Мае вырак за абыходжанне з дачкой, фанаты завуць Кінг-Конгам – Шкурына ў запас пасадзіў не той, ад каго гэтага чакалі
Легенда швейцарскага клуба з дзіўным кантрактам.
Нядаўна мы пісалі пра тое, як Ілля Шкурын не паляцеў на матч «Легіі» ў кваліфікацыі Лігі канферэнцый супраць «Хіберніяна» (2:1) праз пратэрмінаваны беларускі пашпарт. У праяздны польскі дакумент, якім валодае беларус, складана аператыўна атрымаць вялікабрытанскую візу, таму форвард застаўся ў Варшаве.
Але Шкурын пакутуе ад недахопу гульнявога часу не толькі праз бюракратыю і пытанні асабістай бяспекі.
На сёння яго прамы канкурэнт Жан-П’ер Нсамэ ўпэўнена трымаецца ў статусе асноўнага форварда і набівае выбітную еўракубкавую статыстыку.
Расказваем пра камерунца, які так імкліва забраў у беларускага легіянера месца ў старце.
Выхоўваўся ў «Анжэ», супербамбардзірам стаў у Швецарыі, мае прысуд за жорсткае абыходжанне з дзецьмі
Жан-П’ер Нсамэ нарадзіўся ў Камеруне, але яшчэ непаўнагадовым перабраўся ў Францыю, дзе спачатку выступаў за аматарскія клубы, а потым прайшоў праз школу «Анжэ». Нсамэ пазней расказваў, што ён таксама спабаваў займацца тэнісам і баскетболам (мае рост 1,88 метра), але ўсё ж спыніўся на футболе.
У 2012-м камерунец дэбютаваў за «Анжэ» на дарослым узроўні ў Д2 Францыі. Нападнік не стаў асноўным і пазней едзіў у арэнды ў каманды «Какефу» і «Ам’ен» у Д3, каб набірацца досведу.
У 2015-м «Анжэ» упершыню з 1993-га выйшаў у французскую вышку, а Нсамэ вярнуўся ў клуб пасля сезону ў Д3 за «Ам’ен» і застаўся на чэмпіянат-2015/16. Там нападнік нават прыняў удзел у 5 матчах Лігі 1 без выніковых дзеянняў – і ў аснове не замацаваўся. На гэта паўплывала і скандальная гісторыя, праз якую Нсамэ выпадаў з заяўкі на матчы.
У лістападзе 2015-га футболіста арыштавала французская паліцыя у сувязі з падазрэннем у фізічным гвалце над уласнай дачкой. Дзіця амаль цалкам страціла зрок, у дзяўчынкі былі прыкметы Сіндрома дзіцячага страсення (адной з прычын гібелі немаўлят).
Цяперашні партнёр Шкурына на слуханні распавёў сваю версію падзей. Прымаючы душ, ён нібыта пачуў крык дачкі, выбег да яе і ўбачыў, што вочы ў 5-месячнага дзіцяці закаціліся. Нсамэ таксама сказаў, што не чуў яе дыхання. Але гэтая версія з комплексам сімптомаў не адпавядае апісанню Сіндрома дзіцячага страсення з медыцынскага пункту гледжання, хаця сам дыягназ пацвердзіўся.
У выніку за жорсткае абыходжанне з дзецьмі камерунец атрымаў 3 гады ўмоўна і штраф у 50 тысяч еўра. На момант прысуду у яго дачкі былі праблемы са зрокам, яна з цяжкасцю вучылася хадзіць.
Напрыканцы сезону-2015/16 Transfermarkt ацэньваў Нсамэ ў 300 тысяч еўра. Але летам камерунца бясплатна адпусцілі ў «Сервет», які тады выступаў у швейцарскім Д2.
Там Нсамэ правёў свае найлепшыя сезоны. Спачатку выбіў за новы клуб 23+5 па сісітэме «гол + пас» у 31 матчы Д2, а потым за 900 тысяч еўра перайшоў у «Янг Бойз».
За шэсць гадоў у клубе нападнік правёў 242 матчы, забіў 140 мячоў і аддаў 39 асістаў. Нсамэ стаў 6-разовым чэмпіёнам Швецырыі, а таксама двойчы браў Кубак краіны і гуляў у Лізе чэмпіёнаў. Сярод індывідуальных узнагарод – званне тройчы найлепшага бамбардзіра швейцарскай эліты (сезоны 2019/20, 2020/21 і 2022/23) і два тытулы найлепшага гульца году ўнутры Швейцырыі (2020, 2021).
У 2022 Нсамэ пакідаў «Янг Бойз» на паўгода, бо спрабаваў свае сілы ў Серыі А у складзе «Венецыі», але там зрабіў толькі 1 асіст у 11 гульнях і вярнуўся ў Швейцарыю.
Пасля з «Янг Бойз» у студзені 2024-га Нсамэ за 500 тысяч еўра перайшоў у «Кома» з Д2 Італіі. У гэтай краіне ў камерунца зноў не пайшло, і ён адправіўся ў «Легію»
У Варшаву прыходзіў па дзіўнай схеме, стаў лідарам толькі праз арэнду
Сам форвард казаў, што варшавяне ўзялі яго ў арэнду, але з абавязковым выкупам (за 150 тысяч еўра па Transfermarkt). Паводле слоў камерунца, гэтая функцыя нібыта мусіла актывізавацца, як толькі ён заб’е свой дэбютны мяч за клуб. То бок афіцыйна Нсамэ ўзялі ў арэнду 1 ліпеня 2024-га, а ўжо праз месяц пасля гола «Карнарвону» ў кваліфікацыі Лігі канферэнцый гэтая опцыя нібыта спрацавала. Толькі прэс-служба палякаў пра такую дамову з «Кома» нічога не паведаміла.
Сам форвард за наступныя матчы першай палову сезона-2024/25 адзначыўся яшчэ толькі аднойчы, ды і гуляў мала: 10 матчаў ва ўсіх турнірах за 5 месяцаў у клубе.
Пасля такога адрэзка камерунец у студзені 2025-га выправіўся ў арэнду ў швейцарскі «Сент-Гален». Толькі тут заўзятары «Легіі» і даведаліся, што Нсамэ ўжо мае паўнавартасны кантракт з клубам.
Сярод польскіх журналістаў было папулярным меркаванне, што Нсамэ проста не пасаваў пад стыль тагачаснага галоўнага трэнера «армейцаў» Гансалу Фею. Сімвалічна, што праз месяц пасля часовага сыходу афрыканца партугальскі спецыяліст быў ужо асабіста зацікаўлены ў трансферы Шкурына са «Сталі».
За другую палову сезона-2024/25 Нсамэ выбіў 2+2 за 13 матчаў у Швейцарыі, а Фею пасля фінішу Экстракласы сышоў з «Легіі», таму сітуацыя каардынальна перамянілася.
Цяпер Нсамэ рэзка стаў асноўным, пакінуўшы на лаўцы не толькі Шкурына
Летам Фею на пасадзе галоўнага трэнера замяніў румын Эдвард Ярданеску.
З ім Шкурын пачаў сезон як асноўны форвард і забіў пераможны мяч у Суперкубку.
Крутой гол Шкурина в Суперкубке Польши – только посмотрите, как помог «Легии» начать сезон с трофея!
24 ліпеня адбыўся матч 2-га раўнда кваліфікацыі Лігі Еўропы супраць чэшскага «Баніка», дзе беларус выйшаў у старце, але быў заменены без выніковых балаў пры ліку 1:2 на 62-й хвіліне. Нсамэ выйшаў замест Шкурына, забіў на 88-й і здабыў нічыю (2:2). Гэта стала ключавой падзеяй у канкурэнцыі форвардаў.
Тады ж у каментарах сацсетак польскія заўзятары сталі актыўна параўнаць камерунца з персанажам фільма «Кінг-Конг». Узнік хоць, магчыма, і трошкі расісцкі, але лакальны мем.
Праз тры дні 27 ліпеня ў матчы 2-га тура Экстракласы супраць «Кароны» (2:0) у старце выйшаў ужо камерунец. Ён зноў аформіў гол – ужо на 9-й хвіліне.
Шкурын ў той гульні нават не з’явіўся на полі з лаўкі, бо за варшавян дэбютаваў 26-гадовага дацкі форвард Мілета Раявіч, якога за рэкордныя для Польшчы 3 мільёны еўра набылі з «Уотфарда».
Такім чынам, пачынаючы з гэтага матчу, на месца страйкера ў «Легіі» пачалі прэтэндаваць тры футбалісты. І, падобна, Шкурын пакуль з’яўляецца трэцім выбрам на пазіцыі, бо пасля прыходу Раявіча гульнявы час размяркоўваецца так:
- Жан-П’ер Нсамэ: 506 хвілін за 7 матчаў (6 выхадаў у старце), 5+1.
- Мілета Раявіч: 219 хвілін за 6 матчаў (2 выхады ў старце), 1 гол.
- Ілля Шкурын: 105 хвілін за 5 матчаў (1 выхад у старце), 0 галоў.
Варта ўлічваць, што Шкурына не было ў Шатландыі, але Нсамэ ўсё адно працягвае ззяць. Агулам за сезон ён зарабіў ужо 5+1 у 6 еўракубкавых матчах і дадаў у статыстыку 1 гол у Экстракласе за 3 матчы.
У апошнім матчы «Легіі» ў плэй-оф кваліфікацыі ЛК афрыканец выбіў 1+1 і дапамог абгуляць шатландскі «Хіберніян» (2:1). Цяпер варшавяне ўжо адной нагой знаходзіцца ў агульным этапе еўракубка.
Калі выйдуць, то неўзабаве спатрэбіцца ратацыя, падчас якой у Шкурына дакладна будзе шанц правіць сябе. Нсамэ якраз з’яўляецца прыкладам, як хутка ўсё можа змяніцца.
Фота: прэс-служба «Легіі», інстаграм-акаўнт Нсамэ.
Іншыя пасты карыстальніка
