Амерыканец Малінін адзіны ў свеце круціць чацвярны аксель, а яшчэ ў яго арсенале забароненае доўгі час сальта

Іллі Малініну 21 год. Ён нарадзіўся ў ЗША ў сям’і вядомых фігурыстаў расійскага паходжання Таццяны Малінінай і Рамана Скарнякова, якія выступалі за Узбекістан. Свабодна гаворыць па-руску і па-англійску, але выступае за ЗША – паводле месца нараджэння. Алімпіяда ў Італіі для яго першая, і прыехаў Малінін туды не проста ўдзельнікам, а дзейным чэмпіёнам свету (2024, 2025) і галоўным фаварытам.

У Малініна адна з самых складаных праграм з тэхнічнага пункту гледжання. Ён першы і пакуль адзіны фігурыст у свеце, хто чыста выканаў чацвярны аксель. Гэта чатыры з паловай абароты ў паветры. У адрозненні ад іншых скачкоў, аксель пачынаецца тварам наперад, а прызямленне адбываецца спінай – адсюль «палавіна» абароту і дадатковая складанасць. Доўгі час гэты элемент лічыўся фактычна немагчымым.

Але справа не толькі ў скачках. Малінін амаль адзіны, хто выконвае сальта назад на афіцыйных стартах. Гэты элемент забаранілі яшчэ ў 1976 годзе пасля выканання Тэры Кубічкам – федэрацыя палічыла яго занадта траўманебяспечным. У 1998 годзе на Алімпіядзе ў Нагана Сурыя Баналі рызыкнула і ўсё ж зрабіла сальта, нягледзячы на забарону. Афіцыйна абмежаванне знялі толькі ў 2024 годзе, хаця француз Адам Сяо Хім Фа выконваў гэты элемент і раней. На Алімпіядах жа пасля Баналі сальта ніхто не рабіў. Малінін наважыўся першым за 26 гадоў.

Варта адзначыць, што гэты элемент — хутчэй пра відовішчнасць: ён не прыносіць балаў і не ўваходзіць у лік шасці асноўных скачкоў, якія ацэньваюцца пры выступе фігурыстаў.

На алімпійскі лёд у Італіі Малінін упершыню выйшаў 7 лютага – у кароткай праграме каманднага турніру. Чацвярны аксель быў заяўлены, але ў выніку справа абмежавалася трайным. У пратаколе амерыканец саступіў больш за 10 балаў японцу Юме Кагіяме, аднак зборная ЗША ўсё адно заваявала золата – у тым ліку дзякуючы выступленню Малініна.

З трыбун за гэтым назіраў Новак Джокавіч – і застаўся ўражаны.

8 лютага Малінін стаў алімпійскім чэмпіёнам у камандным турніры. 10 лютага выгуляў кароткую праграму асабістых спаборніцтваў – зноў без чацвярнога акселя. У адвольнай праграме, якая адбудзецца 13 лютага, у яго заяўлена адразу сем чацвярных скачкоў, у тым ліку аксель.

Цікава, што яшчэ да пачатку Гульняў яго выступленнямі захапляўся Снуп Дог. Рэпер пабываў на трэнінгу Малініна ў футболцы з выявай спартсмена.

«Чувак, я сапраўды страціў дар маўлення. Перада мной сапраўдная легенда», – сказаў Снуп.

ВІДЭА