ЧБ поўніцца чуткамі пра вяртанне былых легіянераў: галы мінулай еўравосенню, апошні сыход з «Шахцёра»
Нядоўга былі па-за Беларуссю.
5 ліпеня ў чэмпіянаце Беларусі адкрыецца трансфернае акно. Ужо ёсць і чуткi пра магчымыя пераходы. Некаторыя – асабліва цікавыя: паведамляецца, што ў ЧБ могуць вярнуцца некалькі легіянераў. Хаця адна такая чутка адразу пачувалася як нерэальная.
Але ёсць яшчэ як мінімум тры інсайды. Вось пра каго гаворка і чым яны паспелі запомніцца ў «вышцы».
Рэйманд Адэола
У пачатку чэрвеня стала вядома, што 24-гадовы нігерыйскі экс-футбаліст «Гомеля» зноў трэнуецца з клубам. Але беларускі інсайдар Сяргей Волкаў удакладніў, што Адэола ў Гомелі знаходзіцца у адпачынку – раней футбаліст знайшоў сабе ў горадзе дзяўчыну, якая цяпер нарадзіла ад афрыканца. Заадно гулец падтрымлівае форму са знаёмым мясцовым клубам, але застацца там гатовы толькі пры адсутнасці больш цікавых прапаноў.
«Паміж мной і «Гомелем» узаемная любоў. Калі атрымаю канкрэтную прапанову, не буду вагацца!» – сказаў на гэты конт сам футбаліст. Але, трэба думаць, ён мае на ўвазе грошы – у белфутболе з лімітамі сумы не вельмі цікавыя для большасці з патэнцыйных легіянераў.
Нігерыец быў сярод тых, хто дапамаглі клубу ўзяць пакуль што апошні трафей – Кубак Беларусі ў 2022-м. Увогуле ў 2021-22 гадах Адэола аформіў за «Гомель» 4 гола і 8 асістаў у 26 матчах. У верасні 2022-га гульца прадалі ў расійскую «Родзіну», адкуль ён вярнуўся ў арэнду на другое кола ЧБ-2023 ды зрабіў 3+6 за 14 матчаў.
2024-ы Адэола правёў у мінскім «Дынама», дзе адзначыўся 5 галамі ў 20 матчах ЧБ і мячом «Капенгагену» (1:2) ў асноўным этапе Лігі канферэнцый, які здарыўся не без памылкі брамніка. Скандальна вядомы расійскі агент афрыканца Дзмітрыя Сялюка быў незадаволены, што кліент прысеў на лаву запасных у другой палове сезона пасля падпісання бразільца Педра Ігара, якога крытыкаваў за нібыта адсутнасць «барацьбы і аб’ёму».
Апошнія паўгода Адэола выступаў у другой камандзе «Астэраса», якая выступае ў Д2 Грэцыі. Там футбаліст нагуляў 4 матчы і адзначыўся 2 асістамі – у матчы супраць дубля АЕК (2:0, адзнака 1:53)...
...і ў апошнім матчы сезона з «Ханьяй» (2:2, адзнака 2:17).
Што, калі Адэола ўсё ж акажацца ў «Гомелі» трэцім разам? Раней гульца збольшага выкарыстоўвалі ў якасці левага вінгера. Цяпер левы фланг у клубе закрываюць Вадзім Марцінкевіч (13 матчаў, 1 асіст) і арандаваны з БАТЭ Андрэй Патапенка (11 матчаў, 1 асіст). Статыстыка небагатая – і ўвогуле «рысі» ў антытопе ЧБ па колькасьці забітых мячоў: усяго 9 за 13 тураў, менш толькі ў «Смаргоні» (7) і «Маладзечна» (5). У такім становішчы Адэола бачыцца ўзмацненнем.
Стывен Альфрэд
Яшчэ адзін кліент скандаліста Сялюка, паводле Волкава, можа перайсці ў «Тарпеда-БелАЗ». Верагоднасць пераходу 27-гадовага нігерыйскага форварда інсайдар ацаніў як высокую. Галоўны трэнер жодзінцаў Дзмітрый Молаш 23 чэрвеня не стаў каментаваць чутку, але абмовіўся, што клуб шукае гульцоў на некалькі пазіцый. Паводле інфармацыі Tribuna.com, жадаюць набыць якраз форварда (плюс яшчэ левага абаронцу).
Альфрэд упершыню з’явіўся ў ЧБ, адыграўшы сезон-2021 за «Слуцк», у «вышцы» забіў 9 мячоў. Пасля гэтага больш за два гады правёў у Iзраілі, столькі галоў за сезон не было нават у Д2. Але з не найлепшай статыстыкай форвард у ліпені 2024 года ўладкаваўся ў мінскім «Дынама». За паўгода там легіянер нагуляў 23 матчы, 11 з якіх былі еўракубкавымі, і сумарна аформіў 6+3 па «гол+пас», чаго хапіла, каб стаць трэцім бамбардзірам «бела-сініх» у сезоне. Як і Адэола, адзін з мячоў забіў у асноўным этапе ЛК – «Хартсу» ў 1-м туры (1:2).
У пачатку 2025-га Альфрэд сышоў – Сялюк, па нашай інфармацыі, хацеў павышэння заробку кліента, «Дынама» адмовіла. Здаецца, агента тое пакрыўдзiла – потым ён у іранічнай манеры нагадваў, што клуб «выйграў 5 мільёнаў еўра за ўдзел у еўракубках», таму, «здаецца, мае права плаціць заробкі больш».
Першую палову гэтага года Альфрэд правёў у аўтсайдара расійскага Д2 «Шынніка». Згуляў усяго 8 матчаў, у якіх не здолеў набраць выніковых балаў.
Але ў Беларусі нігерыец умее забіваць – таму, магчыма, і зацікавіў жодзінцаў. Пра праблемы «Тарпеда-БелАЗ» у атацы вядома – форварды Максім Скавыш (2 гола за 7 матчаў) і Ілля Васілевіч (1 асіст за 11 матчаў) па-ранейшаму маюць сумныя лічбы. Хаця Скавыш забіваў свае мячы акурат у апошніх двух турах ЧБ.
Валон Ахмедзі
Самы дасведчаны i вынiковы «былы» з пералічаных. Экс-футбаліст ЧБ Дзмітрый Бага 23 чэрвеня паведаміў, што албанскі паўабаронца паўночнамакедонскага паходжання можа перайсці ў брэсцкае «Дынама». Праўда, ужо 24 чэрвеня Бага напісаў, што «верагоднасць перахода Ахмедзi значна паменшылася».
Ахмедзі адгуляў 3,5 сезона ў салігорскім «Шахцёры» – з пачатку 2021-га па лета 2024-га. За гэты час ён дарос да капітана, паспеў стаць пераможцам ЧБ-2021 (а яшчэ было скасаванае чэмпіёнства 2022 года) і двойчы выйграць Суперкубак (2021, 2023). Футбаліст правёў роўна 100 матчаў за Салігорск ды запісаў на свой рахунак 11 галоў і 23 асіста.
Ахмедзі стаў апошнім легіянерам у гісторыі «Шахцёра». Нягледзячы на фінансавыя праблемы салігорцаў перад сезонам-2024, паўабаронца сыйшоў толькі напрыканцы траўня, і тое праз канфлікт з галоўным трэнерам.
Пасля Ахмедзі ўладкаваўся ў македонскай «Шкендыі», адкуль і з'язджаў у Беларусь. Там правёў першую палову чэмпіянату-2024/25, за 13 матчаў набраў 1+2 у статыстыку. Адзіны гол атрымаўся прыгожым і дапамог «чырвона-чорным» разграміць «Вардар» (4:0).
Галявыя пасы таксама атрымліваліся тэхнічнымі. Гэты, зроблены пад прэсінгам трох супернікаў, дапамог абыграць 2:0 «Акадэмію Пандзева» (адзнака 2:02):
А гэты са штрафнога – разграміць 5:1 «Воска Спорт» (адзнака 4:13).
У студзені Ахмедзі нечакана пакінуў «Шкендыю». Паўночнамакедонскія СМІ пісалі, што клуб згубіў «аднаго з найважнейшых гульцоў». У лютым паўабаронца падпісаўся з канкурэнтам па чэмпіянату – «Работнічкамі». Так, гэты клуб нядаўна стал супернікам «Тарпеда-БелАЗ» па першым адборачным раўндзе Лігі канферэнцый.
Але на новым месцы Ахмедзі правёў толькі пяць гульняў. Адзінае выніковае дзеянне – зароблены для каманды пенальці ў пераможным матчы супраць «Беса» (1:0). У эпiзодзе, дарэчы, падобным да сімуляцыі (адзнака 0:19).
15 чэрвеня кантракт Ахмедзі з «Работнічкамі» скончыўся. Пра яго працяг нічога не паведамлялася.
Паўабаронца – універсал, можа згуляць як у цэнтры поля, так і на флангах. У «Шахцёры» большую частку матчаў правёў як атакуючы паўабаронца. На гэтай пазіцыі ў Брэста, падаецца, усё добра – Арцём Быкаў добра праявіў сябе пад дуэтам Ягора Карцова і Міхаіла Гардзейчука.
Зрэшты, Быкаў ужо месяц не вызначаецца галявымі дзеяннямі, а «Дынама» за гэты час двойчы прайграла дома – 1:2 «Іслачы» і 0:1 «Гомелю». Тым часам галоўны трэнер брастаўчан Аляксандр Сяднёў скардзіўся на недахоп «гульнявой энергіі» і «інэртныя дзеянні ў атацы» – Ахмедзі мог бы дадаць гэтых якасцяў.
Іншыя пасты карыстальніка
