Браты Протасы заехалі на адкрытую трэніроўку зборнай: на фоне футбалістаў і Ганчарэнкі – сапраўдныя гіганты

У першы дзень лета зборная Беларусі правяла адкрытую трэніроўку на «нацыянальным» стадыёне. На яе зазірнулі Аляксей і Ілля Протасы. Братам уручылі імянныя футболкі з іх нумарамі ў «Вашынгтоне», а яны ў адказ падарылі клюшкі са сваімі аўтографамі.

АБФФ падзялілася фотаздымкамі са сустрэчы – у вочы адразу кідаецца розніца габарытаў хакеістаў і футбалістаў. Віктар Ганчарэнка так увогуле практычна згубіўся на фоне гігантаў-Протасаў. І не дзіўна: рост трэнера зборнай 171 см, тады як у Іллі і Аляксея – 195 і 198 см адпаведна.

Наогул браты вылучаюцца нават па мерках НХЛ, так як сярэдні рост гульцоў там – каля 185 см. Астатнія беларусы ў паўночнаамерыканскай лізе таксама не адстаюць. Рост брамнікаў Мікалая Талапілы і Аляксея Коласава – 198 і 191 см адпаведна. Абаронцы крыху ніжэй: Ілля Салаўёў і Арцём Леўшуноў – 188 см, а Уладзіслаў Калячонак – 183 см. А форвард Ягор Шаранговіч – 187 см. Атрымліваецца, сярэдні рост беларусаў, якія згулялі ў сезоне 2025/26 – 191 см.

Канешне, гэта не значыць, што самыя высокія хакеісты НХЛ з Беларусі. Ёсць, напрыклад, шведскі форвард «Пітсбурга» Элем Сёдэрблум (на фота, 203 см) або канадскі нападнік «Нью-Ёрка» Мэт Рэмпе (206 см). Але агульную высокую планку гэта не адмяняе – па сярэдніх фізічных дадзеных беларускія гульцы застаюцца ў топе лігі.