17-гадовы з Д2 можа паехаць у ЦСКА, а запаснога «Дынама» хоча чэмпіён Аўстрыі – сабралі разам ўвесь трансферны варушняк ЧБ
Ёсць і той, каго з «Радзімы» вяртаюць на Радзіму.
Сезон-2025 у чэмпіянаце Беларусі яшчэ не скончыўся, але чутак і інсайдаў ужо процьма. Больш за іншых пра будычыню прэвентыўна клапоціцца мінскае «Дынама», якое страціла чэмпіёнства. У клубе прабіваюць розныя варыянты ўзмацнення, а з некаторымі гульцамі на словах нават дамовіліся пра кантракт – пра гэта мы ўжо пісалі днямі.
Цэлы шэраг клубаў таксама стоўпіўся вакол 21-гадовага абаронцы «Славіі» Антона Лукашова. У дынамаўцаў тут будзе сур’ёзная канкурэнцыя.
Лидеры ЧБ и клубы из России хотят Лукашова. Кто это вообще такой?
Але на рынку хапае варушняка і без сталічнага клуба, хаця той таксама не перастае падкідаць новыя плёткі/інсайды. Расказваем, што абмяркоўваюць у белфутболе апошнім часам.
Макс Эбонг: з «Астаны» ў «МЛ»
Канкрэтнай інфармацыі па нараджэнцу Віцебска яшчэ няма, але прыкметы перамоў ёсць. Па-першае, у 26-гадовага паўабаронцы, які ў чэмпіянаце Казахстана-2025 аформіў 3+3 па «гол + пас», зімой скончыцца кантракт. Па-другое, яго ўжо не раз бачылі на матчах «МЛ» у канцы сезона. Ну і апошні аргумент – інтэрв’ю Аляксандра Шагойкі, які паміж радкоў пра ўнікальныя фінансавыя магчымасці «букмекераў» успомніў і пра патэнцыйны трансфер Эбонга. Магчыма, экс-коўч ведае больш, чым мы?
Арцём Канцавы: з «Радзімы» ў «МЛ»
Яшчэ адзін гулец зборнай Беларусі ў «МЛ»? Інсайдар Уладзіслаў Татур паведамляе, што такі варыянт сапраўды магчымы, і што 26-гадовы вінгер – адна з рэальных мэтаў «букмекераў» на наступнае акно. Што да статыстыкі, то сезон у Д2 Расіі яшчэ ідзе, і за маскоўскую «Радзіму» беларус набраў 2+5 за 17 матчаў, што не так ужо і мала.
Педра Ігар: з «Дынама» Мінск ў «Ацэлул»
Не толькі на ўваход, але і на выхад працуюць мінчукі. Нестабільны бразільскі вінгер то ледзь не прыб’е «Лудагорац» у Лізе чэмпіёнаў, то не выходзіць нават на замену ў ЧБ. У вышэйшай лізе-2025 сабраў усяго 15 з’яўленняў на полі і 3+1 па балах, а цяпер, паводле інфармацыі Мікіты Лычова, можа падацца ў Румынію. Там яго патэнцыйны новы клуб «Ацэлул» займае 7-е месца сярод 16 удзельнікаў Д1 і мае 24 балы пасля 17 тураў.
Міхаіл Гардзяйчук: з «Дынама» Брэст ў «Нёман»
Аляксандр Сяднёў цяпер далёка не заўсёды ставіць гульца ў старт, а фінальная частка сезона ў вінгера складаецца не вельмі. Зрэшты, ужо 36-гадовы Гардзяйчук усё яшчэ другі ў сваёй камандзе па «гол + пас» (8+6), а дасведчаных ветэранаў Ігар Кавалевіч вельмі любіць. «Дынама» кантракт з Міхаілам усё яшчэ не працягнула, а пра інтарэс «Нёмана» да гульца паведаміў тэлеграм-канал «Ухо».
Павел Сядзько: з «Тарпеда-БелАЗ» у Казахстан, ФНЛ, Кітай ці Паўднёвую Карэю
Паводле нашай інфармацыі, у жодзінцаў будзе шмат перастановак з акцэнтам на амаладжэнне, а інсайдар Татур паведамляе пра магчымы сыход 27-гадовы Сядзько, які ў лізе аформіў 9+2 за 25 гульняў. Набор варыянтаў – шырокі, праўда, выглядае, што не вельмі канкрэтны (Казахстан, Расія, Кітай, Паўночная Карэя). Пры гэтам перад пачаткам сезона-2025 паўабаронца казаў, што расійскі кірунак яму нецікавы.
Ясін Бара: з «Астраўца» ў «Нёман»
Нейкі час гэты 26-гадовы мараканскі вінгер гуляў за блізкую да рэжыму медыякаманду DMedia, потым выступаў за «Макслайн» у Д2, а сёлета перабраўся ў «Астравец», дзе набіў 10+6 за сезон першай лігі. Паводле інфармацыі партала bel.football, такі перфоманс зацікавіў праблемны «Нёман».
Ціта Ёрмі Джуніяр: з «Ліды» ў «Нёман»
Яшчэ адзін патэнцыйны навічок гродзенцаў паводле інфармацыі «Ухо» – адзін з найлепшых асістэнтаў першай лігі. 23-гадовы правы краёк з Ліберыі аформіў ужо 14 галявых ды сам забіў 6 за 31 выхад на поле ў Д2-2025. Да «Ліды» ён паўтара сезона гуляў за аўсатдар лігі «Слонім».
Ягор Моўчан: з «Дынама-2» у ЦСКА
Моўчану ўсяго 17, а ён стабільна гуляе за дубль «Дынама» ў Д2 (1+5 у 15 матчах) ды паспеў дэбютаваць за зборную Беларусі U-19. Таксама паўабаронца дапамагае галамі дынамаўскай камандзе U-19 у кваліфікацыі Юнацкай лігі УЕФА.
ЦСКА, паводле інфармацыі тэлеграм-канала «Ухо», збіраецца проста цяпер прапанаваць за трансфер прыблізна 150 тысяч еўра і ў выпадку згоды забраць гульца ў Маскву пасля сезона-2026, калі Моўчан будзе ўжо паўнагадовым.
Кірыл Цапянкоў: з «Дынама» Мінск у «Штурм»
Па інфармацыі football.by, 21-гадовага гульца ратацыі мінскага «Дынама» (18 матчаў у ЧБ-2025, 3+5), які пры гэтым ззяе ў моладзевай зборнай (6+2 у 10 матчах у 2025-м), за 200 тысяч долараў гатовы выкупіць чэмпіён Аўстрыі-2024. У новым сезоне мясцовай Бундэслігі «Штурм» ідзе на 5-м месцы з 22 баламі пасля 14 тураў (адстае ад лідара ўсяго на тры пункты і мае матч у запасе).
Таксама Цапянковым нібыта цікавіліся клубы Расіі, Турцыі, Даніі і Бельгіі, але крыніца сцвяржае, што трансфер у Аўстрыю ўжо амаль вырашаная справа.
Фота: «Радзіма», «Тарпеда-БелАЗ», «Дынама» Мінск, інстаграм-акаўнт titoeyormiejr.
Іншыя пасты карыстальніка
