Сына задрафтавалі ў НХЛ, а што старэйшы Радзькоў у «Арысе»? Выйграў нетыповы спарынг, атрымаў экс-гульца АПЛ, шмат абдымаецца
Цяпер удзячны Баскаву.
20 траўня кіпрскі «Арыс» афіцыйна змяніў аднаго беларускага трэнера на іншага – замест 37-гадовага Аляксея Шпілеўскага каманду ўзначаліў 39-гадовы Арцём Радзькоў.
Прайшоў ужо месяц з лiшкам – таму распавядаем пра першыя крокi Радзькова на новым для яго месцы.
Збор з упорам на трэніроўкі і абдымкі
«Арыс» летам праводзiць некалькi збораў у Еўропе. Першы адбыўся ў латвійскай Юрмале, дзе каманда знаходзілася з 16 па 25 чэрвеня. Перад выездам клуб абвясціў пра вяртанне 36-гадовага іспанскага трэнера па фізічнай падрыхтоўцы Мікеля Гільена (ужо працаваў з камандай са жніўня 2021 года па люты 2022 года), які ў пачатку 2025-га засвяцiўся ў «МЛ».
У «МЛ» весела не толькі з гульцамі, але і трэнерамі. Там ужо два хуткіх сыходы пасля прызначэння
Згодна з апiсаннем на сайце «Арыса», на першым зборы гульцы набіралі форму, трэнуючыся па два разы на дзень. Выключэннем сталі 22 чэрвеня, калі Радзькоў запланаваў усяго адну трэніроўку для аднаўлення, і 24 чэрвеня, калі занятак праходзіў толькі раніцай – праз матч з латвiйскiм РФШ, які прайшоў 25 чэрвеня. У гульнi, якая працягвалася толькi 70 хвілін, кіпрыёты выйгралі 2:0, а Радзькоў задзейнiчаў 19 гульцоў. Трансляцыi не вялося, таму пра тактыку пакуль казаць няма чаго.
Прэс-служба клуба павемамляла, што Радзькоў «асабліва задаволены настроем гульцоў, паколькі тэмп і інтэнсіўнасць трэніровак паступова нарастаюць». Па фота бачна, што коўч умацоўвае сувязь з калектывам праз частыя абдымкі.
У Латвіі каманда Радзькова даведалася і свайго суперніка па другiм кваліфікацыйным раўндзе Лiгi канферэнцый. 24 лiпеня «Арыс» згуляе дома, а 31 лiпеня ў гасцях з венгерскiм вiцэ-чэмпiёнам «Акадэміяй Пушкаша». Дарэчы, дакладнай даты старту «Арыса» ў новым чэмпіянаце Кiпра пакуль няма, але звычайна розыгрыш стартуе ў канцы жніўня.
Пасля Латвii «Арыс» выехаў у Аўстрыю на другі збор, які працягнецца да 17 ліпеня. Там каманда правядзе ўжо больш спарынгаў: сустрэнецца з балгарскім «ЦСКА 1948» (2 ліпеня), польскім «Гурнікам» (5 ліпеня), венгерскім ДВТК (9 ліпеня), чэшскай «Славіяй» (9 ліпеня) і ўкраінскім «Палессем» (16 ліпеня).
Больш адпускаюць, чым падпісваюць, але прыйшоў ветэран з досведам у АПЛ
У летняе трансфернае акно «Арыс» адпусціў ужо чатырох футбалістаў. 31-гадовы сербскі левы абаронца Слабадан Урушавіч (0+0 за 21 матчаў у лізе ў мінулым сезоне) пакінуў клуб свабодным агентам. 20-гадовы кастарыканец Джон Руіз (мінулы сезон правёў у арэндзе) сышоў на Радзіму ў клуб «Алахуэленсе». 25-гадовы англійскі апорнік Морган Браўн (1+0 у 7 матчах у лізе) адправіўся ў кіпрскі «Апалон».
Адзіным ключавым гульцом, які пакінуў «Арыс», стаў польскі паўабаронца Караль Струскі. 24-гадовы гулец, які ў мінулым сезоне выбіў 5+10 за 34 матчы чэмпіянату, перайшоў да віцэ-чэмпіёна Польшчы «Ракава» за мiльён еўра.
Сам «Арыс» выкупіў кантракт нарвежца Дэніса Гаўстада (сума невядомая), які ў мінулым сезоне гуляў за кіпрыётаў на правах арэнды. У чэмпіянаце-2024/25 вінгер выходзіў на поле 14 разоў і аформіў 3+4.
Таксама «Арыс» падпісаў 37-гадовага нігерыйца Леона Балагуна, апошнім клубам якога быў шатландскі «Рэйнджэрс». Цэнтральны абаронца за сваю кар'еру паспеў правесці 75 матчаў у Бундэслізе за «Гановер», «Вердэр», «Фартуну» і «Майнц», а таксама згуляць 8 матчаў у АПЛ за «Брайтан». Экс-гулец зборнай Нігерыі далучыўся да «Арыса» яшчэ ў Юрмале.
Сын галоўнага трэнера патрапіў на драфт НХЛ
У суботу стала вядома, што сын Арцёма Радзькова Арсень на драфце НХЛ быў выбраны «Манрэалем». 17-гадовы беларускі брамнік стаў 82-м пікам, а цяперашні трэнер «Арыса» падзякаваў Дзмітрыю Баскаву за тое, што ён «аказаў вялікі ўплыў на фармаванне яго сына як гульца». А ўсё таму, што Баскаў настаяў на пераходзе Арсеня менавіта ў дынамаўскую школу, дзе хлопец правёў «некалькі сезонаў».
Баскаў – былы гендыр мінскага «Дынама» і кіраўнік хакейнай федэрацыі, які атрымаў дыскваліфікацыю ад міжнароднай федэрацыі за ўдзел у палітычных рэпрэсіях. Яшчэ ён мае дачыненне да забойства Рамана Бандарэнкі, а сёння з'яўляецца трэнерам пацешнай каманды Лукашэнкі.
Іншыя пасты карыстальніка
