Гулец «Іслачы» здабыў сэрца «піпец прыгажуні» з класа – яна дынаміла, але раптам перадумала. І сабрала на гэтым мільёны праглядаў

Tribuna.com любіць распавядаць гісторыі кахання беларускіх спартсменаў. Сёння пагаворым пра паўабаронцу «Іслачы», 21-гадовага Юрыя Краўчанку.

Малаверагодна, што вы пра яго нешта чулі. Нарадзіўся Краўчанка чэрвені 2004-га ў Мінску. Першыя крокі ў футболе рабіў у сістэме БАТЭ, а пазней прайшоў і праз прыватную Футбольную школу Мурашкі, якая ў свой час супрацоўнічала з італьянскім «Інтэрам».

У 2020 годзе юнак трапіў у сістэму мінскага «Дынама», а ў 2023-м апынуўся ў дублі. І ў першым жа сезоне выйграў золата чэмпіянату дублёраў, прычым быў адным з лідараў каманды: адзначыўся 6 галамі і 15 асістамі, паўдзельнічаўшы ў 20% галоў калектыва у тым сезоне (107).

У тым жа сезоне адбыўся дэбют за аснову. Вадзім Скрыпчанка – на сёння ўжо афіцыйна звольнены – выпусціў маладога замест Душана Бакіча на 92-й хвіліне кубкавага матчу супраць «Жодзіна-Паўднёвага» (2:0). Гэта было за дзень да 19-годдзя Краўчанкі – такі вось падарунак ад коўча.

Але больш за «бела-сініх» Краўчанка не згуляў. Пасля сезона-2023 паўабаронца пакінуў клуб свабодным агентам, а напрыканцы студзеня 2024-га падпісаў доўгатэрміновы, што незвычайна для белфутбола, кантракт – ажно на тры гады – з «Іслаччу». За яе і выступае дагэтуль. За два сезоны нагуляў 34 матчы, у якіх адзначыўся 1 голам і 5 асістамі.

У вышэйшай лізе-2025 паўабаронца мае 11 матчаў і ўсяго адзін галявы пас – у матчы супраць «Смаргоні» (4:0) ў 13-м туры. То быў тэхнічны асіст у адзін дотык, ды яшчэ на пераможны першы мяч.

Увогуле ж Краўчанка – гулец ратацыі: у сярэднім праводзіць на полі 32 хвіліны за матч.

Краўчанка ведае, што такое выпрабаванні, прычым не толькі ў спорце. Сёння ён прабіваецца да футбольных мэтаў, а раней яму даводзілася яшчэ і змагацца за сваё каханне, якая ў сацсетках падпісвае сябе як Ульчык (хутчэй за ўсё, гэта скарачэнне ад імя Ульяна). У Instagram дзеўчына называе сабе рылсмэйкерам, а ў TikTok і Telegram займаецца блогерствам – 19,4 тысяч і 4,2 тысячы падпіснікаў адпаведна.

Атаку на сэрца дзяўчыны футбаліст вёў не адзін год. Пра гэта ў дэталях распавяла сама Ульчык у TikTok – відэа сабрало 2,1 мільёна праглядаў і амаль 160 тысяч падабаек.

Дзяўчына кажа, што ў школе была «піпец прыгажуняй». Сама яна так не лічыла, але так меркавалі аднакласнікі, якія «былі масава ў яе закаханыя». Быў у гэтым натоўпе і Краўчанка. З шостага класу ён выказваў дзяўчыне сваю зацікаўленасць, пачынаючы «ад дзіцячых абражалак» і сканчваючы тым, што віншваў Ульяну на ўсе святы. Аднойчы на 8 сакавіка, калі дзяўчына захварэла, футбаліст прачакаў яе пад дзвярыма тры гадзіны, каб аддаць падарунак.

Бліжэй да 10 класу гэтыя двое пачалі стасавацца больш шчыльна. Гулялі, хадзілі ў кіно. Але Ульяна «гэта зусім ніяк не ўспрымала», ёй было проста «цікава бавіць з ім час». Хлопец, вядома, хацеў стасункаў. Але дзяўчына яго «жорстка дынаміла, не асэнсоўвала сур’ёзнасць яго пачуццяў». Ёй было «проста пофіг».

Гэтак працягвалася год-паўтара. А ўлетку перад 11 класам у дзяўчыны «проста нешта пстрыкнула». Яна зразумела, што гэта «адзіны хлопец, які вызывае ў яе цікавасць і, напэўна, адзіны, хто яе калі-небудзь рэальна кахаў». Дзяўчына паклікала Краўчанку на размову – і ўжо ён яе «прадынаміў», зрэшты, ужо ў той жа дзень пад яе настойлiвасцю перадумаў і пагадзіўся на адносіны. Так і пачалі сустракацца па-сур’ёзнаму – ужо тры гады разам.

Цягам усё таго ж відэа Ульяна ледзь стрымлівае слёзы. Таму што называецца яно «мая гісторыя адносін на адлегласці» – пакуль хлопец гуляе ў футбол у Мінску, дзяўчына тры апошнія гады вучыцца ў Маскве. Пра тое, як яна трапіла ў расійскую сталіцу, таксама падрабязна распавядала ў TikTok. Відэа «заляцела» амаль на 131 тысячу праглядаў. І тут таксама сур’ёзная закрутка.

Дзяўчына доўга не магла вырашыць, куды ёй паступаць, пакуль не даведался пра квоты па-за агульным конкурсам для грамадзян краін так званай «СНД» у расійскія ВНУ. Курыруе гэту праграму арганізацыя «Рассупраца», якой належаць так званыя «Рускія дамы» – праз іх, па сутнасці, русіфіцыруюць Беларусь і іншыя краіны былога СССР.

Як раз у мінскім «Рускім доме» Ульяна і даведался ўсе падрабязнасці паступлення. Дзяўчына змясціла спасылку на праграму ад «Рассупрацы» ў сваім Telegram-канале, паабяцаўшы адказваць на ўсе пытанні зацікаўленых.

Яна звяртае ўвагу на некалькі «пераваг» паступлення па праграме «Рассупрацы». Напрыклад, адсутнасць неабходнасці здаваць цэнтралізаванае тэставанне ў Беларусі і адзіны дзяржаўны экзамен у Расіі (але ўступныя іспыты здаць усё ж давядзецца). А асабліва Ульчыка зацікавіла тое, што ў Расіі ўвогуле няма размеркавання – яна зрабіла на гэтым адмысловы акцэнт. У Беларусі, нагадаем, адпрацоўка абавязковая для «бясплатнікаў» і складае два гады. Даўно ходзяць размовы і пра адпрацоўку для «платнікаў».

Увогуле, тэме паступлення па праграме «Рассупрацы» дзяўчына прысвяціла не адно відэа. Вось, напрыклад, яшчэ адно з «перавагамі». У ім Ульяна кажа, што паступіць у расійскую ВНУ «было значна прасцей, чым у беларускую», і што гэта «проста ахрэніцельны ўзровень адукацыі, умовы для жыцця, шмат плюшак для студэнтаў і больш таннае жыццё, чым у Беларусі».

Карацей, дзяўчына футбаліста «Іслачы» калі не заклікае, то як мінімум рэкламуе ад’езд у краіну, што вядзе вайну, з мэтай пазбегнуць адпрацоўкі. Гэта моцна разыходзіцца з пазіцыяй лукашэнкаўскага рэжыму, які штогод ускладняе паступленне маладых беларусаў у замежныя навучальныя ўстановы. Напрыклад, у 2023-м скасавалі адтэрміноўку ад службы ў войску для хлопцаў, якія вучацца за мяжой, у тым ліку ў Расіі. А ў мінулым годзе zerkalo.io пісала пра праблемы 11-класнікаў з атрыманнем дакументаў, неабходных для паступлення за мяжу.

Вяртаючыся да стасункаў, пара паспяхова дае рады адлегласці. З некаторых публікацый дзяўчыны вынікае, што яна нават выбіраецца на матчы хлопца-футбаліста.

І, падобна, маладых вялікія сумесныя планы на будучыню – у жартлівай форме абяцаюць «дзеўкам-сучкам» панараджаць футбалістаў.

ВІДЭА