Французскі гросмайстар з-за траўмы шчыкалаткі гуляе шахматны турнір лежачы ў ложку

Другі этап Grand Chess Tour у Бухарэсце падарыў адну з самых дзіўных карцінак года ў шахматах. 22-гадовы французскі гросмайстар Алірэза Фіружа з-за траўмы шчыкалаткі цяпер гуляе партыі проста ў гасцінічным нумары. Прычым літаральна лежачы ў ложку.

Праблемы ў Фіружы пачаліся яшчэ на старце турніру. У першых трох турах француз зрабіў адну нічыю і двойчы прайграў, а на чацвёртую партыю супраць амерыканца Фабіяна Каруаны ўвогуле не выйшаў. Пазней арганізатары патлумачылі: шахматыст траўмаваў шчыкалатку. Як менавіта – не ўдакладняецца. Пасля кансультацыі з камандай Фіружа вырашыў не здымацца з турніру і працягнуць выступленне ў «спецыяльным пакоі» – калі супернікі пагодзяцца на такія ўмовы.

«Спецыяльным пакоем» аказаўся звычайны нумар у гатэлі. Першым пагадзіўся ўзбекістанец Жавахір Сіндараў – і партыя атрымалася максімальна сюррэалістычнай для турніру такога ўзроўню. Сіндараў сядзеў за дошкай у класічнай белай кашулі, а Фіруджа гуляў паўлежачы на ложку з нагой на падушках – у чорнай футболцы і ярка-чырвоных шортах.

Сустрэча завяршылася нічыёй. Сам француз пасля партыі заявіў, што адчувае боль, але мае намер працягваць турнір: «На шчасце, шахматы – такая гульня, дзе можна ляжаць у ложку».

Арганізатары Grand Chess Tour ужо ўзгадалі падобны выпадак з 1985 года. Тады брытанец Энтані Майлз з-за праблем са спінай гуляў турнір у Тылбургу проста на масажным стале. І ў выніку падзяліў першае месца. Так што ў Фіружы, магчыма, яшчэ не самы дзіўны шлях да камбэку.