На нібыта Кубку наймацнейшых у Маскве можна было ўзяць медаль паваліўшыся. Але асаблівая прыгажосць – разбег гімнасткі з Беларусі
Наўрад ці вы такое бачылі.
З 3 па 6 ліпеня ў Маскве праходзіў турнір па спартыўнай гімнастыцы пад пафаснай назвай «Кубак наймацнейшых спартсменаў». Федэрацыя гімнастыкі Расіі не без падстаў назвала турнір міжнародным, бо прыехалі прадстаўнікі дзесяці краін, але толькі паглядзіце, што гэта за краіны. Апроч гаспадыні – Беларусь, Тайланд, Арменія, Казахстан, Узбекістан, Турцыя, Кыргызстан і Сірыя, а яшчэ Паўднёвай Асеція – акупаваны рэгіён, які дэ-юрэ належыць Грузіі. Вось дык наймацнейшыя!
Беларусы з такімі канкурэнтамі за тры дні выйгралі 21 медаль, але былі рэчы, якія запомняцца куды лепш, чым тыя ўзнагароды.
Сярод удзельніц фіналу ў апорным скачку аказалася 17-гадовая беларуска Кіра Магарэвіч. Больш за скачок (яго спецялісты называюць даволі простым) уразіў разбег дзяўчыны. Ці бачылі вы калі такое? На выпрастаных нагах, якія нібыта не гнуцца.
Каментатарка трансляцыі ажно разгубілася ад такога відовішча і з уздыхам зазачыла, што «дзяўчынка не бегае», а следам параіла пагуляць у двары ў квача – то бок у даганялкі.
Адным з першых сярод гледачоў такі перфоманс заўважыў былы сябар зборнай Беларусі па спартыўнай гімнастыцы Сямён Букін.
– Для мяне як для гімнаста гэта было смешна назіраць і адначасова жахліва, – каментуе Букін для Tribuna.com. – Смешна, таму што гэта выглядае ненатуральна. Калі так бяжыць проста чалавек, нават не гімнаст на спаборніцтвах, гэта капец. Трэба лекараў выклікаць, таму што такі бег выглядае як нейкае захворванне. А калі сур’ёзна, то, думаю, яе ўжо не перавучыць, калі ўжо ў дзяцінстве не навучылі. Для зборнай гэта вельмі дзіўна выглядае.
Магарэвіч выканала элемент пад назвай скачок Юрчанкі, які лічыцца даволі лёгкім.
– Ён выконваецца з дадаткам паваротаў, з дадаткам сальта яшчэ. Яна зрабіла проста «Юрчанка бланшом», прамым целам, таму гэта не вельмі складаны скачок. Прызямленне было нармалёвае для такога лёгкага скачка. Але я і не ведаю, што там мусіла здарыцца, каб не прызямліцца нармалёва, – адзначыў Букін.
Яшчэ экс-зборнік дадае:
– Скачок не вымагаў вялікай хуткасці, але можна бегчы не хутка, але прыгожа, каб плечы не былі ззаду, бо гэта ненатуральна.
У выніку Магарэвіч заняла 6-е месца.
Букін увогуле застаўся пад уражаннем ад так званага «Кубка наймацнейшых».
– Там быў такі ўзровень, што проста капец. Гімнастаў нармалёвых прыехала – двое з Арменіі, адзін з Казахстана. І ўсё! Там жах нейкі адбываўся, – кажа былы спартсмен.
Вось так, напрыклад, выглядаў скачок расіянкі Ганны Калмыковай:
У любога здараюцца памылкі, але ж Калмыкова ў выніку стала срэбнай прызёркай, што добра дэманструе ўзровень канкурэнцыі.
Аўтарка такога разбегу – хто яна?
17-гадовая Магарэвіч мае званне майстаркі спорту Беларусі, якое зарабіла яшчэ ў 2023-м. Мінулай вясной дзяўчына скончыла Рэспубліканскую дзяржаўную вучэльню алімпійскага рэзерву.
Трэнерам Магарэвіч і ўсёй жаночай зборнай па спартыўнай гіснастыцы з 2019 года з'яўляецца Валер Каладзінскі, бацька знакамітай беларускай барчыхі Ванесы Каладзінскай. Гэта яго трэці заход на пасаду. Падчас першага беларускі сталі шостымі ў камандным турніры на Алімпіядзе ў Атланце, што дагэтуль з'яўляецца найлепшым вынікам у суверэннай гісторыі нашай жаночай спартыўнай гімнастыкі. Святлана Багінская тады заняла 5-е месца ў апорным скачку.
Таксама Каладзінскі прывёў да перамог двухразовую чэмпіёнку свету Алену Піскун. У 2004-м коўч з'ехаў працаваць у Аўстраліі – і застаўся там амаль на дзесяць гадоў, пасля чаго вярнуўся ў Беларусь. У 2020-м, у адрозненне ад дачкі, падпісаў ліст спартсменаў у падтрымку дыктатуры.
Пад яго кіраўніцтвам Магарэвіч 21 чэрвеня гэтага году выступала на этапе Сусветнага Кубку выкліку ў Ташкенце (турнір другога шэрагу, ніжэйшы за чэмпіянат і Кубак свету), дзе здолела ўзяць бронзу ў вольных практыкаваннях з вынікам 12,200 бала. На пазіцыю вышэй тады размясцілася 20-гадовая ісландка Хільдур Гудмундсдоцір (12,250), якая мае досвед выступаў на чэмпіянатаў свету, але ніколі не праходзіла далей за кваліфікацыю ў хоць якіх дысцыплінах. Золата там дасталася 16-гадовай харватцы Антэі Шыкіч Каўчыч (12,350). Сусветна вядомыя і топавыя гімнасткі ў вольных практыкаваннях у Ташкенце, натуральна, не выступалі.
Апроч гэтай узнагародны Магарэвіч раней брала бронзу ў дысцыпліне шматборства на гульнях БРІКС.
Зрэшты, у Кубку нібыта наймацнейшых у гімнасткі была другая спроба. І ў ёй разбег ужо не быў такім дзівацкім.
Каментатары звярнулі ўвагу на тое, што гімнастка «дадала моцы» і гэта сапраўды «было падобна да разбегу». Букін кажа, што «ўжо больш набіраецца хуткасць, але бачна, што яна такім самым чынам і такой самай тэхнікай бяжыць».
– Мне больш няма чаго сказаць, – падсумаваў свае ўражанні экс-спартсмен.
Фота: Смартпресс, Instagram Магарэвіч.
Іншыя пасты карыстальніка
