Мілеўскі ў 40 намякае на вяселле – быццам па прыкладзе Раналду. А можа, даўно вядомы лавелас зноў жартуе?
Але адносіны з дзяўчынай выглядаюць не павярхоўна.
13 жніўня ў сацсетках Арцёма Мілеўскага з’явіліся намёкі на будучае вяселле. Былы футбаліст зборнай Украіны, які нарадзіўся ў Мінску, нібыта вырашыў узяць прыклад з равесніка, 40-гадовага Крышціяну Раналду. Цалкам магчыма, што гэта проста жарт, такое ўжо бывала – але агулам адносіны Мілеўскага з цяперашняй дзяўчынай выглядаюць сур’ёзна як для вядомага лавеласа з кучай гісторый пра інтым. Раскажам падрабязней пра сітуацыю і бэкграўнд.
У Мілеўскага ледзь не ўсю кар’еру запытваліся пра магчымае вяселле, але паверыць у такое заўжды было складана. Экс-футбаліст меў шмат сувязяў, расказваў пра свой секс з медыйнымі асобамі. А ў 2024-м прызнаўся, што здраджваў ва ўсіх адносінах, у якіх быў, і лічыць гэта нармальным – але толькі для мужчын. Падрабязней пра ўсё гэта можна пачытаць па спасылцы ніжэй.
Пару разоў Мілеўскі, так бы мовіць, рабіў «укіды» наконт вяселля. Напрыклад, у 2014 годзе апублікаваў фота з чарговай дзяўчынай у Instagram, а ў каментарыях станоўча адказаў на пытанне, ці збіраецца ажанніца. Але журналістам, якія хутка звязаліся з гульцом, ён усё абверг: «Вы што, якое вяселле?»
У студзені 2019 года гулец схлусіў наконт вяселля прэзідэнту венгерскага клуба «Кішварда» – проста шукаў ужо любыя спосабы, каб разарваць кантракт і вярнуцца ў брэсцкае «Дынама».
– 25 хвілін размаўляў з ім. Ужо пачаў «ляпіць» – сказаў, што ў мяне вяселле 25 траўня. Сказалі: «Няхай нявеста сюды прыязджае». Я: «Сюды ніхто не прыедзе, тут ніхто не ведае англійскую». Мая галава [была] ў Беларусі. Казаў, што павешуся. Ён на мяне такімі вачыма глядзеў, – распавядаў Мілеўскі.
Усё разам дапамагло жаданаму для гульца пераходу, а «Дынама» па выніку сезона-2019 ўзялі сваё адзінае чэмпіёнства. Мілеўскі быў у лідарах той каманды: адзначыўся 4 галамі і 7 асістамі ды падзяліў трэці радок бамбардзіраў каманды з Паўлам Савіцкім і Дзянісам Лапцевым.
Пасля завяршэння кар’еры таксама нішто не прадвяшчала вяселля. А пасля пачатку поўнамаштабнага расійскага нападу на Украіну экс-футбаліст зведаў праблемы з алкаголем, якія звялі яго нават у штучную кому. Але ён адолеў цяжкасці і вярнуўся да больш-менш нармальнага жыцця ў 2024-м.
Неўзабаве Мілеўскага сталі зноў заўважаць з дзяўчынамі. А ў канцы лістапада 2024-га экс-футбаліст распавёў, што з’ехаўся з новай выбранніцай, якую завуць Таміла (нягледзячы на цікавасць украінскіх СМI, пра яе амаль нічога невядома).
Мілеўскі з абраннніцай на Новы год-2025
Тады Мілеўскі яшчэ выклаў фота з дзіцячымі вазкамі і подпісам: «Здаецца, прыехалі». Але намёк на цяжарнасць, мяркуючы па сацсетках дзяўчыны, аказаўся жартам. Аднак цягам усяго 2025 года пара стабільна выкладае сумесны кантэнт. Паводле фотаздымкаў, пара часцяком гуляе па Кіеву, наведвае розныя кафэ і рэстараны ды выглядае шчаслівай.
Таксама Мілеўскі з дзяўчынай ездзяць на вакацыі. У ліпені адпачывалі на ўкраінскім гарналыжным курорце Букавель.
А напачатку жніўня – у Львове.
I вось 13 жніўня ў Instagram Мілеўскага з’явіўся рэпост з акаўнта дзяўчыны фота з пярсцёнкам, надзетым так, як носяць заручальны, песняй «Вяселле» на фоне ды подпісам: «Калі нават Крыш наважыўся, то мы абавязаныя». То быў яўны намёк на Крышціяну Раналду, аднаго з любімых футбалістаў мінчаніна. 11 жніўня Раналду зрабіў прапанову сваёй дзяўчыне Джарджыне Радрыгес, якая таксама распавяла пра гэта ў сваім Instagram. Праўда, у той пары ўсё нашмат больш сур’ёзна – 9 гадоў у адносінах, маюць дзвюх агульных дачок. Што падобна – дык розніца ва ўзросце ў парах: Джарджыне цяпер 31 год, Таміле 30.
Дык што ж, блізка вяселле Мілеўскага, які ў красавіку 2024 года казаў, што яно стане «найграндыёзнейшай падзеяй» у ягоным жыцці? Не факт. Як мы згадвалі, у пары ўжо быў жарт наконт асабістага. А ў Telegram-канале экс-футбаліста з’явілася «перадгісторыя» здымка: на відэа дзяўчына кажа, што яны «з Цёмам вырашылі, што час згуляць вяселле», пажадана «адразу пасля Раналду ці ў той жа дзень», і дадае, што тут «усё без жартачак». Але сам Мілеўскі што на абранніцу, што на пярсцёнак, які яна паказвае ў камеру, глядзіць вачыма, поўнымі здзіўлення.
Па гэтым роліку здаецца, што ўнутрана Мілеўскі ўсё ж яшчэ не гатовы да шлюбу. Паглядзім, ці зможа цяперашняя дзяўчына змяніць сітуацыю – калі, канешне, усур’ёз гэтага жадае.
Іншыя пасты карыстальніка
