Беларус сабраў у партфоліа Домрачаву, зорку НБА, Халка з НФЛ, а яшчэ Чака Норыса, Арні і Віні Джонса – вось як у яго атрымалася
Калісьці быў вайскоўцам, а вось кім стаў.
У снежні мы распавядалі пра беларуску Надзею Макееву, якая зрабіла мурал для клуба па амерыканскім футболе «Сан-Францыска» з НФЛ.
А 9 студзеня Telegram-канал «Па-за гульнёй», што піша пра спартыўны маркетынг, звярнуў увагу на яшчэ аднаго беларуса, які засвяціўся ў гэтай амерыканскай індустрыі. Вячаслаў Макшун зрэжысаваў некалькі рэкламных ролікаў для мабільнай гульні пра баскетбол з больш чым 10 мільёнамі спампоўванняў толькі ў Google Play – NBA 2k Mobile.
У відэа зняўся зорны абаронца «Аклахомы» Шэй Гілджэс-Аляксандр. Баскетбаліст станавіўся бронзавым прызёрам чэмпіянату свету-2023 і найлепшым спартсменам Канады таго ж года. А нядаўна Шэй трапіў у спіс прэтэндэнтаў на ўзнагароду MVP у НБА.
Крыху раней, напачатку снежня 2024-га, Макшун пахваліўся працай над рэкламнай калабарацыяй брэнда цукерак Juicy Drop, ювеліра Грэга Юна і гульца «Сіэтла» з амерыканскага футбола Ды-Кей Меткалфа. Апошні з'яўляецца ўдзельнікам двух Матчаў зорак НФЛ, да таго ж вядомы сваімі габарытамі і атлетызмам. Перад драфтам-2019 ESPN напісала пра яго артыкул, дзе апроч іншага называліся даныя гульца: 190 см росту, 104 кг вагі пры 1,9% падскурнага тлушчу. Сапраўдны Халк!
Пра Макшуна вядома, што ён нарадзіўся ў Мінску і жыў у раёне Чыжоўка. У 2001-2008 гадах ён працаваў у войсках сувязі ўзброеных сілаў Лукашэнкі, але, скончыўшы прыватны Інстытут правазнаўства і псіхалогіі, раптоўна пераскочыў у відэапрадакшн. Неўзабаве Макшун уладкаваўся ў Wargaming, які распрацоўвае гульні World of Tanks, World of Warships ды іншыя.
Доўгі час Макшун узначальваў кінагрупу арганізацыі, здымаў для яе ролікі, рэкламу, дакументальныя стужкі. «Туман вайны» і «22 чэрвеня. Першая мяжа» атрымалі прызы некалькіх кінафестываляў у ЗША і Канадзе.
У 2018-м Макшун зняў кліп на песню Primo Victoria ад вядомай шведскай хэві-метал групы Sabaton, якая піша песні на ваенную тэматыку. Відэа на вышэйзгаданы трэк было знята ў межах супрацы шведаў з Wargaming.
У 2014 годзе Вячаслаў Макшун віншаваў на тэлебачанні Дар’ю Домрачаву з поспехамі на Алімпіядзе ў Сочы. Тады ж ён паведаміў, што адзін з праектаў Wargaming, гульня World of Warplanes, стала спонсарам біятланісткі.
Пазней Домрачава з'явілася на YouTube-канале гульні. Там паказалі бэкстэйдж фотасесіі з яе ўдзелам.
У 2019 годзе Макшун пакінуў Wargaming і пераехаў у Нью-Ёрк, але яшчэ некалькі разоў працаваў над рэкламнымі праектамі кампаніі: здымаў Чака Норыса, а потым – Арнольда Шварцэнэгера і Віні Джонса.
Фота: Вячаслаў Макшун з Арнольдам Шварцэнэгерам і Віні Джонсам.
Іншыя пасты карыстальніка
