Улетку Брэст набраў зорных гульцоў – вось што ў іх атрымалася з Сяднёвым
Нехта зачах, нехта гуляў ды не дапамагаў, абарона пераважыла атаку.
Летам брэсцкае «Дынама» было адной з найбольш актыўных каманд чэмпіянату Беларусі на трансферным рынку. Справа не толькі ў колькасці, але і ў патэнцыйнай якасці навічкоў: да калектыву далучыліся яшчэ нядаўна гульцы зборнай Беларусі, легіянер з досведам у РПЛ ды іншыя цікавыя выканаўцы.
А вось што атрымалася на практыцы.
Тэлеграм-канал «Дынама» Брэст
28-гадовы абаронца, які яшчэ ў 2023 і 2024 гадах актыўна выклікаўся ў зборную, падаўся ў Брэст пасля Д2 Расіі, дзе выступаў за саратаўскі «Сокал».
У дэбютных матчах на новым месцы разам з партнёрамі праваліўся ў Лізе канферэнцый (вылет ад чарнагорскай «Суцьескі» пасля 2:3 па суме двух матчаў). У вышэйшай лізе ў Юзэпчука 14 стартаў і адзін выхад на замену, за якія ён агулам правёў 1111 хвілін на полі – то бок 82% ад максімальна магчымага часу. Правы латэраль за кола таксама паспеў аформіць 2+1 па «гол + пас», а індэкс RuStat ацаніў яго на 182 пункты (7-е месца ў ЧБ сярод правых абаронцаў, якія правялі хаця б 1000 хвілін) – не выбітны, але даволі стабільны адрэзак гульца. Пры гэтым сам трансфер быў вельмі патрэбны камандзе.
У першай палове сезона на месцы Юзэпчука паспелі задзейнічаць чацвярых: Андрэй Рылач (7 выхадаў у страце) , Антон Шрамчанка (5) і нават Арцём Быкаў (2) з Мікітам Сцяпанавым (1). Калі для першага з іх пазіцыя яшчэ звыклая, то Быкаў, Шрамчанка і Сцяпанаў там пачуваюцца не надта камфортна. З прыходам Юзэпчука Сяднёў атрымаў цвердага нумара адзін, здольнага закрываць усё броўку і выконваць належны аб’ём, а Рылача перавялі на левы фланг, які раней займаў Уладзіслаў Васільеў – з лета ён гулец казахстанскага «Іртыша».
Сярод мінусаў футбаліста – даволі вузкі атакавалы арсенал. Часцей за ўсё падключэнні Юзэпчука наперад сканчваюцца простым прастрэлам ці падачай. Часта выступаючы латэралем, гулец ніколі не меў вялікіх выніковых лічбаў.
Тэлеграм-канал «Дынама» Брэст
29-гадовы абаронца хоць і назбіраў дзясятак матчаў за зборную, але ніколі не ездзіў туды рэгулярна. Апошні раз – у 2023-м. Наогул, пасля сыходу з Брэста ў 2020-м Паўлавец у сваім легіянерстве так і не змог знайсці клуб, дзе хаця б год стабільна меў гульнявы час (а спроб было ажно сем). Зрэшты, агенту футбаліста трэба аддаць належнае – геаграфія пераходаў пры сціплай статыстыцы ўражвае.
Кар’ера Паўлаўца ад сыходу да вяртання ў «Дынама»
Па вяртанні ў Беларусь Паўлавец, якога Аляксандр Сяднёў лічыў «яўным узмацненнем», адразу стаў асноўным: 12 сустрэч (0+1) за другое кола – усе ў старце. Цэнтрдэф прапусціў толькі два матчы праз пашкоджанне ды застаўся на лаўцы ў фінальным туры. У пераліку на хвіліны атрымалася 1034 – то бок 76% ад магчымага. Па RuStat Паўлавец далёка ад высокіх пазіцый – 18-ы ў лізе з паказчыкам 184 пункты, але ў топе ў прынцыпе няма нікога з дэфаў Брэста.
Калі браць не агульныя лічбыі за сезон, а толькі другую палову, з якой Паўлавец і далучыўся да каманды, то ніхто з яго калег па пазіцыі не мае лепшых тэхніка-тактычных паказнікаў. Зрэшты, і на полі ён выходзіў часцей за ўсіх цэнтрдэфаў нароўні з Дзянісам Паляковым.
Дарэчы, 35-гадовы Арцём Рахманаў, ад якога Сяднёў адмовіўся ў тым ліку дзеля Паўлаўца ды з прыцэлам на перспектыву, пасля падпісання з БАТЭ здаў па якасці гульні (яго індэкс RuStat упаў з 198 да 187).
На кароткім адрэзку можна сцвярджаць, што з падпісаннем Паўлаўца таксама не памыліліся.
Тэлеграм-канал «Дынама» Брэст
22-гадовага ўзбекінстанца падпісалі даволі позна, і свой дэбютны матч ён правёў толькі ў 22-м туры – да таго некалькі месяцаў сядзеў без кантракта пасля сыходу з «Акрона», клуба прэм’ер-лігі Расіі.
У першых трох гульнях Эсанаў выходзіў на замену на пазіцыю атакавалага паўабаронцы, а потым выбіў са старта Арцёма Быкава. Такім чынам праз гульнявы спад апошняга ў асноўны ўдарны трыкутнік да Міхаіла Гардзяйчука і Ягора Карцова увайшоў якраз Эсанаў. Ён у сярэднім больш за калегу-беларуса сустракаецца з мячом, якасней абвастрае і ў прыватнасці больш перадач скіроўвае ў штрафную, але па выніковых балаў набраў толькі два – выключна асістамі. Зрэшты, у Быкава пасля прыходу узбекінстанца наогул нулі і па галах, і па перадачах.
У выніку Эсанаў сабраў дзевяць выхадаў на поле на 573 хвіліны ў суме (то бок 70% ад магчымага часу), а па індэксе RuStat (177) заняў 18-е месца ў лізе ў сваім амплуа, крыху апярэдзіўшы таго ж Быкава (175, 22-е месца).
Тэлеграм-канал «Дынама» Брэст
26-гадовы Лісаковіч-сярэдні не былы зборнік і не гулец з досведам у прэм’ер-лізе Расіі, але сваім першым колам, якое правёў у «Мінску», уражваў: 15 матчаў без замен на пазіцыі цэнтральнага паўабаронцы, капітанская павязка ў апошніх трох турах і 4+3 па «гол + пас». Футбаліста ў такой форме захацелі ў Брэсце.
Пасля пераезду Лісаковіч не набраў ні бала. Затое атрымаў траўму, праз якую выпаў на шэсць тураў. Як вынік: восем выхадаў на поле за «Дынама» на 306 хвілін агулам – усяго 22% часу ад магчымага. Нават здаровым беларус атрымліваў мала шанцаў, бо на пазіцыі атакавалага пазабаронцы перавагу аддавалі ўсё таму ж Эсанаву, а ў цэнтры поля асноўнымі былі Іван Зянькоў і Ігар Канавалаваў. Яны трымалі гэты статус на профільнай пазіцыі Лісаковіча ўвесь сезон.
У выніковым рэйтынгу RuStat гулец аказаўся 14-м па пазіцыі (177), але гэта здарылася не дзякуючы брэсцкаму адрэзку.
***
Калі футбалісты, пра якіх мы распавялі вышэй, прыходзілі як патэнцыйныя лідары, то наступная група гульцоў была хутчэй на ўсялякі выпадак.
21-гадовага брамніка Арцёма Каратая бралі ў арэнду з мінскага «Дынама», відавочна, на ролю запаснога – ён у выніку і правёў усяго адзін матч.
Ад 20-гадовага Цімафея Мартынава, якога пазычылі ў «Арэнбурга» да канца года, магчыма, і чакалі большага, але ён безвынікова выйшаў на замену 10 разоў, атрымаўшы агулам усяго 163 хвіліны. Форвард дагэтуль не можа знайсці сябе пасля цяжкай траўмы і перыяду без практыкі ў Расіі.
28-гадовага сербскага паўабаронцу Філіпа Ёвіча забралі свабодным агентам пасля клуба «Напрэдак», дзе ён амаль не гуляў. У Брэсце сітуацыя паўтарылася: футбаліст балансаваў паміж лаўкай запасных і неўключэннем у заяўку, а поле безвынікова патаптаў 79 хвілін, якія разбіліся на пяць матчаў.
***
Не заўсёды Брэст можа задаволіць трансферныя пажаданні Сяднёва цалкам, але па нашай інфармацыі, усе пераходы ўзгадняюцца з галоўным трэнерам. На паперы коўч меў адзін з самым моцных складаў у лізе, але які з гэтага выхлап?
Тэлеграм-канал «Дынама» Брэст
Самае галоўнае – гэта балы. За першае кола «Дынама» набрала 27 пунктаў, пры гэтым забіўшы 26 мячоў. У другім – 24 пры ўсяго 16 (!) мячах. Выніковасць сціплая не тое, што для каманды з топ-4, а для лігі ў цэлым. Менш за апошнія 15 тураў з сябе выціснулі толькі «Смаргонь», «Арсенал», «Віцебск», «Слуцк» ды «Маладзечна» – пацёрка аўтсайдараў.
Калі па галах з гульні (18) у першым коле дынамаўцы ішлі на першым радку, то па выніках сезона апусціліся ажно на пятую пазіцыю. Таксама моцна праселі ўдары, галявыя моманты ды ў прынцыпе ўсе важныя паказнікі ў атацы. Дынамаўцы не толькі мала забіваюць, але і мала ствараюць.
Пры гэтым у абароне ў другім коле брастаўчане выглядалі больш надзейна і прапусцілі на чатыры мячы менш (17 супраць 13) – пэўны прагрэс, але дасягнуты ён коштам куды больш істотнага прасядання ў атацы.
У тым ліку за гэта Сяднёву прылятае ад заўзятараў – вялікіх крытыкаў і аматараў яркай гульні. А калі дадаць сюды праблемы ў распранальні і слабую інтэграцыю ў свой футбол лідара атакі Міхаіла Гардзяйчука, то ўпэўненасць у паспяховай брэсцкай будучыні спецыяліста падае.
Зрэшты, Сяднёва бралі пад доўгатэрміновы праект, таму ў планах і не было стварэння каманды за год. Падчас сезона-2025 коўч нават казаў, што перад Брэстам не стаіць задача патрапіць у топ-3, маўляў, трэба толькі «ў бліжэйшыя гады стварыць калектыў, які дасягае поспеху і выступае ў еўракубках». З максімальна размытай фармулёўкі можна дастаць хіба што жаданне выйсці хаця б у кваліфікацыю ЛК – гэта можна рэалізаваць толькі праз Кубак-2025/26. Там дынамаўцы працягваюць выступаць і ўжо выйшлі ў 1/4 фіналу.
Іншыя пасты карыстальніка
