Футбалістка з Беларусі за 8 гадоў згуляла за 11 каманд з шасці краін (без Украіны праз вайну) – цяпер збірае прагляды вiдэа пра піва і секс
А ў футбол прыйшла толькі ў 18.
У футбалісткі «Віцебска» Арыны Івановай – насычаная кар’ера: у свае 26 гадоў дзяўчына паспела пагуляць за 11 клубаў у шасці краінах. А з нядаўняга часу спрабуе сябе ў блогерстве – і кантэнт ад Івановай некалькі разоў ужо «заляцеў» на сотні тысяч праглядаў. Раскажам пра футбалістку падрабязней.
Прыйшла ў футбол ужо паўналетняй
Іванова нарадзілася ў Мінску. З дзяцінства Арына займалася вялікім тэнісам, распавядала, што мела нават корт на дачы. Але потым загінуў блізкі чалавек, і «шлях звярнуўся ў іншы бок».
У футбол Іванова трапіла ў 18 гадоў – паступіўшы ў мінскі лінгвістычны ўніверсітэт (з нядаўняга часу БДУЗМ), пачала гуляць за студэнцкую футзальную каманду. Выкладчык-трэнер Анатоль Буд-Гусаім хутка парэкамендаваў дзяўчыну свайму знаёмаму Уладзіміру Пігулеўскаму, які кіраваў РЦАР-БДУ. Iванова прыйшла ў дубль каманды цэнтра «Зоркі-БДУ», дзе вучылася з азоў – нават проста аддаць перадачу нізам. Але атрымлівалася ўсё даволі хутка, і праз паўгады свежаспечаная форвард паднялася ў першы склад – казала, што потым у яе шчырыя адказы, як нядоўга займалася футболам, некаторыя не верылі.
Дарэчы, на фота ніжэй з тых часоў ззаду Івановай можна пабачыць экс-футбалістку Алену Кушнер. Яна цяпер таксама блогерка.
Іванова ж надоўга ў «Зорцы-БДУ» не затрымалася, таму што вырашыла сысці з ВНУ ды паступіць у Польшчу. Пігулеўскі не пакрыўдзіўся – наадварот, прыклаў намаганні для пошуку дзяўчыне каманды ў новай краіне.
Не затрымалася ў Польшчы, у Арменіі стамлялі прыставанні
Іванова з’ехала на вучобу ў польскі Люблін. Там жа некалькі месяцаў пагуляла за «Відок» з Д3, а ўзімку яе заўважылі ў «Гідратраку» з Д2. Каманда месцілася ў Радаме, што ў 100 кіламетрах ад Любліна. Каб сумяшчаць гульні з вучобай, даводзілася жыць на два горада. Але праз «непрыемны канфлікт» з трэнерам Іванова вырашыла сысці. I не проста – ўзяла акадэмічны водпуск ды з’ехала ў Італію, «каб вандраваць па Сардыніі». А заадно крыху пагуляла за «Атлетыка Арыстана» з глыбокага мінору – там зноў былі канфлікты з трэнерам.
Потым здарылася пандэмія каронавірусу – Іванова паспела вярнуцца на Радзіму, дзе ў 2020-м паспела правесці 9 матчаў без галявых дзеянняў за «Бабруйчанку». А ў 2021-м зноў паехала за мяжу – запрасілі ў «Аясу» з Арменіі, дзе толькі-толькі скончыўся чарговы ваенны канфлікт з Азербайджанам у Нагорным Карабаху. Дзяўчына стала чэмпіёнкай Арменіі – то быў першы тытул у кар’еры. Але ўжо праз тры месяцы вярнулася – у краіне не спадабалася.
– Вельмі шмат бяздомных сабак, увечары яны могуць на цябе напасці. І яшчэ тут да дзяўчыны славянскай знешнасці – бландынцы вельмі шмат увагі. Спыняюцца проста перад табой на вуліцы, глядзяць, абмяркоўваюць на сваёй мове. З машын сігналяць, мужчыны свішчуць. Гэта жудасна. Не разумееш, што з табой могуць зрабіць. Тым больш у Арменіі ёсць вайсковы кантынгент з іншых дзяржаў (тады ў краіну ўводзілі расійскіх «міратворцаў» – Tribuna.com). У таксі вадзіцелі атакуюць пытаннямі пра асабістае жыццё і прапановамі пра шашлык. Такое жыццё мне не падыходзіць, – казала Iванова.
Варыянт ва Украіне скасавала вайна
У ліпені-жніўні 2021-га Іванова паспела правесці 3 матчы ў ЧБ за каманду АБФФ U-19 (хаця дзяўчыне было ўжо 22). 18 жніўня таго года журналіст Дзмітрый Сіняк паведаміў, што беларуска падпісала кантракт з «Дняпром-1» з Д2 Украіны, але ў верасні ён жа удакладніў, што кантракт сарваўся.
У студзені 2022 года Іванову заўважылі на праглядзе ў казанскім «Рубіне» з Д1 Расіі, але кантракта не атрымамалася. Пасля таго футбалістка другі раз прыехала ў «Дняпро-1».
Арына Іванова ў Дняпры, 20 лютага 2022 года
На гэты раз варыянт сарваўся праз пачатак Расіяй вайны ва Украіне. Як Iванова выбіралася з Украіны – невядома. Але ў красавіку 2022-га знайшлася ў латвійскай «Рызе». Там згуляла 7 матчаў да лета, а потым падпісала кантракт з «Дняпро» – але ўжо магілёўскім. Адрэзак у гэтым клубе – рэкордны для Iвановай па даўжынi: паўтара сезона, 46 матчаў ва ўсіх турнірах, 10 галоў і 13 асiстаў.
2024-ы Іванова правяла ў казахстанскім «Актабэ» ў якасці паўабаронцы. Паспела нагуляць 16 матчаў і адзначыцца 2 галамі і 4 асістамі. Клуб беларускі ўзяў срэбра чэмпіянату.
З 2025 года Іванова выступае за «Віцебск», там ужо крайняя абаронца – гэту пазіцыю футбалістка называе любімай. У бягучым чэмпіянаце Беларусі нагуляла 20 матчаў і адзначылася 1 голам. «Паўночніцы» цяпер ідуць на трэцiм месцы ў табліцы.
Віцебская каманда стала 11-й у кар’еры Арыны. У суме за 8 гадоў у футболе дзяўчын пагуляла ў 6 краінах: Беларусь, Польшча, Італія, Арменія, Латвія, Казахстан.
Спрабавала быць трэнеркай
Вядома, што яшчэ напачатку кар’еры ў Мінску Іванова працавала адміністратаркай і дзіцячай трэнеркай у футзальнай «Сталіцы». Нядоўга – звольнілася праз 2-3 месяцы, бо было «цяжкавата». Цяпер дзяўчына таксама пазіцыянуе сябе ў Instagram як трэнерку.
У відэа распавядае пра секс ды алкаголь
Што тычыцца блогінгу, найвялікшую колькасць праглядаў у Instagram Івановай (284 тысячы) сабрало відэа з «летнім лайфхакам». У ім футбалістка распавядае, што калі вы на выходных выбераце не шашлык, а сельдзярэй, то «ўвесь вечар прасядзiце з сумным ###### [тварам], таму ў жопу той сельдзярэй».
На другім месцы па праглядах відэа з аргументацыяй, чым піва лепшае за сок – 282 тысячы. На думку Івановай, тым, што «ў піве менш калорый, няма цукру і яно дапамагае лепш засвойвацца ежы». А яшчэ, кажа футбалістка, з півам хутчэй можна схуднець. Насамрэч, калі злоўжываць напоем, гэтага не атрымаецца. А пра дрэнныя наступствы Іванова не абмовілася.
На трэцім месцы з 239 тысячамі праглядаў – вiдэа, дзе Iванову быццам пытаюць, што яна «як прафесійная спартсменка можа параiць моладзi, якая п’е алкаголь». У адказ футбалiстка раiць закусваць, запіваць сокам, а не газіроўкай, а перад тусоўкай з’есці лімон з цукрам – так, маўляў, не будзе пахмелля. У подпiсы да вiдэа Iванова дадала, што насамрэч быццам бы не п’е i не рэкамендуе – але хто гэта прачытае?
Ёсць і інтымны кантэнт. Напрыклад, ці ўплывае секс на выступ спартсмена – з пытаннем: «Зацiкавiла, дураслівец?». Футбалістка кажа, што калі «ўсю ноч адпрацоўваць атаку 2 у 1 – зранку будзеш як выціснуты лімон». Але на моц і цягавітасць куды больш уплываюць іншыя фактары: сон, харчаванне і трэніроўкі. Сама Іванова, «як прафесійная футбалістка», кажа сексу «так».
Яшчэ ў адным вiдэа Iванова разбурала «міфы пра жаночы футбол». Сярод iншага сказала, што дзяўчыны трэнуюцца падчас месячных – ды «і з тэмпературай, і з паносам».
Яшчэ ў адным відэа дзяўчына прызналася, што жаночы футбол не спраўдзіў яе чаканняў – маўляў, думала зарабіць мільёны, а ў выніку «атрымала першы заробак у 50 долараў», а замест паляпшэння здароўя цяпер «хрусцяць галікі, з’явіўся неўроз і дрыгаецца вока». Таксама марыла стаць знакамітай, але ў фанатах цяпер «толькі мама і алкаш Грыша з раёна», а спадзевы згуляць у Бундэслізе і на чэмпіянаце свету таксама не спраўдзіліся – у выніку «ездзіць па прасёлачных дарогах у Беларусі». Што сказаць, да гэтага хаця б паездзіла па iншых краiнах.
Іншыя пасты карыстальніка
