Замецены белспорт: жанчыны з шуфлямі, трактар, каб дастаць аўто, «скачок веры» ў сумёт ды жаданне збораў
Аварыя ў Віцебску, спачуванні са Шры-Ланкі.
У Беларусь прыйшоў «Улі» – цыклон, што накрыў краіну 8-9 студзеня. Праз нашчадка «Хаўера» 13-гадовай даўніны быў аб’яўлены чырвоны ўзровень небяспекі. Нямала пацярпеў Мінск: раніцай 9 студзеня ў горадзе снежны покрыў ацэньваўся ў 35 см, а яшчэ быў моцны вецер.
Людзі з белспорту актыўна дзяліліся тым, як жывуць у непагадзь – мы паглядзелі, што яны рабілі.
Хтосьці наўпрост выйшаў прыбіраць снег. У «СКА-1938» гэта такая штогадовая фішка – чысціць поле, колькі б ні нападала.
Нават тое, што працаваць паставілі жанчын з былой «Зоркі-БДУ», не надта здзівіла.
Раздалі шуфлі і баскетбалістам «Мінска».
Заадно перанеслі гульню ЧБ «Мінск» – «Барысфен», што мусіла адбыцца 11 студзеня. Карцінка ў сацсетках намякае, што гэта таксама звязана менавіта з непагадзю.
Былі і асобныя прыклады. Ветэран «Іслачы» Алег Вераціла пайшоў пачысціць дарожкі вакол дома.
А вядоўца футбольнага ютуб-праекта «На банке» Міхаіл Кузьмянкоў адмыслова набыў шуфель, каб паўтары гадзіны чысціць ад снега прастору каля двух пад’ездаў сваёй пяціпавярхоўкі. Малады чалавек сказаў, што ў гэты момант думаў пра бабуляў і дзядуляў, якія жывуць у доме.
Прыйшлося папрацаваць і супрацоўнікам спартыўных аб’ектаў. На «Мінск-Арэне», напрыклад, брыгады працуюць ва «ўзмоцненным рэжыме». Добра яшчэ, што бліжэйшы хатні матч мінскага «Дынама» – толькі 12 студзеня.
На стадыён «Дынама» нават падключылі на прыборку снега «актыў» прарэжымнай партыі «Белая Русь» па Ленінскім раёне Мінска.
У Віцебску, дзе раніцай 9 студзеня фіксавалі 31 см снега, парвалася абалонка «дзмьмутага» футбольнага манежа. Праз гэта канструкцыя стала няўстойлівай, таму яе прыйдзецца цалкам спускаць. Трэнаванні ўнутры вымушана спынілі.
Шмат праблем было звязана з машынамі. Рэжымны кіраўнік беларускай федэрацыі барацьбы Алім Селімаў спачатку паказаў заснежаныя аўто, а потым – як ідзе да месца працы пешшу: прыпаркавацца паблізу было немагчыма з-за тых жа сумётаў.
Экс-футбаліст Мікалай Януш быў вымушаны размінацца расчысткай аўто перад хакеем, у які збіраўся гуляць.
Былая гімнастка Лаліта Мацкевіч вызваліла сваю машыну з дапамогай бацькі і трактара, на якім прыехаў дзядзька.
Іншая гімнастка, найлепшая для «НАК» спартменка краіны Аліна Гарнасько пра трактар толькі марыла.
Былы футбаліст Аляксандр Глеб з імпэтам расказваў жонцы, як праз гурбы не мог раз’ехацца з сустрэчнай машынай.
А жонка футбаліста Уладзіслава Клімовіча расказала, што ад’ехаць змагла, а вось прыпаркавацца па вяртанні – ужо не.
Але ў выніку дзве жонкі (яны ж маці з дачкой) проста станчылі на снезе.
Але гэта было не самае яскравае: футбаліст Кірыл Кірыленка «выбраў быць шчаслівым», для чаго папросту залез на плот ды зрабіў «скачок веры» ў сумёт.
Цікава было і гуляць з сабакамі ў такое надвор’е. Падзяліліся сваім досведам гулец «Мінска» Павел Назаранка ды жонка найлепшага бамбардзіра ЧБ-2025 Аляксандра Шасцюка, якая пакуль не паехала за ім у Сербію.
А таксама «сінхраністка» Васіліна Хандошка ды бягуха Руслана Раманоўская.
Футбаліст Алег Нікіфарэнка жа павёз катацца на санках cваю дачку, якой нядаўна споўніўся год.
І не толькі Кірыленка ды дачка Нікіфарэнкі радаваліся надвор’ю. З імі, напрыклад, дырэктар каманды «Інформ», якая ў 2025-м гуляла ў Д3, Уладзіслаў Хаванскі.
Ды жонка футбаліста Уладзіслава Марозава.
А былы футбаліст зборнай Беларусі і БАТЭ Дзмітрый Бага праз надвор’е ўвогуле захацеў на зборы. «Зараз бы сем [разоў] па 50 [метраў] прабегчыся, кросік хвілін 40, потым у футбол пагуляць. Пальцы змерзлыя, не можам мяч прыняць, пас аддаць – якая рамантыка!» – злавіў флэшбэк экс-гулец.
Хаця у «МЛ», у якога зборы акурат ёсць, на снег не пайшлі. «Пакуль вы актыўна махаеце шуфлямі ў дварах і на стаянках, нашы хлопцы не менш актыўна працуюць у трэнажорнай зале», – напісалі ў прэс-службе клуба.
Ну а хтосьці бачыць беларускі снег толькі праз сацсеткі. Дзінара Смольская цяпер трэнуецца ў славенскай Любляне, але падзялілася прысланым здымкам з дому.
Былы трэнер брамнікаў «Тарпеда-БелАЗ» Павел Часноўскі, які знаходзіцца ў ААЭ, перадаў цыклону «добрай раніцы».
А жонка трэнера брэсцкага «Дынама» Сяргея Кісляка хвалявалася за мінчан з цёплых пляжаў Шры-Ланкі – спачувала і хацела вывезці ўсіх на курорт.
Калі вы ўсё ж не на Шры-Ланцы, а аточаныя снегам, то беражыце сябе!
Іншыя пасты карыстальніка
