Карпіцкі і Лісаковіч з Д2 Расіі спусціліся да аматараў – як дзве колішніх надзеі белфутбола так глыбока захраслі?
Ад некаторых лепшых варыянтаў адмовіліся самі.
Віталь Лісаковіч і Ягор Карпіцкі – форварды, якія ў розныя часы прайшлі структуру салігорскага «Шахцёра» і давалі падставы для вялікіх чаканняў. Але цяпер з кар’ерамі абодвух адбываецца незразумела што. Расказваем, у чым там справа.
Віталь Лісаковіч
Мінулы сезон 27-гадовы форвард правёў у расійскім Д2. Там у 18 матчах вызначыўся 6 галамі і 2 асістамі ў складзе «Балтыкі». Каманда стала першай у лізе, але цягам сезона гульнявы час беларускага футбаліста імкліва зніжаўся. У 2025 годзе форвард правёў за «Балтыку» 7 матчаў, толькі ў двух першых з’явіўшыся ў старце, а яшчэ 6 сустрэч прапусціў (4 разы застаўся на лаўцы, двойчы ўвогуле не трапіў у заяўку).
30 чэрвеня Лісаковіч пакінуў калінінградцаў – «Балтыка» не стала прапаноўваць новы кантракт. Трэнер каманды на развітанне хваліў форварда, гендырэктар казаў, што сыход – «сумеснае рашэнне», але з гульцом «дагэтуль на сувязі».
Далей хадзілі розныя чуткі. У ліпені форвардам нібыта цікавіўся лідар чэмпіянату Беларусі «МЛ» Віцебск. Таксама паведамлялі пра зацікаўленасць з «Актабэ», які ўзначальваў Вячаслаў Ляўчук, ды харвацкай «Рыекі», дзе ўжо забяспечылі сабе еўравосень. Але сам Лісаковіч меў жаданне застацца ў Расіі.
Там было чуваць толькі пра адзін варыянт – «Ніжні Ноўгарад» Аляксея Шпілеўскага. Але, па інфармацыі Tribuna.com, беларускі трэнер сам адмовіўся ад падпісання суайчынніка, які на сваім шляху даводзіў не аднаго коўча.
Лісаковіч стамiў чарговага трэнера ў сваёй кар’еры: хаміць, абураецца, ігнаруе
У жніўні нават інсайдаў пра будучыню Лісаковіча ўжо не было. Форвард па-ранейшаму без кантракту, а гуляе ў аматарскай лізе Мінска за «Захад-3» – каманду, вядомую вялікай колькасцю былых прафесіяналаў. За тры матчы там футбаліст вызначыўся 6 галамі і 1 асістам – забіў аматарам нават з цэнтра поля.
Нават калі Лісаковіч усё ж знойдзе клуб, паўнавартаснай перадсезонкі не было – «укаціцца» можа быць цяжка.
Ягор Карпіцкі
Два гады таму, накалаціўшы 12 галоў за 13 матчаў першага кола ЧБ-2023, Карпіцкі ў свае 19 пераехаў з «Шахцёра» ў расійскія «Крылы Саветаў» на 4-гадовы кантракт. За другую палову 2023-га форвард згуляў за новую каманду 14 матчаў ды аформіў 1 гол і 1 асіст у РПЛ.
Але ў 2024-м даверу ўжо не было. Да канца сезона-2023/24 Карпіцкі гуляў за фарм «КС» у Д4 – тройчы забіў за 11 матчаў. На сезон-2024/25 гульца аддалі ў арэнду «Сокалу» з расійскага Д2, дзе галоўным трэнерам працаваў знаёмы па «Шахцёры» Аляксей Бага. За першыя тры матчы форвард адзначыўся двума галамі, але яны так і засталіся адзінымі за сумарныя 27 сустрэч у выніку.
Па спартыўным прынцыпе «Сокал» вылецеў з Д2 (хоць і па факце застаўся там праз праблемы іншых каманд), а Карпіцкі пасля гэтага вярнуўся ў «КС». У сярэдзіне лета Tribuna.com высветліла, што форварда запрашалі ў «МЛ». Але гулец адмовіўся, бо спадзяваўся праявіць сябе ў «Крылах» або знайсці варыянты ў Расіі.
Пра апошнія пакуль інфармацыі не з’яўлялася. А ў «КС» Карпіцкі ні разу не трапіў у заяўку на матчы сезона-2025/26 – зноў гуляе за другі склад у Д4. Там футбаліст ва ўсіх трох матчах аформіў па выніковым дзеянні. Дакладны стрэл з пенальці 3 жніўня дапамог самарцам абыграць «Носту» (3:2), а 11 жніўня – згуляць унічыю з дублем «Рубіна» (1:1). У другім выпадку Карпіцкі сам і зарабіў 11-метровы.
17 жніўня форвард адзначыўся асістам на трэці гол самарцаў у матчы супраць «Уральца». Праўда, перавагу 3:1 каманда ў выніку згубіла – 3:3.
Увогуле ж дубль «Крылаў» не прэтэндуе на нешта вялікае. За 8 тураў да канца розыгрыша сваёй зоны Д4 каманда ідзе на 9-м з 14 месцаў у табліцы з 22 ачкамі. Права на падвышэнне мае толькі пераможца, а ў цяперашняга лідара ўжо недасягальныя для самарцаў 42 ачкі. Да зоны вылету ўсяго 11 пунктаў, але дэ-факта – праз невялікае жаданне падвышацца з цалкам аматарскага Д5 – з Д4 (які, дарэчы, афіцыйныя асобы таксама называлi аматарскiм) таксама амаль ніколі не вылятаюць.
Карацей, пакуль Карпіцкі гуляе на нізкім узроўні без асаблівай мэты. Каму футбаліст можа патрэбны ў Расіі з улікам статыстыкі мінулага сезона – не вельмі зразумела. Хіба што той жа Бага падцягне ў цяперашні свой клуб, «Ленінградзец» з расійскага Д3, куды ўжо падпісалі групу беларускіх гульцоў.
Іншыя пасты карыстальніка
