Фаны суперніка нібыта крычалі Шпілеўскаму «здохні ад раку». Беларус абурыўся, а адзін заўзятар ледзь не расплакаўся
Мясцовых гісторыя не вельмі ўразіла.
«Арыс» Аляксея Шпілеўскага працягвае ісці ў топах вышэйшай лігі Кіпра. За пяць тураў да канца першага этапу чэмпіянату, пасля якога 14 каманд падзеляцца на дзве групы ў фармаце (адны будуць змагацца за чэмпіёнства, іншыя за выжыванне), клуб беларуса ідзе на другім радку, фактычна забяспечыўшы сабе удзел у «чэмпіёнскай групе».
Тым не менш непрыемнасці на сонечным Кіпры ў Шпілеўскага здараюцца. Вось як, напрыклад, 1 лютага пасля матчу супраць «Неа Саламіна», які ідзе перадапошнім.
Выязная сустрэча з аўтсайдарам скончылася для «Арыса» нічыёй 2:2, прычым пасля першага тайму лімасольцы саступалі 0:2. Але не пра вынік са злосцю гаварыў Шпілеўскі пасля матчу:
– Перад тым, як размаўляць пра футбол, я скажу пра атмасферу на матчы. Я не магу гэта прыняць. Пасля матчу яны зноў кідаліся рэчамі ў маіх асістэнтаў. Два чалавекі супраць 50...
А што я чуў цягам усіх 90 хвілін сустрэчы? Не ведаю, што за хворыя людзі тут на стадыёне, але вы павінны нешта зрабіць супраць гэтага. Пры ўсёй павазе, тут запас [майго цярпення] сканчваецца.
Што адбываецца тут на стадыёне, людцы?! Слухаць «здохні ад рака», [нешта] пра маць, бацьку – сур'ёзна?! Я не хачу размаўляць пра футбол! – заявіў Шпілеўскі, але пазней ўсё ж адказаў на некалькі пытанняў.
Гэты расповед не вельмі ўразіў мясцовых журналістаў. Яны нават не папрасілі пракаментаваць сітуацыю ў галоўнага трэнера гаспадароў. Але працяг гісторыя атрымала, калі 4 лютага ў прамы эфір кіпрскага радыё Supersport 104 пазваніў жыхар Саламіна.
Мужчына, якога звалі Гектар абурыўся рэплікай выкрыкамі «здохні ад раку» і заклікаў кіраўніцтва «Неа Саламіна» выступіць з асуджэннем інцыдэнту, а ўсіх, хто зычыў Шпілеўскаму такой смерці, – выбачыцца. Таксама мужчына распавёў, што праз анкалогію ён страціў жонку і яшчэ некалькіх блізкіх. Напрыканцы аўдыёдарожкі чутна, што Гектар ледзь не плача.
Па стане на сёння ніякіх выбачынняў ад «Неа Саламіна» не прагучала – затое ёсць такі допіс у Instagram ад 3 лютага, адрасаваны фанатам. Так, імі ганарацца.
Але ў сваіх сацсетках мужчыну падтрымаў Аляксей Шпілеўскі:
«Божа, блаславі цябе, Гектар! Хацеў бы сустрэцца на трыбунах з вялікай колькасцю такіх людзей, як ты», – напісаў Шпілеўскі ў Instagram.
Адметна, што прамова мужчыны на радыё і рэакцыя Шпілеўскага з'явіліся ў міжнародны дзень барацьбы з ракавымі захворваннямі, які адзначаецца штогод 4 лютага. Усё той жа «Неа Саламіна» ніяк не адрэагаваў на інфанагоду, а вось «Арыс» беларускага трэнера ўжо некалькі год супрацоўнічае з Нямецкім анкалагічным цэнтрам у Лімасоле. 30 студзеня клуб арганізаваў спецыяльнае мерапрыемства сумесна з медыцынскім партнёрам, у якім паўдзельнічаў і Шпілеўскі. Па выніках акцыі больш за 90 чалавек сталі донарамі крыві – ім падарылі сертыфікаты на наведванне пяці хатніх матчаў «Арыса».
«Арыс» увогуле даволі актыўны ў сацыяльным накірунку – пра іншую ініцыятыву мы распавядалі яшчэ ў мінулым годзе.
Іншыя пасты карыстальніка
