Новы клуб Шкурына з ім перамагае часцей, чым «Легія» без яго – ужо і ў табліцы абышлі, а беларус дапамагае галамі ды не толькі
Трэнер, які не давяраў, ужо сам пазбавіўся даверу.
З моманту траснферу Іллі Шкурына з «Легіі» ў «Катавіцы» прайшло крыху менш за два месяцы. Здавалася б, тое быў пераход са складу лідараў, у якім не знайшлося месца, да аўтсайдараў у разліку на практыку. Але за кастрычнік сітуацыя павярнулася вельмі цікава – новая каманда Шкурына з яго дапамогай рванула ўверх так, што апярэдзіла папярэднюю! Раскажам падрабязней пра тое, што адбылося.
У пачатку восені беларускі форвард сышоў з «Легіі» на фоне недаверу ад прызначанага летам румынскага трэнера Эдварда Іарданеску. Пры ім каманда, якая мела праблемы з грашыма, знайшла сродкі на форвардаў: 26-гадовага Мілету Раявіча з Даніі набылі за рэкордныя для сябе 3 мільёны еўра, 32-гадовага харвата Антоніа Чолака лепшымі ўмовамі перахапілі ў «Гурніка». Да прыхода Чолака румын абіраў камерунца Жана-П’ера Нсамэ, але ён атрымаў цяжкую траўму (дагэтуль не аднавіўся).
Шкурына ж настолькі не бачылі ў складзе, што з вялікім дысконтам прадалі ў «Катавіцы». На развітанне Марцін Шчымчак з партала legia.net заявіў, што ў варшаўскім клубе форвард нібыта быў вядомы як «закрыты» і «бурклівы» чалавек, з якім «цяжка знайсці агульную мову».
На момант прыходу Шкурына «Катавіцы» мелі сем балаў за сем матчаў польскага Д1. У наступных чатырох сустрэчах лігі набралі толькі адзін бал, а беларус, тройчы выйшаўшы ў старце, нічым выніковым не адзначыўся. Але пасярод гэтага адрэзку каманда ў 1/32 Кубку Польшчы перамагла плоцкую «Віслу» (4:2 ДЧ), а форвард адкрыў лік у тым матчы, граматна размясціўшыся ў зоне паміж двума абаронцамі (відэа).
Далей была міжнародная паўза, а калі чэмпіянат вярнуўся, у старце на месцы адзінага форварда стаў выходзіць 31-гадовы славацкі форвард Адам Зрэлак. Шкурына ж выпускалі на замену пасля 60-й хвіліны. Але гэта аказалася эфектыўным ходам, каб беларус стаў зноў забіваць. Каманда ж пачала штампаваць перамогі.
17 кастрычніка ў 12-м туры Экстракласы супраць «Матора» (5:2) Шкурын аформіў дубль – першыя свае галы ў турніры ў траўня. Спачатку Ілля знайшоў зону паміж цэнтрбэкамі і пратыкнуў мяч міма кіпера (адзнака 3:13), а потым адкрыўся паміж левым і цэнтральным абаронцамі ды паклаў абводным ударам (адзнака 3:32).
У наступным матчы «Катавіцы» адолелі «Карону» – адзіны мяч быў забіты ўжо пры Шкурыны, які дапамог тым, што, адцягваючы ўвагу брамніка, трапна ўхіліўся з траекторыі (відэа).
Далей клуб перамог у Кубку. Супраць «Лодзі» (2:1) Шкурын правёў поўны матч і забіў пераможны мяч – па класічнай схеме: спачатку прэсінг, потым пошук свабоднай зоны і рэалізаваны выхад супраць брамніка (відэа). Так «Катавіцы» выйшлі ў 1/8 Кубка ўпершыню з сезона-2015/16.
31 кастрычніка ў Д1 «Катавіцы» на выездзе разграмілі 3:0 «Тэрмаліку». Тут Шкурын аформіў асіст на апошні гол – скрозь двух супернікаў у падзенні вывеў Эмана Маркавіча на «чысты мяч» (адзнака 3:37).
4+1 у дзевяці сустрэчах за «Катавіцы» – добрая статыстыка. Асабліва калі ўспомніць пра гульнявы час – у чатырох апошніх матчах Шкурын робіць выніковае дзеянне кожныя 42 хвіліны. Зрэлак тут відавочна саступае.
Усе мячы Шкурына досыць падобныя, што добра адлюстроўвае і стыль каманды. «Катавіцы» звычайна валодаюць мячом менш за суперніка (48,4% у сярэднім, 11-е месца ў Экстракласе), затое добра контратакуюць і эфектыўна прэсінгуюць. Беларус пры такой стылістыцы зноў атрымаў свае любімыя зоны і свабодную прастору ўперадзе. У «Легіі» такіх эпізодаў было значна менш, бо варшаўскі клуб часцей валодаў мячом і сутыкаўся з нізкім блокам суперніка.
Таксама важна, што Шкурын нарэшце пазбавіўся процьмы змарнаваных шанцаў. Калі ў мінулым сезоне ён не рэалізаваў ажно 20 буйных момантаў, што было найгоршым паказчыкам у Экстракласе, то цяпер за 14 тураў ён згубіў толькі 2 такія шанцы – абсалютна некрытычная лічба для форварда.
Ды і з партнёрамі, здаецца, знайшлося добрае паразуменне. У «Легіі» ў трансляцыі матчаў рэгулярна трапляла, як Шкурын махаў рукамі і закідаў галаву, калі рэагаваў на дзеянні калег – у «Катавіцах» такога яўна менш. А галоўны трэнер «Катавіцаў» Рафал Гурак сказаў, што чужыя апісанні Шкурына як вельмі закрытага чалавека цалкам неадпаведныя таму, што бачаць у клубе. Па словах Гурака, беларус шмат камунікуе з партнёрамі і задае нямала пытанняў штабу – і адно, і другое коўч лічыць вельмі важным для пазіцыі «дзявяткі».
Пасля ўдарнай другой паловы кастрычніка – чатыры пераможныя матчы з чатырох – у «Катавіцаў» пры Шкурыне стала сумарна пяць перамог. Разгром «Тэрмалікі» дазволіў клубу зафіксаваць 17 балаў пасля 14 матчаў Д1 ды падняцца на 10-ы радок табліцы. Апярэдзіўшы пры гэтым каго б вы думалі? Так, «Легію»! Канешне, тут трэба прызнаць, што ў яе 16 пунктаў пасля толькі 12 сустрэч. Але перад пачатакам сезона каманда збіраліся біцца за чэмпіёнства.
У цэлым у варшаўскага клуба ўсё сумна. Без Шкурына правялі ўжо 10 афіцыйных матчаў – і перамаглі толькі ў трох. Прычым за цэлы кастрычнік быў толькі адзін поспех – 2:1 у групе Лігі канферэнцый над данецкім «Шахцёрам» (матч, дарэчы, праходзіў у Польшчы, бо ўкраінцы гуляюць еўракубкі ў Кракаве). У Д1 варшавяне наогул набралі адно ачко за тры сустрэчы, а ў Кубку, які вясною ўзялі ў голам беларуса, пачалі з 1/16 фінала – і адразу вылецелі ад шчэцінскай «Пагоні» (1:2 ДЧ).
За шэсць кастрычніцкіх матчаў нічога не паказалі і тыя, каго ўзялі ў «Легію» на пазіцыю Шкурына. Перахоплены Чолак гуляў не так шмат, а рэкордна дарагі Раявіч праводзіў у сярэднім па 70 хвілін на поле, але гэтага не хапіла.
Пасля вылета з Кубка «Легія» не знайшла лепшага варыянту, чым звольніць Іарданеску – праз 4,5 месяца пасля прызначэння. Зрэшты, былі выпадкі, калі трэнер працаваў і менш на мінулых месцах.
«Катавіцы» ж у наступным туры згуляюць супраць «Пяста» Германа Баркоўскага, які ідзе на апошнім месцы ў лізе. Добрая нагода працягнуць серыю перамог да пяці матчаў запар.
Фота: «Катавіцы».
Іншыя пасты карыстальніка
