам Радушкам «па згодзе бакоў», абавязкі галоўнага прыняў Яўген Капаў – мясцовая легенда. Ужо 11 верасня яго зацвердзілі на пасадзе. Паралельна ў Беларускай федэрацыі футбола камітэт па статусе і пераходах разглядаў скаргі Радушкі і асістэнта Віталя Тарашчыка: «Дняпро» абавязалі пагасіць запазычанасці па заробках і кампенсацыям за арэнду жылля ў акрэсленыя тэрміны.
Радушку імкнуліся выжыць з Магілёва доўга – абразалі заробак, а трэнер бараніў свае правы. І ў яго нават нешта атрымлівалася. Пры гэтым з Радушкам каманда лідаравала ў чэмпіянаце з перавагай у тры пункты.
Калі ж змена адбылася, то вынікі заўважна праселі. 27 верасня «Дняпро» дома прагуляў «Мінску-2» 0:1, праз тыдзень у Лідзе саступіў 1:2, 11 кастрычніка нічога не змог зрабіць з гомельскім «Лакаматывам» (0:0). І толькі пару дзён таму магілёўцы на тоненькага адужалі «Слонім» з перадапошняга месца 2:1.
Пасля матчу ў Слоніме Капаў адкрыта сказаў: «Наш трэнерскі штаб якасцю гульні незадаволены».
У выніку «львы» страцілі лідарства, якое ўтрымлівалі з 8-га па 25-ы тур – наперад вырваліся «Баранавічы». Адставанне ад іх па выніках 29 тураў складае ўжо 5 пунктаў (65 супраць 60, а трэцяя «Белшына» мае 56). Да канца чэмпіянату застаецца пяць гульняў, у класе падвысяцца толькі першыя два месцы. Трэцяе будзе гуляць стыкі з 14-й камандай Д1.
Адначасова клуб перабудоўвае і «вертыкаль»: 22 верасня старшынём прызначылі Аляксандра Мароза (кантракт на год), а 29 верасня спартыўным дырэктарам стаў Ігар Анцыпаў, які займаў аналагічныя пасады ў «Мінску» і «Тарпеда-БелАЗ».
А што за трэнера ўзяў «Дняпро»?
17 кастрычніка ў Магілёве паведамілі, што ў трэнерскі штаб асноўнай каманды прыйшоў Ілля Конанаў – сын вядомага расійскага трэнера Алега Конанава, які значную частку гульнявой кар’еры правёў у Беларусі (у тым ліку ў «Дняпры» яшчэ за савецкім часам) і нават доўгі час меў беларускі пашпарт.
Конанаў-старэйшы як трэнер першасна зрабіў сабе імя ва ўкраінскіх «Карпатах», дзе працаваў у 2008-2011 гадах.
З ім каманда двойчы запар фінішавала пятай у чэмпіянаце і нават прабівалася ў еўракубкі. Конанаў не баяўся апрануць вышыванку і хутка стаў улюбёнцам трыбунаў. Фанаты нават заклікалі гарадскія ўлады прысвоіць нараджэнцу расійскага Курска званне ганаровага грамадзяніна Львова.
Пазней трэнер працаваў у Расіі на топ-узроўні («Краснадар», «Спартак»), а калі пачалося супрацьстаянне з Украінай, то, нягледзчы на ўкраінскі перыяд, неаднаразова выказваў падтрымку расійскаму дыктатару. Самы нашумелы выпадак адбыўся у кастрычніку 2017-га, калі Алег Конанаў выклаў у сацсеткі фота ў майцы з партрэтам Уладзіміра Пуціна на стадыёне ў Чачні. Такім чынам ён павіншаваў крамлёўскага правадыра з 65-годдзем.
Іллю Конанаву сёння 37. Ён нарадзіўся ў 1988-м у Магілёве, калі бацька выступаў за мясцовую каманду. Алег Конанаў сышоў з сям’і, калі сыну было пяць. Той у дзяцінстве паспрабаваў сябе ў фехтаванні, боксе, пяцібор’і, а да футбола дабраўся толькі ў 9. Прычым гэта не была бацькава ідэя – ён толькі падказаў добрага мясцовага трэнера.
Спачатку сын футбаліста хадзіў у школу «Хімвалакно», потым у СДзЮШАР-7. У 14 аказаўся ў структуры мінскага СКВІЧа, на чале якога стаяў Анатоль Юрэвіч, а бацька ўжо быў там сярод памочнікаў. Але кар’еру Конанаў-малодшы не зрабіў – у 18 траўмаваў калена, а Конанаў-старэйшы жорстка сказаў, што калі гуляць, то толькі на сур’ёзным узроўні. Так апорны абаронца прыйшоў да рашэння скончыць.
Футбол цалкам мог застацца ў мінулым. Каб аплачваць навучанне, ужо былы спартсмен пайшоў працаваць на вагонабудаўнічы завод – і затрымаўся там амаль на год. «Праца складаная ў фізічным плане – лезеш пад вагон, усе гэтыя гайкі і балты», – згадваў ён той перыяд. А яшчэ расказваў, як дапамагаў роднаму дзядзьку, які зарабляў рамонтамі.
У 2013 годзе, напярэдадні расійскага ўварвання ў Крым, а таксама ў Данецкую і Луганскую вобласці Украіны, Ілля Конанаў ужо працаваў трэнерам – у Макееўцы ў структуры данецкага «Шахцёра», дзе займаўся з групамі 2002 і 2005 гадоў нараджэння. Пазней трэнер казаў, што яму «праз пачатак вайны давялося пакінуць працу». На сёння Макееўка і Данецк акупаваныя пуцінскімі войскамі.
Гэта не апошні падобны сюжэт у біяграфіі Конанава.
Далей быў беларускі адрэзак. З 2014-га па 2016-ы Ілля Конанаў згадваўся як дзіцячы трэнер БАТЭ, а ў 2019-м як супрацоўнік брэсцкага «Дынама». Успамінаючы той досвед, спецыяліст казаў, што галоўнай бядой была «адсутнасць інфраструктуры» – і, маўляў, гэтая праблема вельмі павольна вырашалася.
У жніўні 2020-га Конанаў-малодшы зноў аказаўся ва Украіне – стаў трэнерам-аналітыкам у «Марыупалі». Адказваў за поўны разбор супернікаў і падрыхтоўку відэа для гульцоў, «каб яны разумелі, што ідзе не так, і як гэта паправіць».
Конанаў-сын тады казаў, што разумее амаль усё па-ўкраінску – штаб «Марыупаля» амаль цалкам камунікаваў на ўкраінскай мове, і для трэнера-замежніка гэта не было праблемай.
Марыупаль акупаваны расіянамі з вясны 2022 года пасля вельмі жорсткіх баёў. Мясцовы клуб прыпыніў існаванне, а яго інфраструктура істотна пацярпела падчас нападу. Малодшы Конанаў на гэтую тэму ніяк не выказваўся, а проста пачаў працаваць у Расіі.
У лютым 2023-га растоўскі СКА з ФНЛ-2 прызначыў яго на пасаду старэйшага трэнера, дзе пратрымаўся да ліпеня 2024-га. Вядома, што ў «Дняпро» Ілля Конанаў прыйшоў, маючы апошнім месцам працы футбольную акадэмію ў бразільскай Акап’яры, якую стварала вельмі каламутная кампанія з беларускімі каранямі Blockchain Sports. У жніўні мы расказвалі пра крах гэтага праекта.
Беларусской академии в Бразилии, похоже, конец: продается имущество, звезды футбола выбивают деньги
Амаль адначасова з сынам працу атрымаў і яго бацька. 15 кастрычніка Алег Канонаў вярнуўся галоўным трэнерам у маскоўскае «Тарпеда», адкуль у жніўні гэтага года быў звольнены.
Уладзіслаў Радзімаў: «Вяртанне Конанава ў «Тарпеда» – клаyнада»
Новы кантракт разлічаны на два з паловай гады. У яго штаб вярнуўся беларус Павел Кірыльчык, які пасля сыходу Конанава нейкі час спрабаваў трэнаваць «Тарпеда» самастойна, але быў адпраўлены ў адстаўку 1 верасня.
Іншыя пасты карыстальніка
