Футбол з беларусамі супраць канцэртаў Каржа ў Казахстане: год таму сарваў двойчы, ставіць пад пагрозу і цяпер

Пасля скандальнага канцэрту ў Варшаве беларускі музыка Макс Корж збіраўся выступаць на стадыёне «Цэнтральны» ў казахстанскім Алматы. Імпрэзу прызначылі на 6 верасня гэта года. Але 27 жніўня «Дырэкцыя спартовых збудаванняў» горада паведаміла, што музыкі не будзе.

Падставай для рашэння назвалі тое, што за тыдзень да канцэрту няма ўсіх неабходных дакументаў, што робіць немагчымым правядзенне як з юрыдычнага, так і тэхнічнага боку – на падрыхтоўку стадыёна патрэбна 10-20 дзён.

Таксама ў дырэкцыі згадалі, што рэгулярная правядзенне маштабных канцэртаў можа негатыўна паўплываць на газон. І дадалі, што ў найбліжэйшы час «Цэнтральны» будзе выкарыстоўвацца па профілі – прымаць матчы «Кайрата» з Аляксандрам Мартыновічам і Валерам Грамыкам у асноўным этапе Лігі чэмпіёнаў. Гэта, паводле чыноўнікаў, «вымагае бездакорнай падрыхтоўкі арэны».

Як БАТЭ заняпаў, беларусаў у Лізе чэмпіёнаў увосень амаль няма. Але цяпер прадраліся двое – вельмі дапамаглі свайму клубу

Канцэрт Каржа ў Алматы скасоўваюць не першы раз з футбольных прычын. Імпрэза павінна была адбыцца яшчэ ўвосень 2024 года, але ўжо тады праз матчы яе адмянілі двойчы. Што цікава, у кожным выпадку «вінаватымі» былі клубы з беларусамі ў складзе.

Першы раз Корж паведаміў пра адмену канцэрта ў Алматы на пачатку верасня 2024-га:

– Па тэхнічных прычынах правядзенне канцэрта не ўяўляецца магчымым. Увесь час усплываюць матчы, якія не даюць дастатковай колькасці дзён, каб падрыхтаваць усё да магутнага адрыву, – напісаў артыст.

Спачатку імпрэза была запланаваная на 28 верасня. Але на наступны дзень на стадыёне меў адбыцца фінал Кубка Казахстана. За трафей змагаліся «Атырау» беларускага трэнера Віталя Жукоўскага і футбалістаў Ягора Хаткевіча, Ігара Стасевіча, Мікіты Сцяпанава і Мікалая Сігневіча – супраць «Актабэ» абаронцы Дзмітрыя Бяссмертнага.

«Атырау» вёў у ліку амаль увесь матч дзякуючы голу на 24-й хвіліне ад Сігневіча з перадачы Стасевіча (1:28). Але акцюбінцы адгуляліся на 89-й са спрэчнага пенальці (5:47) і ў наступнай атацы праз хвіліну забілі пераможны (8:10). Драматычная канцоўка стала альтэрнатывай канцэрту Каржа.

Пасля фінальнага свістку таксама было горача. Футбалістам «Атырау» не спадабалася рашэнне арбітра аб 11-метровым. Асабліва гарачыўся Сігневіч: назваў суддзяў «гуртом у блакітных купальніках» і выдаў спіч-лаянку пра тое, як галоўны з брыгады «абасраўся». Праз некалькі дзён беларус выбачыўся за свае словы. Але трафея, які быў прайграны за дзве хвіліны, гэта не вярнула.

Перанесены праз фінал Кубка Казахстана канцэрт Каржа запланавалі на 5 кастрычніка 2024-га. Але 3 кастрычніка «Цэнтральны» прымаў гульню асноўнага этапу Лігі канферэнцый. Сустракаліся «Астана» (яе стадыён у сталіцы закрылі на рэканструкцыю) Макса Эбонга з сербскім ТСЦ. Перамаглі ў выніку казахі – 1:0 дзякуючы голу ў першым тайме (0:24). Беларускі паўабаронца адгуляў матч цалкам.

У гэтым годзе еўракубкавыя матчы на родным стадыёне будзе прымаць ужо сам «Кайрат». Першы тур Лігі чэмпіёнаў запланаваны на 16-18 верасня, то бок дзесьці праз 10 дзён пасля скасаванага канцэрту Каржа. Але яшчэ невядома, будзе ён хатнім ці гасцявым. Лёсаванне галоўнага клубнага турніру Еўропы адбудзецца 28 жніўня ў 19:00 па беларускім часе.

Тым часам у фан-суполцы Каржа ў Instagram апублікавалі заяву арганізатараў канцэрта ў Алматы – яе да сябе рэпостнуў і сам артыст. Гаворцыцца, што ўсе неабходныя дакументы ад гарадскіх уладаў у наяўнасці, адміністрацыйных падстаў для скасавання імпрэзы «не можа быць» і што падрыхтоўка да яе ідзе напоўніцу. «Зараз мы разбіраемся ў сітуацыі», – кажуць у паведамленні.