МАК рэкамендаваў зняць санкцыі з беларускіх спартсменаў. Хто першым пабег гэта рабіць

Пасля таго як 7 траўня МАК рэкамендаваў зняць абмежаванні з беларускіх спартсменаў і каманд, частка міжнародных федэрацый імгненна вырашыла, што спорт увогуле-то «па-за палітыкай».

Першымі на сігнал МАК адрэагавалі ў сучасным пяцібор’і. Міжнародная федэрацыя (UIPM) ужо 12 траўня зняла абмежаванні з беларусаў. У той жа дзень падцягнуўся World Boxing.

Не адстала і Міжнародная федэрацыя валейбола (FIVB). 13 траўня там вырашылі вярнуць беларускія зборныя на турніры пад сваёй эгідай – у тым ліку і ў пляжным валейболе ўсіх узростаў. Сусветная федэрацыя стральбы з лука (World Archery) і Міжнародная федэрацыя гімнастыкі (World Gymnastics) таксама хутка ўключыліся ў працэс – 17 і 18 траўня адпаведна ўсе санкцыі былі знятыя.

Варта адзначыць, што Еўрапейская канфедэрацыя валейбола (CEV) і Еўрапейская федэрацыя стральбы з лука пакуль публічна сваіх пазіцый не мянялі.

Зрэшты, знайшліся і тыя, у каго памяць аказалася крыху даўжэйшай за адну рэкамендацыю МАК. World Athletics заявіла, што захоўвае абмежаванні. Аналагічная пазіцыя ў Міжнароднай федэрацыі тэніса (ITF) і Міжнароднага саюза біятланістаў (IBU).

Хаця сама рэакцыя спартыўных арганізацый выглядае даволі паказальна. Аказалася, што шлях ад «жорсткай пазіцыі» да «спорт па-за палітыкай» займае прыкладна пяць дзён.