На пляжным ЧС на Сейшэлах зборная Беларусі гуляе на той жа арэне, што і год таму ў Дубаі. Вось як яна адолела 3 тысячы км
Тады было 4-е месца, а сёння гавораць пра большае.
1 траўня на Сейшэльскіх астравах стартаваў чэмпіянат свету па пляжным футболе. У ім бярэ ўдзел і зборная Беларусі, якая ўжо амаль забяспечыла сабе месца ў плэй-оф дзякуючы перамогам над гаспадарамі турніра і Японіяй.
Цяперашні ЧС – усяго толькі чацвёрты для беларускай зборнай. Але прадстаўнікоў нашай краіны ўжо ўключаюць у лік трох галоўных фаваратыў турніра. Вера букмекераў базуецца і на папярэднім планетарным першынстве, якое праходзіла ў мінулым годзе ў Аб'яднаных Арабскіх Эміратах. Там беларусы выдалі рэкордны для сябе вынік – сталі чацвёртымі.
Што атрымаецца гэтым разам, сказаць складана, але ёсць адна рэч, якая вельмі шчыльна звязвае гэты турнір з тым, што адбываўся год таму. Па факце, каманды спаборнічаюць на тым самым стадыёне, хоць ад Сейшэлаў да ААЭ больш за 3 тысяч кіламетраў. Вось як гэта атрымалася.
Увогуле, любы чэмпіянат свету ёсць нагодай для развіцця футбольнай інфраструктуры. Прыгадаць хаця б апошні мундыяль у Катары і колькі стадыёнаў там было збудавана літаральна з нуля.
Смотрим на стадионы ЧМ-2022: есть в виде бедуинского шатра, парусов и национального головного убора
Тое ж тычыцца пляжнага футбола. Адмысловую арэну пад ЧС будавалі ў 2021 годзе ў Расіі, у мінулым годзе – у ААЭ. У Эміратах, дзе пляжны чэмпіянат свету прымалі другі раз ад моманту пачатку правядзення турніру ў 2009 годзе, вырашылі адзначыцца – і пабудавалі The Paradise Arena («Райская Арэна») на 3,5 тысячы гледачоў за рэкордныя 25 дзён. Звычайна, як пісала газета Khaleej Times, такія аб'екты вымагаюць 2-3 месяцаў.
– Гэта найлепшы стадыён і найлепшыя ўмовы ў гісторыі чэмпіянату свету. Мясцовыя ўлады працавалі да подзняй ночы, каб быць упэўненымі, што мы паспеем у тэрмін. Тое, што адрознівае The Paradise Arena ад папярэднікаў – якасць матэрыялаў і высокі дах [над цэнтральнай трыбунай]. Таксама вы бачыце вялікую колькасць маленькіх дэталяў з асвятленнем, другі паверх LED-экранаў. У нас будзе выдатнае музычнае і светлавое шоў, – абяцаў дырэктар турніраў ФІФА Хайме Гансалес.
У The Paradise Arena – асаблівая канструкцыя. Пляцоўка была збудаваная модульным спосабам, то бок элементы загадзя вырабілі на заводзе, а пазней даставілі і сабралі на месцы, чым і тлумачыцца звышхуткасць будаўніцтва. Падобным чынам у апошняе дзесяцігоддзе папулярна «збіраць» як аднапавярховыя жылыя дамы, так і хмарачосы. Ёсць і футбольныя «прэцэдэнты» – 40-тысячны стадыён «Рас-Абу Абуд» (ці «Стадыён 974»). Арэна была збудаваная пад ужо згаданы ЧС-2022 у Катары, а калі матчы на ім скончыліся – гэтак жа лёгка дэмантаваная.
Пасля пляжнага ЧС-2024 «Райскую Арэну» ў Дубай таксама разабралі. Але яна, у адрозненні ад катарскага стадыёна, не знікла з канцамі. Проста пераехала на Сейшэлы і змяніла кантынентальную прыналежнасць – цяпер месціцца не ў Азіі, а ў Афрыцы.
Да новай лакацыі пляжны стадыён дастаўлялі водным шляхам. Змясцілася пляцоўка ў 38 кантэйнераў. Першапачаткова «падарожжа» было запланаванае на 16-28 лютага, але, відаць, нешта змянілася – модульная арэна прыбыла на Сейшэлы, як пісала мясцовае Seychelles Nation, 12 сакавіка. А ўжо праз два дні пачаўся мантаж.
Цяпер «Райская арэна» месціцца на найбуйнешым востраве Сейшэлаў Маэ, у адміністрацыйным раёне Рош-Кайман сталіцы Вікторыя. З мясцовых элементаў – толькі фундамент, пясок і крэслы, якія змянілі колеры сцяга ААЭ на сейшэльскія. У астатнім гэта той жа самы стадыён, які быў год таму ў Дубаі.
Адзінае, што не ўдалося паўтарыць за Эміратамі на Сейшэлах – хуткасць будаўніцтва. 5 красавіка, пасля 21 дня мантажа, Seychelles Nation са спасылкай на дырэктара турніраў ФІФА Гансалена пісала пра гатоўнасць арэны на 74%. 11 красавіка, калі дубайскі рэкорд ужо сплыў, на сайце прэзідэнта Сейшэлаў Вэйвела Рамкалавана паведамлялася пра 87% гатоўнасці стадыёна і інфраструктуры.
Афіцыйна The Paradise Arena была адкрытая 30 красавіка, за дзень да старту ЧС, калі прэзідэнт краіны ўручыў кіраўніку ФІФА алімпійскіх відаў, пляжнага футбола і футзала Касру Хагігі сертыфікат аб прыёме стадыёна ў эксплуатацыю.
Прэзідэнт Сейшэльскіх астраввоў Вэйвел Рамкалаван (злева) і Касру Хагігі
Пасля чэмпіянату свету «Райская арэна» не выправіцца ў новую вандроўку. Як пазначана на сайце ФІФА, стадыён застанецца на Сейшэлах і стане аб'ектам грамадскага выкарыстання і пастаяннай спадчынай 13-га ў гісторыі пляжнага чэмпіянату свету пад эгідай ФІФА.
Іншыя пасты карыстальніка
