Як жа жорстка экс-гульцы «Нафтана» хейцяць памочніка Крывушэнкі. Што за ён?
«Пастух», «чарвяк», трэнуе з дапамогай Instagram.
На пачатку жніўня нарабіла шуму інтэрв’ю маладога экс-футбаліста «Нафтана» Арцемія Ліцвінава. 21-гадовы хлопец разнёс родны клуб за тое, што там нібыта не даюць шанцаў наваполацкім выхаванцам. Асабліва дасталося памочнікам галоўнага трэнера Ігара Крывушынкі – за арганізацыю трэнавальнага працэсу. Больш за ўсё Ліцвінаў «вылучыў» Ігара Латаша. Маўляў, практыкаванні для трэнінгаў той «глядзіць у Instagram і дае футбалістам, не разумеючы, дзе і каму стаяць».
З улікам таго, што Ліцвінаў на пачатку месяца скончыў кар’еру, нічога не дамогшыся ў футболе, яго словы можна было б спісаць на крыўду. Але праз колькі дзён з’явіўся другі спікер, які таксама «насыпаў» наваполацкаму клубу. 15 жніўня партал metaratings.by апублікаваў інтэрв’ю з Дзмітрыем Тамела – яшчэ адным экс-футбалістам «Нафтана».
Тамела заявіў, што словы Ліцвінава – «не маладосць і не эмоцыі, а крык душы». Маўляў, ён, Тамела, перыядычна камунікуе з наваполацкімі выхаванцамі, і тыя нібыта прызнаюцца, што не маюць аніякай ахвоты гуляць за родную каманду.
– Гэта нармальна, калі ніводзін выхаванец наваполацкага футбола не хоча гуляць за свой клуб? Хлопцы столькі гадоў аддаюць футболу, марнуюць сілы і час, а вы ўсё гэта ў іх забіваеце. Забіваеце жаданне, веру ў сябе. Пацанам не даюць развівацца, раскрыцца. І ў адзін момант гульца выкідваюць з каманды, як непатрэбную цацку, – абураўся Тамела.
Асабліва ён згадаў усё таго ж Латаша, прычым яшчэ больш жорстка, чым Ліцвінаў:
– Латаш – пастух. Можаце так і напісаць. Яму калі даць пугу, ён нават з авечкамі не справіцца. І Ліцвінаў правільна кажа, – запэўніў Тамела.
Такую пазіцыю футбаліст падмацаваў аповедамі пра трэнінгі. «Асобная тэма», кажа Тамела, – тэарэтычныя заняткі Латаша, дзе гульцы «проста засыналі». Нібыта коўч мог 40 хвілін разбіраць няправільны выкід аута, «шукаць дзесяць прычын гэтаму: няправільны кут вынасу, падключаў фізіку і матэматыку і гэтак далей».
Яшчэ Тамела згадаў, як аднойчы не паважаны ім трэнер вырашыў абкатаць нешта такое, чаго сам не разумеў, падчас занятку ў завіруху. «Латаш там (у інтэрнэце – Tribuna.com) кніжак і артыкулаў нейкіх начытаецца, нейкія «ромбы», квадраты дае, – кажа былы нафтанавец, – а пацаны ўжо проста ў лес забягалі. Проста не ведалі, куды бегчы!» Тамела апісваў і думкі футбалістаў падчас трэнінгаў Латаша. Быццам бы «ўсе стаялі і думалі: а што мы тут робім і для чаго гэта?»
Але разам з тым прагучала і даволі дзіўная думка Тамелы. Гулец заявіў, што трэнеру трэба было, так мовіць, адбываць заробак і не адсвечваць.
– На занятках [Латаша] ты сядзіш і думаеш: «Чалавек, спусціся на зямлю! Цябе ўзялі ў штаб, каб ты проста не перашкаджаў, атрымліваў зарплату». А ён ужо пачаў кіраваць, нешта строіць з сябе. Усё хадзіў па базе з ноўтбукам, кожнага да сябе падклікаў і нешта паказваў. Ды мы ўсё роўна нічога з гэтага не разумелі, яно і не было патрэбна. Лепш бы рэальнай справай займаліся, а не гэтым глупствам, – заявіў Тамела.
Але тут варта зазначыць, што, як і Ліцвінаў, Тамела мае асабістыя крыўды. У 2024-м ён пакінуў «Нафтан» на фоне канфлікту з трэнерскім штабам тагачаснага галоўнага Альберта Рыбака, куды таксама ўваходзіў Латаш. Праз тыя стасункі футбаліст нават не хацеў вяртацца ў вышэйшалігавы «Нафтан» з арэнды ў першалігавай «Оршы».
Прычым Тамела расказаў, што ўзімку яго зваў сам Крывушэнка, але безвынікова. «Праблемай» гулец назваў тое, што галоўны трэнер вельмі давярае людзям, з якімі працуе, то бок трэнерскаму штабу. І тут футбаліст згадаў Латаша нядобрым словам:
– Вельмі дзіўны таварыш, але ўмее залезці пад скуру і круціцца там як чарвяк. Простасць і прыстойнасць Ігара Мікалаевіча [Крывушэнкі] і хамства, напорыстасць Латоша – складаны сімбіёз. Латаш будзе як на патэльні круціцца, але свайго даб’ецца. Стварае ілюзію таго, што дапамагае. А сам у футболе асабліва і не разбіраецца, – перакананы Тамела.
Цяпер ён з’яўляецца паўнавартасным гульцом «Оршы». У Д2-2025 на яго рахунку 16 матчаў, 5 галоў і 3 галявыя перадачы. У бамбардзірскім спісе каманды ён дзеліць першы радок з Іванам Ціханавым, у якога 7+1.
Такая жорсткая крытыка яшчэ больш увагі прыцягвае да «Нафтана», які і так апошнім часам шмат абмяркоўваецца праз жудасныя памылкі абароны.
Пытанні можна задаваць усім трэнерам, пачынаючы ад галоўнага, але Ліцвінаў і Тамела асаблівы акцэнт робяць на Латашы. Ці сапраўды гэта настолькі «прафан» у футболе?
У футболе 44-гадовы Латаш даўно. З адкрытых крыніц можна меркаваць, што калісьці ён марыў стаць гульцом – бо спецыяліста пазначаюць як выхаванца слонімскай ДзЮСШ №1. Але на сур’ёзным узроўні сённяшні трэнер ніколі не гуляў.
Скончыўшы фізкультурны факультэт Гродзенскага ўніверсітэта, з 2011-га па 2021-ы Латаш працаваў інструктарам па навукова-метадычнай рабоце ў ДзЮСШ «Нёмана». За гэты час паспеў атрымаць трэнерскія ліцэнзіі УЕФА катэгорый «B» (у 2014 годзе) і «А» (2020).
На пачатку 2022 года спецыяліст перайшоў у дарослы футбол і адразу стаўся галоўным трэнерам – узначаліў родны «Слонім-2017». Праўда, досвед атрымаўся не тое каб удалым. У дэбютным сезоне пад кіраўніцтвам Латаша слонімцы занялі 11-е з 13 месцаў у Д2, атрымаўшы 5 перамог, 3 нічыі і 16 параз. Наступны год трэнер увогуле не дапрацаваў – сышоў у верасні 2023 года. Пад кіраўніцтвам Латаша ў тым сезоне каманда атрымала 3 перамогі, 3 нічыі і 15 параз, а на момант яго звальнення ішла ў першай лізе на серыі з 14 матчаў без перамог (2 нічыі і 12 паражэнняў).
Зрэшты, несправядліва меркаваць, што такія вынікі – выключна віна Латаша. У каманды амаль не было рэсурсаў. Пра гэта распавядалася ў адным са слонімскіх паблікаў у сацсетках – у публікацыі за аўтарствам Латаша. Умовы ў Слоніме ён назваў аднымі з найгоршых у Беларусі, а яшчэ параіў будучаму трэнеру «гнаць ад клуба куды далей мясцовых спецыялістаў» бо «яны здрадзяць і прададуць пры першай магчымасці».
У мінулым сезоне ў «Слоніме» адбыўся гучны скандал. А што тычыцца вынікаў, яны ў каманды не палепшыліся дагэтуль.
Пасля звальнення са «Слоніма», у кастрычніку 2023 года, Латаш уладкаваўся памочнікам Альберта Рыбака ў «Нафтане». Пасля сыходу шэфа і да прыходу Ігара Крывушэнкі ў верасні 2024 года, Латаш быў галоўным. Паводле сайту навапалачан, на сёння ён з’яўляецца трэнерам па навукова-метадычнай працы.
У Instagram-падпісках трэнера сапраўды шмат старонак, на якіх можна адшукаць розныя трэнавальныя практыкаванні. Але ці насамрэч трэнер з ліцэнзіяй «А» няздольны іх зразумець і выкласці гульцам – пытанне адкрытае.
Іншыя пасты карыстальніка
