Як жа Кракаў святкаваў вяртанне ў экстракласу! Актыўнічаў і экс-брамнік БАТЭ, які атрымаў асаблівы знак пашаны

Кракаўская «Вісла» даўно ўжо гарантавала сабе вяртанне ў польскую эліту, але сезон закрыла толькі ў мінулую нядзелю. Хатні матч супраць «Пагоні» Седльцэ не меў турнірнага значэння, але быў цудоўнай падставай для заўзятараў гаспадароў, каб сабрацца, ды яшчэ з прыемнай нагоды. Яны за некалькі дзён да гульні раскупілі ўсе 33 тысячы квіткоў на стадыён імя Генрыка Рэймана – і сталі ўдзельнікамі маштабнага святкавання, якое працягвалася і па-за межамі арэны.

Галоўнае пачалося адразу пасля фінальнага свістка, які зафіксаваў перамогу «Віслы» 2:0, – горад патануў у дыме, песнях і бела-чырвона-сініх колерах.

Неўзабаве гульцы і трэнерскі штаб, а яшчэ прэзідэнт клуба Яраслаў Крулеўскі забраліся ў адкрыты аўтобус з надпісам «Jest pięknie» («Гэта цудоўна») і накіраваліся ў цэнтр Кракава, забіты людзьмі. Паводле мясцовых уладаў, на вуліцы выйшлі ад 50 да 60 тысяч чалавек. Кульмінацыяй адбылася на галоўнай плошчы, дзе каманда з’явілася на балконе Сукенніцаў (старажытны гандлёвы цэнтр, які з’яўляецца мясцовай славутасцю), і разам з заўзятарамі выканала «Jak długo na Wawelu» – неафіцыйны гімн клуба.

ВІДЭА

ВІДЭА

ВІДЭА

Для «Віслы» гэтае вяртанне стала вельмі эмацыйным – усё ж адзін з самых тытулаваных клубаў Польшчы правёў чатыры сезоны па-за элітай.

За «Віслу» выступае беларускі брамнік Антон Чычкан. Праўда, у гэтым сезоне ён правёў усяго адзін матч за аснову, ды і той не цалкам. Як раз у апошнім туры супраць «Пагоні» 30-гадовага легіянера выпусцілі ўсяго на пяць хвілін у канцоўцы. Ён замяніў асноўнага кіпера 20-гадовага Патрыка Лэткевіча.

Выглядае, гэта быў жэст павагі да дасведчанага беларуса, які застаецца ў клубе на другіх ролях, але дапамагае сваім досведам.

Больш у гэтым сезоне Чычкан гуляў за рэзервістаў «Віслы» ажно ў Д4 (10 матчаў, 14 прапушчаных мячой). Гэта не стала перашкодай для ўдзелу ў святкаванні.

Не абышлося і без непрыемных інцыдэнтаў. Польскія СМІ паведамілі, што падчас вечаровых гулянняў 11-гадовая дзяўчынка атрымала траўму галавы пасля выбуху петарды. Дзіця даставілі ў шпіталь, абставіны здарэння высвятляе паліцыя.