Хлопцу з Брэста няма і 15, а ў яго – 52-і памер нагі (толькі гляньце на красовак!) і рост 2+ метры. Ужо адзін з самых высокіх у белбаскеце
І ўвогуле ў краіне такіх гігантаў няшмат.
На мінулым тыдні брэсцкі праект «Інавацыі спорту», які займаецца трэнінгамі на каардынацыю спартсменаў, у сваім Instagram-акаўнце на 205 тысяч падпіснікаў распавёў пра незвычайныую антрапаметрыю аднаго з падапечных – баскетбаліста Іллі Шведа. У жніўні хлопцу споўніцца толькі 15, але ўжо сёння ён мае 52,5 памер нагі! Так выглядае красовак гульца – гэта не нейкі камедыйны інвентар.
Выхаванец брэсцкага баскетбола гуляе на пазіцыі форварда і апроч вялікай ступні вылучаецца сярод аднагодак ростам. Вось фота з найлепшымі баскетбалістамі першынства юнакоў 2009-2010 года нараджэння ў Гомелі ў красавіку. Там Ілля выступаў за каманду Брэсцкай вобласці і трапіў у сімвалічную пяцёрку турніра.
А вось кадр з «фіналу чатырох» ЧБ у той жа ўзроставай катэгорыі ў траўні. Тут Швед выступаў ужо за «Прынямонне» з Гродна, куды перабраўся восенню 2024 года, і быў прызнаны самым выніковым баскетбалістам у спаборніцтве, у якім яго каманда стала пераможцам.
Яшчэ Швед выступае за зборную Беларусі U-16 (так, у няпоўныя 15) – і там, калі верыць вачам, ён самы высокі.
Магчыма, дзесьці ў Беларусі і адшукаецца большы юніёр, але менавіта Швед можа пахваліцца дэбютам у дарослым чэмпіянаце Беларусі: 10 матчаў у сезоне-2024/25 і 20 пунктаў у складзе «Гродна-93-ГрДУ» – гэта моладзеўка пераможцы апошняга ЧБ «Гродна-93», якая заняла агульнае 7-е месца ў апошнім турніры (так, юнакі гуляюць разам з дарослымі).
Праз досвед на дарослым узроўні рост Шведа адлюстраваны на сайце БФБ. І цяпер мы ведаем, што габарытамі ён вылучаецца не толькі сярод аднагодак: ажно 203 сантыметры – гэта найвялікшы паказнік у моладзеўцы «Гродна-93». Бліжэйшыя «пераследвальнікі» Кірыл Ткачэнка і Дзмітрый Навуменка меншыя на 1 см, але яны старэйшыя: першаму 16 гадоў, другому 21.
Окей, Швед самы высокі ў другім складзе гродненцаў. А ў лізе? Калі падсумаваць звесткі па ўсіх камандах таго ж сайту БФБ (заўважым, што там рост пазначаны не ўва ўсіх прафайлах) – у свае 14 ён ніжэйшы толькі за дзевецярых баскетбалістаў ЧБ. Вышэйшыя за маладога брастаўчаніна шасцёра суайчыннікаў (сярод іх два аднаклубнікі з асновы «Гродна-93») і тры легіянеры. Усе яны на некалькі год, а то і не на адно дзесяцігоддзе старэйшыя за Шведа:
● Уладзіслаў Мароз («Мінск», форвард, беларус, 24 гады) – 210 см
● Глеб Бігун («Мінск», форвард, беларус, 21 год) – 209 см
● Мікіта Шчурат («Барысфен», форвард, расіянін, 22 гады) – 209 см
● Кірыл Вінакураў («Гродна-93», цэнтравы, беларус, 25 гадоў) – 207 см
● Канстанцін Паско («Мінск», форвард, беларус, 22 гады) – 206 см
● Жаэль Бандамба («Гомельскія рысі», цэнтравы, кангалезец, 22 гады) – 205 см
● Нікола Джурыч («Гродна-93», цэнтравы, серб, 34 гады) – 204 см
● Назар Фархадаў (РЦАП-СДзЮШАР, разыгрываючы, беларус, 19 гадоў) – 204 см
● Антон Вашкевіч («Імпульс-БДУІР», цэнтравы, беларус, 31 год) – 204 см
Cамы высокі баскетбаліст ЧБ проста цяпер Уладзіслаў Мароз неяк дзякуючы росту займеў легендарнае фота. У 2018 годзе, з'яўляючыся вучнем коледжу ў ЗША, ён сфатаграфаваўся з самым нізкім гульцом (160 см) у гісторыі НБА – Магзі Богзам. Мабыць, калісьці такі кадр будзе і ў Шведа.
З кім яшчэ можна параўнаць Шведа? Высокіх любяць у валейболе. Там, як і ў баскетбольным ЧБ, не ва ўсіх гульцоў можна адшукаць звесткі пра рост. Але, напрыклад, у салігорскім «Шахцёры» адразу ў шасцёх ён вышэйшы, чым у Шведа. Самыя высокія – 26-гадовы беларускі дыяганальны Пётр Мінянкоў і 27-гадовы расійскі цэнтральны блакавальнік Кірыл Кранін – па 210 сантыметраў.
Пётр Мінянкоў
Можна меркаваць, што ўжо цяпер Швед уваходзіць у пералік самых высокіх спартсменаў Беларусі – а яму толькі-толькі споўніцца 15. Цікава, да якога паказніку хлопец дарасце.
Іншыя пасты карыстальніка
