Сціпла з галамі, затое месца ў табліцы – цалкам ок, а самы яркі легіянер кажа пра падабенства да «Барсы». Такі вось БАТЭ перад класіка
Пакуль аб «Дынама» выціраюць ногі.
19 красавіка ў 5-м туры вышэйшай лігі адбудзецца першае беларускае класіка сезона-2025. Пра тое, з чым падыходзіць да некалі прынцыповага супрацьстаяння мінскае «Дынама», мы ўжо распавядалі: 12-е месца ў табліцы, сенсацыйны разгром ад «Славіі» (0:3) і хамская лупцоўка ад так званага міністра спорту.
Мінчукоў фактычна замкнулі на базе ў «Стайках» і па наказу чынушы істотна падвысілі нагрузкі. Нельга выключаць, што матч у суботу будзе лёсавызначальным для галоўнага трэнера «Дынама» Вадзіма Скрыпчанкі.
Тым часам у БАТЭ настрой перад выездам куды лепшы. Пасля правальнага мінулага сезона, дзе было антырэкорднае за ўсю гісторыю клуба 8-е месца, старт цяперашняга чэмпіянату атрымаўся цалкам прыстойным. На рахунку БАТЭ дзве перамогі пры паразе і нічыёй – і 4-ы радок у табліцы пры сямі пунктах. Год таму на тым жа адрэзку барысаўцы мелі на тры пункты менш (1 перамога, 1 нічыя і 2 паразы). Можна нават асцярожна сказаць, што на сёння каманда апраўдвае перадсезонны аптымізм боса Андрэя Капскага, хоць агучаная мара пра медалі і застаецца прывіднай.
Некаторыя зімовыя падпісанні БАТЭ пакуль добра сябе праяўляюць, прычым у асноўным складзе. Напрыклад, Ілля Рашчэня (прыйшоў з «Гомеля») і Уладзіслаў Лях (з «Дынама» Брэст) – з імі абарона «жоўта-сініх» найлепшая ва ўсёй лізе проста цяпер: усяго 1 прапушчаны мяч за 4 матчы.
Але варта адзначыць, што той гол адбыўся ў выніку правалу абаронцаў і стаў вырашальным пры паразе ад «Іслачы» (0:1).
Таксама добра сябе паказвае 19-гадовы брамнік БАТЭ Арсень Скапец, хоць у матчы з «Маладзечнам» ён ледзь не прывёз (пашанцавала, што недарэчна згуляў форвард суперніка). На рахунку маладога кіпера, які праводзіць другі сезон у футболцы барысаўцаў, ўжо тры сухія матчы. У апошнім туры Скапец стаў галоўным героем каманды ў нічыйнай сустрэчы з «Гомелем» (0:0), здзейсніўшы шэсць сэйваў. Сярод іх – вось такі пасля небяспечнага ўдару са штрафнога ў канцоўцы сустрэчы.
Прыгожа брамнік згуляў і ў матчы 1-га тура з «Віцебскам» (1:0) – пацягнуў моцны ўдар з лёту.
А вось з атакай у БАТЭ на старце чэмпіянату дрэнна, і гэта напружвае, улічваючы ўзровень супернікаў: «Віцебск», «Іслач», «Маладзечна» і «Гомель» – звышмоцнымі калектывамі іх не назваць, а забіць барысаўцы здолелі толькі двойчы (па разу віцяблянам і вельмі сумным маладзечанцам.
2 галы за 4 туры – адзін з найгоршых паказнікаў ва ўсёй лізе. Столькі ж галоў, як барысаўцы, мае «Гомель» з 9-га месца, а меней – у перадапошняй «Смаргоні» (1) і найбліжэйшага суперніка (таксама 1, але «Дынама» не скончыла матч з «Нёманам»). А па паказніку чаканых галоў (xG) БАТЭ ўвогуле апошні ва ўсёй лізе – 2,41. Нават у апошняй «Смаргоні» і перадапошняга «Маладзечна» створаныя імі галявыя сітуацыі агулам важаць больш.
Лідарам бляклай атакі барысаўцаў на старце сезона выглядае 24-гадовы івуарыйскі форвард Яо Жан-Шарль. У Барысаў ён з прыгодамі прыехаў узімку, да таго збяжаўшы з расійскага «СКА-Хабараўск». Першапачаткова казалі пра пераход у мінскае «Дынама», але там ад трансферу адмовіліся.
Зрэшты, пакуль на рахунку Шарля толькі адно галявое дзеянне: асіст на пераможны матч супраць «Маладзечна».
У той жа гульні івуарыец пераправіў мяч у сетку, але гол скасавалі праз афсайд.
Галявых магло быць і болей, рэалізуй, напрыклад, гэты момант у матчы з «Віцебскам» Аляксандр Ануфрыеў.
Бачна, што ў барысаўскага легіянера добрае бачанне поля, ды і ўвогуле ён стварае шмат небяспекі для супернікаў. Таксама Жан-Шарль не баіцца самастойна вырашаць моманты, хоць з гэтым пакуль не шанцуе. Вось такія дзве магчымасці івуарыец меў супраць «Гомеля».
А яшчэ афрыканец запомніўся цікавым назіраннем. Нядаўна ён выпісаў камплімент на адрас галоўнага трэнера БАТЭ Івана Мігаля, параўнаўшы тактыку сваёй цяперашняй каманды – ні больш ні менш! – з тактыкай «Барселоны»!
З гэтым Жан-Шарль дакладна перабольшыў: татальнай дамінацыяй БАТЭ у чатырох матчах з сяраднякамі/аўтсайдарамі і не пахла. Ды і свой міжнародны ўзровень барысаўцы паказалі таварыскім матчам з расійскім «Зенітам» месяцовай даўніны, атрымаўшы паўнюткую торбу.
Гэтак жа недарэчна параўноўваць статыстыку беларускага клуба з іспанскім грандам. Пра найгоршы ў ЧБ паказнік xG мы ўжо абмовіліся, а «Барселона»,тым часам найлепшая па гэтым складніку ва ўсёй Ла Лізе. Паводле oddalerts.com, ад «блаўграны» чакалі 81 гол пасля 31 тура чэмпіянату Іспаніі, у рэальнасці ж забітых мячоў і таго болей – 84.
Але хто яго ведае, можа, у суботу мы ўбачым россып галоў БАТЭ і афсайдныя пасткі, якімі славіцца галоўны трэнер «Барсы» Ханс-Дзітэр Флік.
У пяці апошніх выяздных матчах супраць мінскага «Дынама» БАТЭ атрымаў 3 перамогі і 1 нічыю. Чым барысаўцы пацешаць лукашыста Кавальчука гэтым разам?
Іншыя пасты карыстальніка
