А што ў Беларусі з фанатамі праз 5 гадоў байкоту? Сектары ўжо не пустуюць (толькі «Мінск» як заўжды), аснова ультрас – школьнікі
А ў «Смаргоні» – дзіцячы сад?
Ужо пяць гадоў як у беларускім футболе няма фанацкага руху ў класічным яго разуменні. На пачатку 2020-га некаторыя ультрас абвясцілі байкот матчаў праз эпідэмію каранавірусу, якую адмаўляла дыктатарская ўлада ды кіраўніцтва АБФФ. А ўжо пасля пасля пачатку пратэстаў і наступных масавых рэпрэсій ад падтрымкі каманд адмовіліcя практычна ўсе актыўныя фанаты.
Але мінуў час, і на сектарах ізноў пачалі з’яўляцца фанаты. Яшчэ ў 2023-м нібыта вярнуліся ультрас мінскага «Дынама». Але тады Tribuna.com высветліла, што хоць сярод вяртанцаў і былі «старажылы», афіцыйная фан-суполка мінчукоў байкот не скасоўвала.
У 2025 годзе актыўныя фан-сектары можна пабачыць амаль што ва ўсіх камандаў вышэйшай лігі. Вось як выглядаюць «ультрас» праз пяць год пасля беларускіх пратэстаў.
БАТЭ
На хатніх трыбунах барысаўцаў запальвае моладзь. У клубе ім нават прыдумалі адмысловую назву – Young Ultras («Маладыя Ультрас»).
Вось так цэлы сектар школьнікаў, з барабанам і атрыбутыкай, перажывае за БАТЭ падчас жахлівага сезона.
Ёсць у клуба і дарослыя прыхільнікі. Яны кідаюцца ў вочы на гасцявых гульнях, куды моладзь з зразумелых прычын не заўсёды даязджае.
«Дынама» Мінск
З 2023 года фан-сектар мінчукоў не змяніўся. Там усё яшчэ шмат школьнікаў.
Ёсць і больш дасведчаныя «калегі». Яны, праўда, свае твары хаваюць.
«Нёман»
Гродзенцы маюць даволі вялікую падтрымку. Прычым не толькі на хатніх, але і на гасцявых сустрэчах. На апошніх публіка ў асноўным дарослая.
А на матчах у Гродна школьнікі таксама робяць сваю «фанатку».
«Дынама» Брэст
У Брэсце таксама абзавяліся саліднай у цяперашніх рэаліях групай падтрымкі.
На першых ролях – таксама юнакі.
Можна заўважыць, што на фан-сектары брастаўчан выкарыстоўваюць сымболіку арыгінальнальных ультрас. Але яшчэ ў 2023-м «старажылы» нагадалі пра байкот, а людзей, якія заклікалі да актыўнай падтрымкі, расцэньвалі як «правакатараў і імбецылаў».
«Славія»
Мазырчукоў, якія ідуць на другім месцы ў табліцы ЧБ, на хатніх трыбунах актыўна падтрымліваюць школьнікі, юнакі – людзей больш сталага веку зусім няшмат.
«МЛ» Віцебск
Хоць цяперашні лідар ЧБ перабраўся ў паўночную сталіцу Беларусі ўсяго пару гадоў таму, але ўжо абзавёўся вялікім фан-сектарам.
Актыўна пазаўзець за «букмекераў» збіраюцца як школьнікі, так і дарослыя. Звяртае на сябе ўвагу вялікая колькасць дзяўчынак.
Там нават ёсць свае музыкі.
«Віцебск»
За арыгінальных «паўночнікаў» актыўна заўзее куды менш людзей. І там таксама моладзь ды колькі дарослых.
Але на паўночнае дэрбі з «МЛ» 31 траўня на сектары «Віцебска» сабралося багата людзей – відаць, і «старажылы» падключыліся.
16 жніўня пасля 0:3 ад «Нафтана» дырэктар «Віцебска» Мікалай Вайцюхоўскі заявіў, што яму «асабліва сорамна перад хлопцамі са «старога» фан-сектара, якія прыехалі» ў Наваполацк.
«Тарпеда-БелАЗ»
А так выглядае «фанатка» жодзінцаў. Даволі даросла ў параўнанні з папярэднікамі.
«Іслач»
Штосьці модна, штосьці сыйшло з моды, а штосьці – назаўжды. На сектары «Іслачы» па-ранейшаму запальваюць пад баян.
Таксама на трыбунах багата «ваўчат». Карацей, сямейная атмасфера.
«Арсенал»
У дзяржынскага клуба групоўка актыўнай падтрымкі таксама невялікая. Так бы мовіць, сямейнага тыпу.
«Смаргонь»
Яшчэ адзін цалкам школьны фан-сектар сабралі «мядведзі» – магчыма, самы юны ў Д1.
На выездах за іх «адпрацоўваюць» старэйшыя.
«Гомель»
І на гомельскіх трыбунах можна пабачыць «малады» сектар. Даволі шматлікі.
На выездах людзей куды менш, затое банеры даязджаюць заўсёды.
«Слуцк»
Фота асобнага фан-сектара случакоў за апошні час адшукаць не атрымалася. Але можна пабачыць вось такіх заўзятараў у атрыбутыцы.
«Мінск»
Гараджане таксама не могуць пахваліцца асобнай «фанкай». Але гэты мужчына вельмі стараецца.
5 ліпеня ён жа трапіў у кадр трансляцыі АБФФ на матчы супраць БАТЭ, калі «Мінск» атрымаў перамогу на «Барысаў-Арэне» 2:0. Зрэшты, на агульным ракурсе бачна, што ён быў не адзін – а ажно з трыма калегамі.
«Нафтан»
Бядовыя навапалачане, як вынікае з фота ў сацсетках клуба, асобны сектар прыхільнікаў не збіраюць. Хаця і за падапечных Ігара Крывушэнкі прыходзяць пазаўзець з барабанамі ды вувузеламі.
«Маладзечна»
Беспрасветны аўтсайдар выйшэйшай лігі можа пахваліцца вось такой суполкай актыўнай падтрымкі.
Адзначым, што суполка ультрас маладзечанцаў абвясціла байкот у верасні 2020 года. Прычынай стала забойства аднаго з лідараў фанацкага руху ў Маладзечне Мікіты Крыўцова. Лукашэнкаўскія «сілавікі» патлумачылі яго смерць «суіцыдам», але ў іх версію ніхто не паверыў.
12 жніўня фанат выправіўся на працу і больш яго ніхто не бачыў жывым. 22 жніўня будзе пятая гадавіна, як Крыўцоў быў знойдзены мёртвым у мінскай лесапаласе.
Іншыя пасты карыстальніка
