О’Саліван паказаў найлепшы брэйк у гісторыі прафесійнага снукера – да абсалютнага максімума не хапіла ўсяго двух пунктаў

50-гадовы Роні О’Саліван зноў зрабіў нешта невераемнае. У чвэрцьфінале World Open у кітайскім Юйшані ён сабраў брэйк у 153 пункты – найлепшы вынік у гісторыі прафесійнага тура. Але як гэта магчыма, калі максімум – 147?

ВІДЭА

Рэч у тым, што супернік О’Салівана – Раян Дэй – памыліўся ў першым фрэйме, і суддзя даў англічаніну свабодны шар – магчымасць згуляць любы шар як чырвоны. Гэта дае дадатковую звязку «чырвоны + каляровы» і адкрывае шлях да вынікаў вышэй за 147. О’Саліван рэалізаваў сітуацыю амаль ідэальна. Ён пачаў з «дадатковага» шара (зялёны як чырвоны), затым забіў чорны і перайшоў да класічнай серыі: 15 чырвоных з каляровымі, у асноўным выбіраючы чорны, пасля чаго зачысціў стол. Адзінае, што аддзяліла яго ад абсалютнай мяжы, – два ружовых замест чорных. У выніку – 153 ачкі, усяго на два менш за тэарэтычны максімум у 155.

Да гэтага адзіным брэйкам вышэй за 147 на прафесійным узроўні заставаўся 148, які ў 2004 годзе зрабіў Джэймі Бёрнета.

Сам матч пасля гэтага фактычна быў вырашаны. О’Саліван не пакінуў Дэю шанцаў і закрыў сустрэчу з лікам 5:0. Пасля матча ён паўтарыў легендарнае фота Уілта Чэмберлена, зробленае пасля стопунктавага матча ў 1962-м.

У складаным паўфінальным матчы О’Саліван перамог кітайца У Іцзэ (6:5). У фінале яго чакае сустрэча з тайцам Тэпчаяй Ун Ну, які перамог амерыканца Джада Трампа (6:4).