За топаў АПЛ ззяюць зусім юнакі – 15 і 16 гадоў. А што сёння ў ЧБ з маладымі талентамі?
Цікава, ці здзівіць вас адказ.
За апошні тыдзень у АПЛ адбылося некалькі гучных падзей, звязаных з вельмі маладымі футбалістамі. Рубен Амарым запрасіў трэнавацца з асновай «Ман Юнайтэд» 14-гадовага Джэй-Джэй Габрыэля. За «Арсенал» у матчы супраць «Лідса» (5:0) дэбютаваў 15-гадовы Макс Доўман – быў вельмі актыўным у атацы і паспеў зарабіць пенальці (што ў шэрагу крыніц залічваецца за асіст), які рэалізаваў Віктар Дзёкерэш. А «Ліверпулю» ў вар’яцкім матчы з «Ньюкаслам» (3:2) прынёс перамогу гол 16-гадовага Рыа Нгумохі на 10-й дададзенай хвіліне. Гэты хлопец стаў другім самым маладым аўтарам пераможнага гола ў гісторыі лігі – на першым месцы, між іншым, Уэйн Руні.
«Ліверпуль» не будзе шукаць замену Луісу Дыясу – на яго пазіцыі запальвае 16-гадовы Рыа Нгумоха
Сусветныя топ-клубы даюць шанцы непаўналетнім гульцам у найлепшай лізе планеты. Напэўна, яны вундеркінды. Можа, такія знойдуцца і ў Беларусі? Давайце паглядзім на самых маладых гульцоў вышэйшай лігі ў гэтым сезоне.
Мікіта Раманаў, «Мінск»
Форвард-выхаванец дэбютаваў за «гараджан» у першым матчы ЧБ-2025 супраць «Нафтана» (1:2) – выйшаў на замену на 80-й хвіліне. На той момант хлопцу было 17 гадоў, 10 месяцаў і 27 дзён. Пасля Раманаў згуляў яшчэ ў трох сустрэчах: 12 хвілін супраць «Віцебска» у 2 туры (2:1) ды па хвіліне супраць «Маладзечна» (4 тур, 3:2) і «Гомеля» (5 тур, 1:0), галявымі дзеяннямі не вызначаўся. На гэтым досвед Д1 для хлопца скончыўся.
Таксама юнак выступаў за «Мінск-2» у першай лізе. Там на яго рахунку 7 матчаў (80 хвілін на полі ў сярэднім) і адзін гол – прыгожым ударам з дальняй дыстанцыі ў дададзены час прынёс перамогу над «Паперпрамам» (1:0) у 8 туры Д2.
Паводле інфармацыі інсайдара Арсеня Iсаенi, у ліпені Раманаў знаходзіўся на праглядзе ў другой камандзе расійскага «Растова». З таго часу ён не трапляў у заяўку каманд «Мінска». Але на днях клубная прэс-служба паведаміла пра выклік цяпер ужо 18-гадовага Раманава як свайго гульца ў зборную Беларусі U-19.
Прохар Струк, «Мінск»
Яшчэ адзін форвард-выхаванец «гараджан». Таксама дэбютаваў у першым матчы супраць «Нафтана» – ва ўзросце 17 гадоў, 10 месяцаў і 21 дзень. Атрымаў дзве хвіліны супраць «нафтавікоў» і яшчэ адну ў матчы з «Віцебскам» у наступным туры, нічым адзначыцца не паспеў і з Д1 на тым скончыў.
Большы гульнявы час Струк мае ў першай лізе. Там у яго 6 матчаў за «Мінск-2» (45 хвілін у сярэднім на полі), галявая перадача ў матчы з «Оршай» (1:1) i забіты мяч у браму «Астраўца» (1:4), дзе гулец злавіў кіпера супернікаў на далёкім выхадзе і закінуў «за каўнер».
Выступаў Струк і за зборныя ад U-15 да U-17, у апошнюю выклікалі ўвосень 2023 года.
Захар Драчоў, «Мінск»
Паўабаронца правёў дэбютны матч за родную каманду, не паверыце, у 1-м туры супраць «Нафтана». На той момант яму было 16 гадоў, 10 месяцаў і 22 дні – гэта трэцяе месца ў спісе самых маладых дэбютантаў «гараджан» за ўвесь час. З таго моманту правёў яшчэ 7 сустрэч у вышэйшай лізе і адзін матч у Кубку, сумарна нагуляўшы за аснову «Мінска» 105 хвілін без галявых дзеянняў.
Выступае Драчоў і за «Мінск-2» у першай лізе. Там у яго 8 матчаў (77 хвілін у сярэднім), галявая перадача з «Юні» (1:1) і гол, які дапамог нечакана абыграць адну з галоўных сенсацый сезона ў Д2 – «Баранавічы» (2:1).
Драчова выклікалі ў юнацкія зборныя Беларусі U-16 і U-17. Апошні раз трапляў у U-17 на «Кубак Развіцця» ў Мінску ў лютым 2025-га.
Раман Грыцкевіч, «Слуцк»
Злева на фота
За аснову слуцкага клуба форвард дэбютаваў яшчэ ў сезоне-2024: выйшаў на дзве хвіліны ў 18-м туры супраць «Дняпра» (3:2) ва ўзросце 16 гадоў і 4 дзён і стаў шостым самым маладым дэбютантам за ўсю гісторыю лігі.
У ЧБ-2025 Грыцкевіч стаў самым маладым яго ўдзельнікам. Хлопцу далі 11 хвілін на пазіцыі атакуючага паўабаронцы ў чэрвеньскім матчы 14-га тура супраць «Арсенала» (0:3), але ў небяспечных момантах ён не засвяціўся. Пазней маладога футбаліста выпусцілі на хвіліну ў 1/16 фіналу Кубка супраць «Астраўца» (3:0).
Таксама Грыцкевіч гуляе за «Слуцк-2», які выступае ў зоне дублёраў у Д3. Па выніку першага этапу ён стаў найлепшым бамардзірам каманды – 6 галоў за 17 матчаў.
Нягледзячы на статус аднаго з самых маладых футбалістаў у гісторыі ЧБ, у зборныя Грыцкевіч не вызываецца. Правёў толькі адзiн матч за U-15 у 2023 годзе: 15 хвілін на полі падчас разгрому ад аднагодак з Расіі (1:5).
Хто яшчэ вылучаецца?
Астатнія футбалісты з топ-10 самых маладых футбалістаў ЧБ-2025 – паўналетнія:
- Павел Апяцёнак (абаронца, «Дынама» Мінск) – узрост на момант першага матчу: 18 год і 9 дзён;
- Арсень Юшкевіч (паўабаронца, «Маладзечна») – 18 год і 23 дні;
- Дзяніс Аўсяннікаў (нападнік, «МЛ Віцебск») – 18 год, 1 месяц і 14 дзён;
- Данііл Галята (паўабаронца, «МЛ Віцебск») – 18 год, 1 месяц і 27 дзён;
- Цімафей Сіманенка (нападнік, «Мінск»/«Гомель») – 18 год, 3 месяцы і 14 дзён;
- Данііл Пясняк (паўабаронца, «Віцебск») – 18 год, 4 месяцы і 26 дзён.
Абаронца «Дынама» Апяцёнак ў бягучым чэмпіянаце нагуляў 12 матчаў, адзначыўся 1 голам і 1 асістам. 17 жніўня выбухнуў інсайд, што ім цікавяцца італьянскі «Кальяры» і бельгійскі «Андэрлехт».
Аўсяннікаў з «МЛ Віцебск» дэманструе добрую статыстыку: 13 матчаў за аснову, 2 гола і 2 асіста ва ўсіх турнірах. 27 жніўня bel.football паведаміў, што нападнік найбліжэйшым часам пяройдзе ў кіпрскі «Арыс», клуб, звязаны з «МЛ», які яшчэ і мае беларускага трэнера Арцёма Радзькова.
Сіманенка – самы выніковы футбаліст ва ўсім топе. Ён дэбютаваў за «Мiнск» яшчэ 2 чэрвеня 2023 года, калі выйшаў на замену ў матчы з брэсцкім «Дынама» ва ўзросце 16 гадоў, 6 месяцаў і 6 дзён. Гэта 2-е месца ў спісе самых маладых дэбютантаў клуба, у меншым узросце быў толькі Іван Бахар (16 год, 4 месяцы і 19 дзён).
У 2025-м Сіманенка адзначыўся 2 галамі і 3 асістамі ў 18 матчах за аснову «Мінск» ва ўсіх турнірах. За другую каманду «гараджан» у Д2 мае 4 матчы, 1 гол і 1 асіст. У жніўні форварда набыў «Гомель». Там ён паспеў згуляць 2 матчы ў ЧБ: вызначыўся асістам са «Славіяй» (1:2) і голам з БАТЭ (2:3). Сумарна гэта 4 гола і 5 асістаў на сезон – няблага як для юнака, але сам ён перад сезонам ставіў мэту аформіць 10 мячоў.
Сіманенка трапіў у канчатковы спіс зборнай Беларусі U-21 на стартавыя матчы адбору Еўра-2027 супраць Бельгіі (4 верасня) і Аўстрыі (8 верасня). Нагадаем, што перад моладзеўкай паставілі задачу кваліфікавацца на турнiр.
Іншыя пасты карыстальніка
