Сусветны жаночы хакейны матч-2026 увайшоў у Кнігу рэкордаў Гінеса – Беларусь таксама ў гэтым рэкордзе

7 сакавіка ў Мінску на дзвюх пляцоўках «Алімпік-Арэны» прайшоў Сусветны жаночы хакейны матч (Global Girls Game). За дзень згулялі 18 каманд – дзевяць «Сініх» супраць дзевяці «Белых». Восем матчаў правялі ў фармаце 3х3 з удзелам юных хакеістак, а ў галоўнай гульні дня дзяўчаты выйшлі на лёд у класічным фармаце 5х5. Вынік усяго гульнявога дня – 45:36 на карысць «Сініх».

Для Беларусі гэта ўжо звыклая гісторыя – такі матч праводзяць з 2022 года. Але цяпер ён атрымаўся самым масавым: на лёд выйшлі 239 удзельніц – гэта рэкорд.

Само сабой, не абышлося без так званага сенатар Баскава, які ўдзельнічаў ва ўзнагароджанні. Там жа прысутнічалі цяперашні старшыня ФХБ Багдановіч, два яго намеснікі і гендыр мінскага «Дынама» Каркоцкі.

Што гэта ўвогуле за матч

Global Girls Game – гэта штогадовая ініцыятыва IIHF, якая павінна прыцягваць дзяўчат у хакей. У розных краінах праходзяць свае гульні, але фармальна гэта адзін матч: усе вынікі проста складаюцца. У 2026-м такіх пляцовак было 43 – ад Японіі і Філіпінаў да Партугаліі, Новай Зеландыі і Паўднёвай Афрыкі. У спісе ёсць Беларусь і Літва. Менавіта за гэта фармат і трапіў у Кнігу рэкордаў Гінеса – як матч з найбольшай колькасцю краін-гаспадароў. Па агульнай суме ўсіх гульняў перамаглі «Белыя» – 361:289.

Вось як гэта пракаментаваў прэзідэнт IIHF Люк Тардыф:

«Гэта дасягненне адлюстроўвае шматгадовую прыхільнасць развіццю жаночага хакея на ўсіх узроўнях, ад аматарскіх праграм да міжнародных спаборніцтваў. Сусветны жаночы матч працягвае служыць моцнай платформай для натхнення маладых спартсменак і ўмацавання сусветнай хакейнай супольнасці».

Калі без пратакольных фармулёвак – ідэя простая: калі гуляюць дзясяткі краін адначасова, жаночы хакей ужо складана не заўважаць.