Беларус сыходзіць з польскага клуба пасля зусім ужо слабага сезону – а фаны так цёпла з ім развітаюцца. Вось у чым тут справа
Некаторыя называюць «найлепшым усіх часоў».
Увечары 24 траўня «Карона» з польскага Д1 паведаміла пра сыход беларускага форварда Яўгена Шыкаўкі, у якога сканчваецца кантракт у чэрвені. У клубе з Кельцаў 32-гадовы футбаліст правёў апошнія тры з паловай сезоны. Яго новае месца працы пакуль невядомае. Апошні год у «Кароне» атрымаўся для гульца зусім ужо пасрэдным, але развітваюцца з ім надзвычай цёпла. Тлумачым, чаму так.
Чуткі пра сыход Шыкаўкі з'явіліся яшчэ на пачатку года. Паводле польскіх СМІ ды інсайдараў, «Карона» ўжо тады вырашыла не працягваць кантракт і давала дазвол на пошук новай каманды яшчэ падчас зімовага перапынку. Усё праз дрэнныя паказнікі нападніка, які на той момант меў сціплыя два асісты за 18 матчаў у экстракласе ды дубль у браму рэзервістаў «Леха» ў 1/16 фіналу Кубка Польшчы.
«Карона» тым часам стаяла на парозе буйных змен – з гарадской уласнасці сыходзіла ў прыватную. Адбылося гэта на пачатку сакавіка, калі новым гаспадаром клуба стаў польскі тытунёвы бізнесмен.
У выніку Шыкаўка застаўся ў Кельцах да паўнавартаснага заканчэння кантракту. Вось толькі становішча беларуса, як і яго статыстыка, істотна не палепшылася. Нападнік не здолеў паўтарыць свой улюбёны трук з раскрываннем пасля Новага года – за наступныя 16 матчаў чэмпіянату дабраў толькі 3 (2+1) пункты па «гол+пас». Палову гэтых сустрэч (першыя восем пасля ўзнаўлення чэмпіянату) правёў, выходзячы на замену. У асноўны склад жа вярнуўся на фінальную частку сезона, калі і аформіў свае два галы ў чэмпіянаце Польшчы-2024/25 – запар засмуціў «Ягелонію» і «Катавіцэ».
Адметна, што ўпершыню за тры гады пасля вяртання ў Д1 «Карона» здолела пазбегчы барацьбы за выжыванне ў апошніх турах. Кельчукі скончыліся чэмпіянат на 11-м з 18 месцаў з 45 пунктамі. Але для самога Шыкаўкі сезон атрымаўся найгоршым за доўгі час. 4 гола і 3 асісты за 37 матчаў у Кубку (4) і чэмпіянаце Польшчы (33) – апошнім разам так мала было ў сезоне-2021: 2+2 за 26 матчаў у мінскім «Дынама» і карагандзінскім «Шахцёры».
Нягледзячы на цалкам правалены сезон, заўзятараў «Кароны» навіна пра сыход Шыкаўкі засмуціла. Толькі ў сторызах свайго Instagram нападнік рэпостнуў 25 публікацый фанатаў са словамі падзякі. Некаторыя называюць беларуса «легендай» і «GOATам» (абрэвіатура «Greatest Of All Time» – найлепшы ўсіх часоў). Багата сумных каментароў і ў твітары, і ў клубных сацсетках.
З чаго б гэта, калі ўлічваць такую сумную статыстыку?
Паводле водгукаў заўзятараў лёгка зразумець, адкуль у іх такі сантымент – у сезоне-2023/24 Шыкаўка быў сапраўды шыкоўным: выдаў найлепшы перфоманс за час легіянерства. Тады гулец дрэнна распачаў – за першую палову чэмпіянату адзначыўся ўсяго двойчы. Але ў выніку настраляў 10 галоў і здабыў і званне найлепшага бамбардзіра «Кароны», і званне найлепшага гульца каманды ў сезоне паводле заўзятараў. Столькі Шыкаўка не забіваў ні ў «Кароне», ні ў карагандзінскім «Шахцёры» (2+1 за 15 матчаў ў сезоне-2021), ні ў грэцкай «Ларысе» (2 гола за 17 гульняў у 2019 годзе). Але больш за ўсё гэта кельцаўскія фаны запомнілі іншае.
Перад апошнім турам экстракласы-2023/24 «Карона» знаходзілася ў зоне вылету. Каб захаваць прапіску ў элітным дывізіёне, была патрэбная перамога. А матч чакаўся вельмі цяжкі – на выездзе ў Познані супраць «Леха» з пятага радку. Песімізм падмацаваўся ў самым канцы першага тайма, калі гаспадары выйшлі наперад у дададзены час.
Але ў другім тайме надыйшоў «час Шыкаўкі». На 56-й хвіліне беларус зраўняў лік крыху нягеглым, але ўсё ж галявым ударам правай нагой.
А праз дзесяць хвілін ізноў забіў, ужо левай, – і вывеў «Карону» наперад!
Больш галоў у сустрэчы не было. Дзякуючы дублю беларуса «Карона» перамагла 2:1 і засталася ў эліце – і менавіта гэта цяпер з цеплынёў згадваюць фанаты.
matt_flowwie: «У маёй памяці назаўжды застануцца тыя два гола ў Познані, дзякуючы якім мы атрымалі перамогу. Дзякуй, Шыкі»
r.krzeszowski: «Дзякуй, Шыкі, за два галы ў Познані, але, на жаль, у гэтым сезоне было не так добра».
pioitur2031: «Мы цябе не забудзем. Не забудзем тыя 2 гола ў Познані, каб захавацца [ў эліце]. Дзякуй і ўдачы ў далейшай кар'еры»
ckppm_art: «Мы ніколі не забудзем»
Апошні матч Шыкаўкі за «Карону» прайшоў 24 траўня. Беларускі форвард у статусе капітана вывеў каманду ў апошнім туры супраць «Гурніка» – чацвёрты (і апошні раз) за час у Кельцах.
Шыкаўка адгуляў 74 хвіліны, сустрэча скончылася ўнічыю 1:1. Галявымі дзеяннемі форвард не адзначыўся, хаця забіць у развітальным матчы амаль атрымалася. Ужо на першай хвіліне Шыкаўка прымусіў памыліцца кіпера: той пад прэсінгам няўдала вынес мяч, які рыкашэтам ад беларуса паляцеў у браму, але ўсё ж такі галкіпер паспеў зрабіць выратаванне на стужцы.
Шыкаўка сыходзіць у статусе аднаго з найлепшых галеадораў у гісторыі «Кароны» – на яго рахунку 25 мячоў за 120 матчаў. Больш маюць толькі трое.
Іншыя пасты карыстальніка
